ന്യൂഡൽഹി: (KVARTHA) കേന്ദ്ര സർക്കാർ, കേരളത്തിന് തീരദേശ പരിപാലന നിയമത്തിൽ ഇളവ് അനുവദിച്ചു. സംസ്ഥാന സർക്കാർ ഉന്നയിച്ച ആവശ്യങ്ങൾ പരിഗണിച്ചാണ് കേന്ദ്രത്തിന്റെ അനുകൂല തീരുമാനം. 66 പഞ്ചായത്തുകളെ സിആർഇസെഡ്- 2 പട്ടികയിലേക്ക് മാറ്റി. കൂടാതെ, ജനസംഖ്യ കൂടിയ മറ്റു പഞ്ചായത്തുകളിൽ സിആർഇസെഡ് -3 എയുടെ കീഴിൽ നിർമ്മാണ പ്രവർത്തനങ്ങൾക്ക് ദൂരപരിധി 200 മീറ്ററിൽ നിന്ന് 50 മീറ്ററായി കുറച്ചതായി കേന്ദ്രം അറിയിച്ചിട്ടുണ്ട്.

2019-ൽ പുറപ്പെടുവിച്ച കേന്ദ്ര തീരദേശ നിയന്ത്രണ മേഖലാ വിജ്ഞാപനത്തിന്റെ അടിസ്ഥാനത്തിൽ കേരളം തയ്യാറാക്കിയ തീരദേശ പരിപാലന പ്ലാനിലെ ചില നിർദ്ദേശങ്ങൾ ഭാഗികമായി അംഗീകരിച്ചിട്ടുണ്ടെന്ന് കേന്ദ്രം വ്യക്തമാക്കി. സിആർഇസെഡ്-2 വിഭാഗത്തിൽ നിയന്ത്രണങ്ങൾ താരതമ്യേന കുറവായിരിക്കും.

സിആർഇസെഡ് 3 മേഖലയിൽ പ്രത്യേക വ്യവസ്ഥകൾ

അമ്പലപ്പുഴ വടക്ക്, അമ്പലപ്പുഴ തെക്ക്, ചിറയിൻകീഴ്, കരുംകുളം, കോട്ടുകാൽ, വെങ്ങാനൂർ എന്നീ ഗ്രാമപഞ്ചായത്തുകളിലുണ്ടായിരുന്ന അറ്റോമിക് മിനറൽ ശേഖരത്തിന്റെ കാരണത്താൽ സിആർഇസെഡ് -3 വിഭാഗത്തിലെ വ്യവസ്ഥകൾ ഇവിടെ ബാധകമാക്കുമെന്ന് കേന്ദ്രം അറിയിച്ചിട്ടുണ്ട്.

1991ന്-മുമ്പ് നിർമ്മിച്ച ബണ്ടുകൾ അല്ലെങ്കിൽ സൂയിസ് ഗേറ്റുകൾ നിലവിലുണ്ടെങ്കിൽ, ഈ ബണ്ടുകൾ/സൂയിസ് ഗേറ്റുകൾ അടിസ്ഥാനമാക്കിയാണ് വേലിയേറ്റ രേഖ നിശ്ചയിക്കുന്നത്. ഇതിന് തീരദേശ പരിപാലന പ്ലാനിൽ അംഗീകാരം നൽകിയതായും കേന്ദ്രം അറിയിച്ചു.

കണ്ടൽ കാടുകളെ ബാധിക്കുന്ന വ്യവസ്ഥകൾ

2019-ലെ സിആർഇസെഡ് വിജ്ഞാപന പ്രകാരം, 1000 ചതുരശ്ര മീറ്ററിൽ കൂടുതൽ വിസ്തീർണ്ണമുള്ള സർക്കാർ ഉടമസ്ഥതയിലുള്ള കണ്ടൽ കാടുകളോടുചുറ്റും 50 മീറ്റർ ബഫർ ഡീമാർക്ക് ചെയ്യുന്നതാണ് നിബന്ധന. എന്നാൽ, 2019-ലെ തീരദേശ പരിപാലന പ്ലാനിൽ, സ്വകാര്യ വ്യക്തികളുടെ ഉടമസ്ഥതയിലുള്ള കണ്ടൽ കാടുകളോടുചുറ്റുമുള്ള ബഫർ ഏരിയ നീക്കം ചെയ്തിട്ടുണ്ട്.

ജനസംഖ്യ സാന്ദ്രതയുടെ അടിസ്ഥാനത്തിൽ വിഹിതം

2011-ലെ ജനസംഖ്യ സാന്ദ്രത കണക്കുകൾ അടിസ്ഥാനമാക്കി, ഓരോ ചതുരശ്ര കിലോമീറ്ററിലും 2161-ത്തിലധികം ആളുകൾ താമസിക്കുന്ന പ്രദേശങ്ങളെ സിആർഇസെഡ് -2 എ വിഭാഗത്തിലും, അതിൽ കുറഞ്ഞ ജനസംഖ്യയുള്ള പ്രദേശങ്ങളെ സിആർഇസെഡ് -3 ബി വിഭാഗത്തിലും ഉൾപ്പെടുത്തുമെന്ന് കേന്ദ്രം വ്യക്തമാക്കിയിട്ടുണ്ട്.