സെൻസസ് 2027: പൗരന്മാർക്ക് ജൂൺ 16 മുതൽ ഓൺലൈനായി സെൽഫ് എന്യൂമറേഷൻ ചെയ്യാം; വിവരങ്ങൾ അറിയാം

കണ്ണൂർ: (KVARTHA) രാജ്യത്തെ സെൻസസ് 2027 ൻ്റെ ഭാഗമായുള്ള സെൽഫ് എന്യൂമറേഷൻ പൗരൻമാർക്ക് ജൂൺ 16 മുതൽ ജൂൺ 30 വരെയുള്ള ദിവസങ്ങളിൽ ഓൺലൈനായി നൽകാം. സ്വതന്ത്ര ഇന്ത്യയിലെ എട്ടാമത്തേതും രാജ്യത്തെ ആദ്യത്തെ ഡിജിറ്റൽ സെൻസസുമാണിത്.

എങ്ങനെ വിവരങ്ങൾ നൽകാം?

സെൽഫ് എന്യൂമറേഷൻ്റെ ഭാഗമായി https://se(dot)census(dot)gov(dot)in/ എന്ന പോർട്ടലിൽ കയറിയാണ് 34 ചോദ്യങ്ങൾക്കുള്ള ഉത്തരങ്ങൾ നൽകേണ്ടത്. പിന്നീട് സെൻസസിൻ്റെ ഭാഗമായി എന്യൂമറേറ്റർ വീട്ടിൽ എത്തുമ്പോൾ പോർട്ടലിൽ നൽകിയ വിവരങ്ങൾ സ്ഥിരീകരിക്കുകയും, പോർട്ടലിൽ വിവരങ്ങൾ നൽകുമ്പോൾ ലഭിക്കുന്ന നമ്പർ അവർക്ക് കൈമാറുകയും വേണം.

ഇതിന് ശേഷം അത്രയും ചോദ്യങ്ങൾക്കുള്ള ഉത്തരങ്ങൾ വീണ്ടും നൽകേണ്ടതില്ല. എന്യൂമറേറ്റർമാർ എച്ച്എൽഒ ആപ്പ് വഴിയാണ് ഉത്തരങ്ങൾ അപ്‌ലോഡ് ചെയ്യുക. പോർട്ടലിൽ കൊടുത്ത ഉത്തരങ്ങൾ തെറ്റിപ്പോയിട്ടുണ്ടെങ്കിൽ എന്യൂമറേറ്റർക്ക് മുന്നിൽ തിരുത്തി നൽകാനും അവസരമുണ്ട്.

സെൻസസ് ഘട്ടങ്ങൾ

സെൽഫ് എന്യൂമറേഷന് ശേഷം സെൻസസിൻ്റെ ആദ്യഘട്ടം ജൂലൈ ഒന്ന് മുതൽ ജൂലൈ 30 വരെ നടക്കും. ഈ ഘട്ടത്തിൽ ഹൗസ് ലിസ്റ്റിംഗ് ബ്ലോക്കുകളാണ് നിർണ്ണയിക്കുക. രണ്ടാം ഘട്ടത്തിലാണ് ജനസംഖ്യ സംബന്ധിച്ച സെൻസസ് നടക്കുക. 

ഇത് 2027 ഫെബ്രുവരി മാസം ആരംഭിക്കും. സെൻസസ് മുഖേന സർക്കാർ ശേഖരിക്കുന്ന ഡാറ്റ അതീവ രഹസ്യസ്വഭാവമുള്ളതായിരിക്കും. ഇവ വിവരാവകാശ അപേക്ഷ, ഇന്ത്യൻ എവിഡൻസ് ആക്റ്റ് തുടങ്ങിയ ഒരു നിയമപ്രകാരവും ലഭ്യമാകില്ലെന്ന് അധികൃതർ വ്യക്തമാക്കി.

ജില്ലാതല സജ്ജീകരണങ്ങൾ

ജില്ലയിൽ ജില്ലാ കലക്ടറാണ് പ്രിൻസിപ്പൽ സെൻസസ് ഓഫീസർ. ഇതിന് കീഴിൽ എഡിഎം ജില്ലാ സെൻസസ് ഓഫീസറായും അഡീഷണൽ അല്ലെങ്കിൽ ഡെപ്യൂട്ടി സെൻസസ് ഓഫീസർമാരും സബ്ഡിവിഷൻ സെൻസസ് ഓഫീസർമാർ, ചാർജ് ഓഫീസർമാർ, എന്യൂമറേറ്റർ, സൂപ്പർവൈസർമാർ എന്നിവരും പ്രവർത്തിക്കുന്നു. സെൻസസ് 2027 ൻ്റെ ഭാഗമായി ഫീൽഡ് ലെവൽ പരിശീലകർക്കുള്ള പരിശീലന പരിപാടി ജില്ലയിൽ പൂർത്തിയായിട്ടുണ്ട്.

പൊതുജനങ്ങൾക്ക് ഉപകാരപ്രദമായ ഈ വിവരം നിങ്ങളുടെ സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The self-enumeration for Census 2027 in India will take place from June 16 to June 30. Citizens can answer 34 questions on the official portal and provide the reference number to enumerators later. The first phase of the census (house listing) will run from July 1 to July 30, while the population census will begin in February 2027. This marks independent India's eighth census and its first digital one. Collected data will remain strictly confidential.

#Census2027 #DigitalCensus #IndiaCensus #SelfEnumeration #KeralaNews #KannurNews #MalayalamNews