5 വര്‍ഷത്തെ അധികാര കാലയളവില്‍ ഒരിക്കല്‍ പോലും മാധ്യമങ്ങളെ അഭിമുഖീകരിക്കാത്ത ഒരു പ്രാധാനമന്ത്രി; മോദി വെള്ളിയാഴ്ച മാധ്യമങ്ങളെ കാണും

ന്യൂഡല്‍ഹി: (www.kvartha.com 24.04.2019) അഞ്ച് വര്‍ഷത്തെ അധികാര കാലയളവില്‍ ഒരിക്കല്‍ പോലും മാധ്യമങ്ങളെ അഭിമുഖീകരിക്കാത്ത പ്രാധാനമന്ത്രി നരേന്ദ്ര മോദി ഒടുവില്‍ മാധ്യമങ്ങളെ കാണാന്‍ തീരുമാനിച്ചു. വെള്ളിയാഴ്ച വാരാണാസിയില്‍ മോദി മാധ്യമപ്രവര്‍ത്തകരോട് സംസാരിക്കുമെന്നാണ് അറിയിപ്പ്. അധികാരത്തിലെത്തിയ ശേഷം ഇതാദ്യമായാണ് പ്രധാനമന്ത്രി നരേന്ദ്രമോദി വാര്‍ത്താസമ്മേളനം വിളിക്കുന്നത്.

മാധ്യമങ്ങളെ അഭിസംബോധന ചെയ്യാന്‍ മോദിക്ക് ധൈര്യമില്ലെന്നും ചോദ്യങ്ങളെ നേരിടാന്‍ മോദിക്ക് ഭയമാണെന്നും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മോദിയെ നിരന്തരം പരിഹസിച്ചിരുന്നു. ഇതിനു മറുപടിയെന്നോണം ബോളിവുഡ് താരം അക്ഷയ് കുമാറുമായുള്ള മോദിയുടെ സൗഹൃദസംഭാഷണം ബുധനാഴ്ച രാവിലെ പുറത്തുവിട്ടിരുന്നു. അതിനു ശേഷമാണ് മോദി വാര്‍ത്താസമ്മേളനം വിളിക്കുന്നുവെന്ന പ്രഖ്യാപനവും വരുന്നത്. എല്ലാ മാധ്യമപ്രവര്‍ത്തകരേയും വാര്‍ത്താ സമ്മേളനത്തിന് ക്ഷണിക്കുമോ അതോ തെരഞ്ഞെടുക്കപ്പെട്ട മാധ്യമങ്ങളുമായി മാത്രമാണോ മോദിയുടെ സംവാദം എന്ന കാര്യം വ്യക്തമല്ല.

മോദിയുടെ മാധ്യമങ്ങളെ കാണുമെന്ന വാര്‍ത്തയ്ക്ക് പിന്നാലെ സംഭവത്തെ പരിഹസിച്ച് കോണ്‍ഗ്രസ് രംഗത്തെത്തി. ട്വിറ്ററിലൂടെയാണ് കോണ്‍ഗ്രസ് മോദിയെ പരിഹസിച്ചത്.