ന്യൂഡൽഹി: (KVARTHA) ബംഗ്ലാദേശില്‍ ഷെയ്ഖ് ഹസീന സര്‍ക്കാർ വീണതിന് പിന്നാലെ ഇന്ത്യന്‍ ദേശീയ പതാകയെ അപമാനിക്കുന്ന നിരവധി ചിത്രങ്ങളും വീഡിയോകളും സോഷ്യല്‍ മീഡിയയില്‍ പ്രചരിക്കുന്നുണ്ട്. ഇതിനിടെ ഒരു മുസ്ലീം വ്യക്തി ബംഗ്ലാദേശ് പതാക പിടിച്ചുകൊണ്ട് ഇന്ത്യന്‍ പതാകയെ അപമാനിക്കുന്നുവെന്ന കുറിപ്പോടെ ഒരു ചിത്രം വൈറലായിക്കൊണ്ടിരിക്കുകയാണ്. ബംഗ്ലാദേശിലെ നിലവിലെ രാഷ്ട്രീയ അസ്ഥിരതയുടെ പശ്ചാത്തലത്തില്‍ ഇയാള്‍ ഇന്ത്യന്‍ പതാകയെ അപമാനിച്ചുവെന്നാണ് അവകാശവാദം.

യാഥാർഥ്യം എന്താണ്?

വിശ്വാസ്‌ ന്യൂസിന്റെ അന്വേഷണത്തില്‍ വൈറലായ ചിത്രം ആര്‍ട്ടിഫിഷ്യല്‍ ഇന്റലിജന്‍സ് (എഐ) ഉപയോഗിച്ച് സൃഷ്ടിച്ചതാണെന്ന് കണ്ടെത്തി. ഗൂഗിളിന്റെ ഫാക്ട് ചെക്ക് ടൂളിലും വിശ്വാസ്‌ ന്യൂസിന്റെ ഈ വാർത്ത ഇടം പിടിച്ചിട്ടുണ്ട്. എന്നിരുന്നാലും, ഇന്ത്യന്‍ ദേശീയ പതാകയെ അപമാനിക്കുന്ന നിരവധി യഥാര്‍ത്ഥ ചിത്രങ്ങളും വീഡിയോകളും ബംഗ്ലാദേശില്‍ നിന്ന് പുറത്തുവന്നിട്ടുണ്ട്. 

ഫേസ്ബുക്ക് ഉപയോക്താവ് 'ശങ്കര്‍ പാണ്ഡേ'യാണ് വൈറലായ ചിത്രം പങ്കിട്ടത്. 'ഇന്ത്യ നല്‍കിയ അൽപം ഭക്ഷണത്തില്‍ ജീവിച്ച ബംഗ്ലാദേശുകാര്‍ ഇപ്പോള്‍ പാകിസ്ഥാനില്‍ നിന്ന് പ്രചോദനം ഉള്‍ക്കൊണ്ട് മനസ്സിലെ ഇസ്ലാമിക ഭക്തിയെ പുറത്തെടുത്ത് ഇന്ത്യന്‍ ദേശീയ പതാകയെ ചവിട്ടിമെതിക്കുന്നു. ഇന്ത്യ ആഗ്രഹിച്ചിരുന്നെങ്കില്‍ ഈ ആളുകള്‍ പട്ടിണി കിടന്നു മരിക്കുമായിരുന്നു, അവര്‍ക്ക് ഭക്ഷണമോ വസ്ത്രമോ ഒന്നുമുണ്ടാകില്ലായിരുന്നു, രക്ഷപ്പെടാനുള്ള മാര്‍ഗവുമില്ലായിരുന്നു', എന്നാണ് അദ്ദേഹം പോസ്റ്റില്‍ കുറിച്ചത്.

വിശ്വാസ്‌ ന്യൂസിന്റെ വസ്‌തുത പരിശോധനയിൽ വൈറലായ ചിത്രത്തിലെ വ്യക്തിയുടെ കണ്ണുകള്‍ അസാധാരണമാണെന്നും അയാളുടെ കാലില്‍ വലിയ കാൽവിരലില്ലെന്നും ബാക്കിയുള്ള വിരലുകള്‍ക്ക് അസാധാരണമായ രൂപമുണ്ടെന്നും കണ്ടെത്തി. ഇത് ചിത്രം എഐ ഉപയോഗിച്ച് സൃഷ്ടിച്ചതാണെന്ന സംശയം ഉയര്‍ത്തി.

അന്വേഷണം മുന്നോട്ടുകൊണ്ടുപോകുന്നതിനിടയില്‍ എഐ ഇമേജ് ഡിറ്റക്ഷന്‍ ടൂളുകള്‍ ഉപയോഗിച്ച് ചിത്രം തിരഞ്ഞു. ഹൈവ് മോഡറേഷന്‍ 94% സാധ്യതയോടെ ചിത്രം എഐ സൃഷ്ടിച്ചതാണെന്ന് സൂചിപ്പിച്ചു. മറ്റൊരു ടൂളായ ട്രൂ മീഡിയയും ചിത്രം എഐ സൃഷ്ടിച്ചതാണെന്ന സാധ്യത സൂചിപ്പിച്ചു. കൂടുതല്‍ വിവരങ്ങള്‍ക്കായി എഐ വിദഗ്ധനായ ഭാര്‍ഗവ് വലേറയുമായി ബന്ധപ്പെട്ടു. 

'ഇത്തരം ചിത്രങ്ങള്‍ എഐ ടൂളുകള്‍ ഉപയോഗിച്ച് എളുപ്പത്തില്‍ സൃഷ്ടിക്കാന്‍ കഴിയും, എന്നാല്‍ ഈ ടൂളുകള്‍ പലപ്പോഴും നിരവധി പോരായ്മകള്‍ അവശേഷിപ്പിക്കുന്നു. ഉദാഹരണത്തിന്, ഈ ചിത്രത്തില്‍ വ്യക്തിയുടെ കണ്ണുകള്‍ അസാധാരണവും കാല്‍വിരലുകളുടെ ആകൃതിയും തെറ്റാണ്', വൈറലായ ചിത്രത്തെക്കുറിച്ച് അദ്ദേഹം പ്രതികരിച്ചു. സമഗ്രമായ അന്വേഷണത്തില്‍ ഇന്ത്യന്‍ ദേശീയ പതാകയെ അപമാനിച്ച മനുഷ്യന്റെ വൈറലായ ചിത്രം എഐ ടൂള്‍ ഉപയോഗിച്ച് സൃഷ്ടിച്ചതാണെന്ന് വ്യക്തമായതായി വിശ്വാസ്‌ ന്യൂസ് റിപ്പോർട്ട് ചെയ്‌തു.

#AICreation, #FlagDisrespect, #IndianFlag, #FactCheck, #Disinformation, #ViralImage