ഡെല്‍ഹി കെട്ടിട ദുരന്തത്തില്‍ മരിച്ചവരുടെ എണ്ണം ആറായി; ഉടമക്കെതിരെ പൊലീസ് കേസെടുത്തു, ഊർജിത തെരച്ചിൽ

ന്യൂഡെല്‍ഹി: (KVARTHA) സത്യനികേതനിൽ ബഹുനില ഹോസ്റ്റൽ കെട്ടിടം തകർന്ന് വീണുണ്ടായ ദുരന്തത്തിൽ മരണം ആറായി. 2026 സെപ്റ്റംബർ 7 തിങ്കളാഴ്ച പുലർച്ചെയോടെ ഒരു മൃതദേഹം കൂടി കണ്ടെത്തുകയായിരുന്നു. കെട്ടിടാവശിഷ്ടങ്ങൾക്കിടയിൽ കുടുങ്ങിയവർക്കായുള്ള തെരച്ചിൽ ഇപ്പോഴും തുടരുകയാണ്. ചികിത്സയിലുള്ള ഏഴ് പേരെ ഇനിയും തിരിച്ചറിയാനായിട്ടില്ല. നിരവധി പേർ അവശിഷ്ടങ്ങൾക്ക് ഇടയിൽ കുടുങ്ങിക്കിടപ്പുണ്ടെന്നാണ് അധികൃതരുടെ സംശയം.

അതേസമയം, സംഭവത്തിൽ ജുഡീഷ്യൽ അന്വേഷണത്തിന് ഡെല്‍ഹി മുഖ്യമന്ത്രി രേഖ ഗുപ്ത ഉത്തരവിട്ടു. അപകടത്തിൽപ്പെട്ടവരുടെ കുടുംബങ്ങൾക്ക് സാധ്യമായ സഹായങ്ങൾ സർക്കാർ ഉറപ്പാക്കുമെന്ന് അധികൃതർ വ്യക്തമാക്കിയിട്ടുണ്ട്.

തകർന്നത് അഞ്ച് നില കെട്ടിടം

2026 സെപ്റ്റംബർ 6 ഞായറാഴ്ച ഉച്ചയ്ക്ക് ഒന്നരയോടെയാണ് തെക്കൻ ഡെല്‍ഹിയിലെ സത്യനികേതനിൽ അഞ്ച് നില ഹോസ്റ്റൽ കെട്ടിടം തകർന്ന് വീണത്. ഡെല്‍ഹി സർവകലാശാലയുടെ സൗത്ത് ക്യാമ്പസിന് സമീപം പിജി ഹോസ്റ്റലായി പ്രവർത്തിച്ചിരുന്ന ഡെയ്സ് ഹോസ്റ്റൽ എന്ന കെട്ടിടമാണ് പൂർണമായും നിലംപൊത്തിയത്. ആൺകുട്ടികളായിരുന്നു ഇവിടെ താമസിച്ചിരുന്നത്. അപകട സമയത്ത് 40 പേരെങ്കിലും കെട്ടിടത്തിലുണ്ടാകാമെന്നാണ് കണക്കുകൂട്ടൽ. വലിയ ശബ്ദത്തോടെ കെട്ടിടം തകർന്നു വീഴുകയായിരുന്നുവെന്നാണ് സമീപത്തെ കടകളിലുണ്ടായിരുന്നവർ പറഞ്ഞത്.

വലിയ കോൺക്രീറ്റ് പാളികൾക്കുള്ളിൽ അകപ്പെട്ടവരെ പുറത്തെടുക്കാൻ രക്ഷാപ്രവർത്തകർ ശ്രമം തുടരുകയാണ്. രക്ഷപ്പെടുത്തിയവരെ ഉടൻ എയിംസ് ആശുപത്രിയിൽ പ്രവേശിപ്പിച്ചു. പരിക്കേറ്റവർക്ക് വിദഗ്ധ ചികിത്സ നൽകുന്നതിനായി ആശുപത്രിയിൽ പ്രത്യേക മെഡിക്കൽ സംഘത്തെ സജ്ജമാക്കിയിട്ടുണ്ട്. തുടക്കത്തിൽ പ്രദേശവാസികളാണ് രക്ഷാപ്രവർത്തനത്തിന് മുന്നിട്ടിറങ്ങിയത്. എൻഡിആർഎഫ്, ഫയർഫോഴ്സ്, പൊലീസ് തുടങ്ങി വിവിധ ഏജൻസികൾ പിന്നാലെയെത്തി. കോൺക്രീറ്റ് പാളികൾ വെട്ടിപ്പൊളിച്ച് ആളുകളെ പുറത്തെടുക്കാൻ താമസം നേരിടുകയാണ്.

കാരണമായത് കാലപ്പഴക്കം

കെട്ടിടത്തിൻ്റെ കാലപ്പഴക്കവും, ദിവസങ്ങളായി തുടരുന്ന മഴയുമാണ് അപകടത്തിന് കാരണമെന്നാണ് പ്രാഥമിക നിഗമനം. ദുർബലമായ കെട്ടിടത്തിൻ്റെ താഴത്തെ നിലയിൽ നിർമാണ പ്രവൃത്തികൾ നടന്നിരുന്നതായും പ്രദേശവാസികൾ പറയുന്നു. 75 പേരെയാണ് ഇവിടെ പാർപ്പിച്ചിരുന്നതെന്നാണ് വിവരം. അവധി ദിനമായിരുന്നതിനാൽ പലരും വീടുകളിലേക്ക് പോയിരുന്നു. ഹോസ്റ്റലായി പ്രവർത്തിക്കുന്ന സമീപമുള്ള കെട്ടിടവും ദുർബലാവസ്ഥയിലാണ്. അപകടത്തിന് പിന്നാലെ അവിടെയുള്ളവരെ സുരക്ഷിതമായി ഒഴിപ്പിച്ചു.

സംഭവത്തിൽ കെട്ടിടം ഉടമക്കെതിരെ ഡെല്‍ഹി പൊലീസ് കേസെടുത്തു.  ഇയാൾ ഒളിവിലാണെന്നാണ് സൂചന. കെട്ടിട നിർമാണ ചട്ടങ്ങൾ ലംഘിച്ചാണ് ഇവിടെ വിദ്യാർഥികളെ പാർപ്പിച്ചിരുന്നതെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്.

സർക്കാരിനെതിരെ വിമർശനം

മുഖ്യമന്ത്രി രേഖ ഗുപ്ത അപകട സ്ഥലത്തെത്തി സ്ഥിതിഗതികൾ നേരിട്ട് വിലയിരുത്തിയിരുന്നു. രക്ഷാപ്രവർത്തനത്തിന് സാധ്യമായ എല്ലാ വഴികളും പ്രയോജനപ്പെടുത്തുന്നുണ്ടെന്ന് അവർ വ്യക്തമാക്കി. അതേസമയം, സർക്കാരിൻ്റെ നിരുത്തരവാദിത്തം വീണ്ടും ബോധ്യപ്പെട്ടെന്നും ഉറക്കം വെടിയണമെന്നും മുൻ മുഖ്യമന്ത്രി അരവിന്ദ് കെജ്രിവാൾ കുറ്റപ്പെടുത്തി. രക്ഷാപ്രവർത്തനം കാര്യക്ഷമല്ലാത്തതിനെ കോൺഗ്രസും, ബിജെപിയും കുറ്റപ്പെടുത്തി.

ഡെല്‍ഹിയിൽ കെട്ടിടം തകർന്ന് അടുത്തിടെയുണ്ടായ മൂന്നാമത്തെ ദുരന്തമാണിത്. നിയമലംഘനം നടത്തി നിർമിച്ചതും കാലപ്പഴക്കം ചെന്നവുമായ കെട്ടിടങ്ങൾ ഒഴിപ്പിക്കുമെന്ന് സർക്കാർ പ്രഖ്യാപിച്ചിരുന്നെങ്കിലും നടപടിയുമുണ്ടായില്ല എന്ന വിമർശനവും ശക്തമാണ്. തുടർച്ചയായുണ്ടാകുന്ന ഇത്തരം ദുരന്തങ്ങൾ നഗരത്തിലെ അനധികൃത കെട്ടിട നിർമാണങ്ങളെക്കുറിച്ചുള്ള ആശങ്കകളാണ് തുറന്നുകാട്ടുന്നത്.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 📢

Article Summary: Death toll in Delhi Satya Niketan building collapse rises to six.

#DelhiNews #BuildingCollapse #SatyaNiketan #NDRF #Kvartha #DelhiPolice #SobhaNews