ചെങ്കോട്ട മെട്രോ സ്റ്റേഷന് സമീപം രണ്ടു കാറുകൾ പൊട്ടിത്തെറിച്ചു; 9 മരണം, റെഡ് അലേർട്ട്

ന്യൂഡൽഹി: (KVARTHA) രാജ്യ തലസ്ഥാനമായ ഡൽഹിയെ നടുക്കിക്കൊണ്ട് ചെങ്കോട്ട മെട്രോ സ്റ്റേഷന് സമീപം വൻ സ്ഫോടനം. തിങ്കളാഴ്ച രാത്രി ഏഴ് മണിയോടെയാണ് ചെങ്കോട്ട മെട്രോ സ്‌റ്റേഷൻ്റെ ഗേറ്റ് നമ്പർ ഒന്നിന്  സമീപം നിർത്തിയിട്ടിരുന്ന രണ്ട് കാറുകൾ പൊട്ടിത്തെറിച്ചത്. ഉഗ്രസ്ഫോടനത്തിൽ ഒമ്പത് പേർ മരിക്കുകയും 25 പേർക്ക് പരിക്കേൽക്കുകയും ചെയ്തു. പരിക്കേറ്റവരിൽ എട്ടോളം പേരുടെ നില ഗുരുതരമായതിനാൽ മരണസംഖ്യ ഇനിയും ഉയരുമെന്ന് ആശങ്കയുണ്ട്. പരിക്കേറ്റവരെ ഉടൻ തന്നെ എൽഎൻജിപി (Lok Nayak Jai Prakash) ആശുപത്രിയിലേക്ക് മാറ്റി.

#WATCH | A call was received regarding an explosion in a car near Gate No. 1 of the Red Fort Metro Station, after which three to four vehicles also caught fire and sustained damage. A total of 7 fire tenders have reached the spot. A team from the Delhi Police Special Cell has… pic.twitter.com/F7jbepnb4F

— ANI (@ANI) November 10, 2025

സ്ഫോടന ശബ്‌ദം കേട്ട ഉടൻ ആളുകൾ പരിഭ്രാന്തരാവുകയും സുരക്ഷിത സ്ഥാനങ്ങളിലേക്ക് ഓടുകയുമായിരുന്നു. റോഡിനു നടുവിലാണ് സ്ഫോടനം നടന്നത്. ചെങ്കോട്ടയ്ക്ക് സമീപം നടന്ന സ്ഫോടനത്തിൽ മാരുതി ഇക്കോ വാൻ ഉൾപ്പെടെ എട്ടോളം വാഹനങ്ങൾ കത്തിനശിച്ചു. മറ്റ് മുപ്പതിലധികം വാഹനങ്ങൾക്കും കേടുപാടുകൾ സംഭവിച്ചു. തീ പൂർണമായും അണച്ചുവെന്ന് അഗ്നിരക്ഷാസേന അറിയിച്ചു.

രക്ഷാപ്രവർത്തനവും സുരക്ഷാ പരിശോധനയും

വിവരമറിഞ്ഞ് ഡൽഹി അഗ്നിരക്ഷാസേനയുടെ ഇരുപതോളം യൂണിറ്റുകൾ സംഭവസ്ഥലത്തെത്തി രക്ഷാപ്രവർത്തനത്തിന് നേതൃത്വം നൽകി. അരമണിക്കൂറിനുള്ളിൽ തീ പൂർണമായും നിയന്ത്രണവിധേയമാക്കാൻ സാധിച്ചു. സംഭവം നടന്ന ഉടൻ മെട്രോസ്‌റ്റേഷൻ പരിസരം പോലീസിൻ്റെ പൂർണ്ണ നിയന്ത്രണത്തിലാക്കുകയും മേഖലയിൽനിന്ന് ജനങ്ങളെ ഒഴിപ്പിക്കുകയും ചെയ്തു.

#BREAKING: Blast in a car reported near Red Fort in New Delhi. Several cars caught in the blast, many people reportedly injured. Delhi Police, Delhi Fire Brigade and Delhi Police Special Cell on the spot. More details are awaited. pic.twitter.com/qFl63hX0fU

— Aditya Raj Kaul (@AdityaRajKaul) November 10, 2025

റോഡിൽ നിർത്തിയിട്ട കാറിലാണ് സ്ഫോടനം ഉണ്ടായതെങ്കിലും, ഇത് ശക്തിയേറിയ സ്ഫോടനമാണെന്ന് പോലീസ് വ്യക്തമാക്കി. സ്ഫോടക വസ്തുക്കള്‍ ഉപയോഗിച്ചുള്ള സ്ഫോടനമാണോ എന്ന് പരിശോധിക്കുന്നതിനായി ബോംബ് സ്ക്വാഡ്, എൻഎസ്ജി (NSG - National Security Guard), സ്പെഷ്യൽ സെൽ, ഫൊറൻസിക് സംഘം എന്നിവർ സ്ഥലത്തെത്തി പരിശോധന നടത്തുന്നുണ്ട്.

അതീവ ഗൗരവത്തോടെ സുരക്ഷാ സേന

സ്വാതന്ത്ര്യദിനത്തിൽ പ്രധാനമന്ത്രി ദേശീയ പതാക ഉയർത്തുന്ന ചെങ്കോട്ടയ്ക്ക് സമീപം നടന്ന സ്ഫോടനം അതീവ ഗൗരവത്തോടെയാണ് സുരക്ഷാ സേനകൾ നോക്കിക്കാണുന്നത്. നിരവധി വിനോദ സഞ്ചാരികൾ വരുന്നതും രാജ്യത്തെ ഏറ്റവും വലിയ മാർക്കറ്റുകളിൽ ഒന്നായ ചാന്ദ്നി ചൗക്കിന് സമീപമുള്ളതുമായ ജനസാന്ദ്രതയേറിയ മേഖലയാണിത്. സംഭവത്തിന് പിന്നാലെ ഡൽഹിയിൽ റെഡ് അലേർട്ട് പ്രഖ്യാപിച്ചിട്ടുണ്ട്. കൂടാതെ മുംബൈ ഉൾപ്പെടെയുള്ള നഗരങ്ങളിൽ സുരക്ഷ കർശനമാക്കിയിട്ടുണ്ട്.

ദിവസങ്ങൾക്ക് മുൻപാണ് ഡൽഹിക്ക് സമീപം ഫരീദാബാദിൽ നിന്ന് കാറിൽ സ്ഫോടക വസ്തുക്കൾ കണ്ടെടുക്കുകയും, ഹരിയാന-ജമ്മു കശ്മീർ പോലീസിന്റെ സംയുക്ത സംഘം സ്ഫോടനത്തിന് പദ്ധതിയിട്ടെത്തിയ സംഘത്തെ പിടികൂടുകയും ചെയ്തത്. ഇത്തരം ഒരു സാഹചര്യം നിലനിൽക്കെയാണ് വീണ്ടും സ്ഫോടനം സംഭവിച്ചിരിക്കുന്നത്. നിലവിലെ സാഹചര്യം വിലയിരുത്തുന്നതിനായി കേന്ദ്ര ആഭ്യന്തര മന്ത്രി അമിത് ഷാ ഡൽഹി പൊലീസ് കമ്മിഷണറുമായി ഫോണിൽ സംസാരിച്ചതായി റിപ്പോർട്ടുണ്ട്. സ്ഫോടനത്തിൻ്റെ എല്ലാ വശങ്ങളും പരിശോധിക്കുമെന്ന് ഡൽഹി പൊലീസ് അറിയിച്ചു.

ഈ വാർത്ത കൂടുതൽ പേരിലേക്ക് എത്താനും ജാഗ്രത പാലിക്കാനും ഷെയർ ചെയ്യുക.

Article Summary: Major car explosion near Delhi's Red Fort Metro Station kills 9, injures 25.

#DelhiExplosion #RedFort #NewDelhi #RedAlert #CarBlast #NSG