Resigned | ലുധിയാനയില്‍ നിന്നുള്ള കോണ്‍ഗ്രസ് എംപി രണ്‍വീത് സിങ് ബിട്ടു ബി ജെ പിയില്‍ ചേര്‍ന്നു

ന്യൂഡെല്‍ഹി: (KVARTHA) ലോക്‌സഭ തിരഞ്ഞെടുപ്പിനുള്ള ഒരുക്കങ്ങള്‍ക്കിടെ കോണ്‍ഗ്രസിന് ശക്തമായ തിരിച്ചടി നല്‍കി ലുധിയാനയില്‍ നിന്നുള്ള എം പി രണ്‍വീത് സിങ് ബിട്ടു ബിജെപിയില്‍ ചേര്‍ന്നു. ലോക്‌സഭ തിരഞ്ഞെടുപ്പില്‍ പഞ്ചാബില്‍ ഒറ്റക്ക് മത്സരിക്കുമെന്ന് കോണ്‍ഗ്രസ് പ്രഖ്യാപിച്ചതിനു പിന്നാലെയാണ് രണ്‍വീത് സിങ് ബിട്ടു ബിജെപിയില്‍ ചേരുന്ന കാര്യം പാര്‍ടി നേതൃത്വം പുറത്തുവിട്ടത്. മുന്‍ പഞ്ചാബ് മുഖ്യമന്ത്രി ബിയാന്ത് സിങ്ങിന്റെ ചെറുമകനും മുന്‍ പഞ്ചാബ് മന്ത്രി തേജ് പ്രകാശ് സിങ്ങിന്റെ മകനുമാണ് രണ്‍വീത് സിങ് ബിട്ടു.

പ്രധാനമന്ത്രി നരേന്ദ്ര മോദിക്ക് നന്ദി പറഞ്ഞ അദ്ദേഹം, പഞ്ചാബിന്റെ വികസനത്തിനായി മോദിയും ആഭ്യന്തര മന്ത്രി അമിത് ഷായും ഒരുപാട് കാര്യങ്ങള്‍ ചെയ്യാനാഗ്രഹിക്കുന്നുവെന്നും അറിയിച്ചു. മോദിക്കും അമിത് ഷാക്കും പഞ്ചാബിന്റെ വികസനകാര്യത്തില്‍ പ്രത്യേക താല്‍പര്യമുണ്ടെന്ന് കഴിഞ്ഞ 10 വര്‍ഷത്തിനിടെ തനിക്ക് മനസ്സിലായതാണെന്നും, മോദിയെ വീണ്ടും പ്രധാനമന്ത്രിയായി ജനങ്ങള്‍ തിരഞ്ഞെടുക്കുമെന്നും ബിട്ടു മാധ്യമങ്ങളോട് പറഞ്ഞു.