Case History | 'കുട്ടിക്കാലത്തെ കുളിക്കുന്ന ഫോട്ടോ' ഗൂഗിൾ സ്റ്റോറേജിൽ അപ്‌ലോഡ് ചെയ്‌ത എൻജിനീയർക്ക് കിട്ടിയത് എട്ടിന്റെ പണി! കേസ് ഹൈകോടതി വരെയെത്തി; സംഭവം ഇങ്ങനെ

  തൻ്റെ ബാല്യകാല ചിത്രങ്ങളുടെ പേരിൽ ഗൂഗിൾ പോലുള്ള ബഹുരാഷ്ട്ര കമ്പനിക്കെതിരെ ഗുജറാത്ത് ഹൈകോടതിയെ വരെ ഇദ്ദേഹം ഇപ്പോൾ സമീപിച്ചിരിക്കുകയാണ്. 'കുട്ടിക്കാലത്ത് എൻ്റെ മുത്തശ്ശി എന്നെ കുളിപ്പിക്കാറുണ്ടായിരുന്നു, ആ കുട്ടിക്കാലത്തെ ചിത്രം കാരണം ഗൂഗിൾ എൻ്റെ അക്കൗണ്ട് ബ്ലോക്ക് ചെയ്തു. ഗൂഗിളുമായി ലിങ്ക് ചെയ്‌തിരിക്കുന്ന എൻ്റെ എല്ലാ സോഷ്യൽ മീഡിയ അക്കൗണ്ടുകളും ബ്ലോക്ക് ചെയ്യപ്പെട്ടു', നീൽ ശുക്ല പറയുന്നു. ഡിജിറ്റലായി സേവ് ചെയ്യാൻ മുത്തശ്ശി കുളിപ്പിക്കുന്ന ചിത്രം അപ്‌ലോഡ് ചെയ്തപ്പോഴാണ് ഗൂഗിൾ അക്കൗണ്ട് ബ്ലോക്ക് ചെയ്തതെന്നാണ് യുവാവിന്റെ പരാതി. ഇത് മാത്രമല്ല, ഇമെയിൽ ഡാറ്റകൾ, ഗൂഗിൾ പേ തുടങ്ങിയവയും നീക്കുമെന്ന് സന്ദേശം ലഭിച്ചിട്ടുണ്ട്.

തൻ്റെ അക്കൗണ്ട് ഡിലീറ്റ് ചെയ്യരുതെന്ന് ആവശ്യപ്പെട്ട് ഗൂഗിൾ അധികൃതർക്ക് നീൽ ശുക്ല കത്തയച്ചിരുന്നു. ഇതിനുശേഷം ഗുജറാത്ത് സർക്കാരിൻ്റെ സയൻസ് ആൻഡ് ടെക്‌നോളജി വകുപ്പിനും ഗുജറാത്ത് പൊലീസിൻ്റെ സൈബർ ക്രൈം ഡിപ്പാർട്ട്‌മെൻ്റിനും രേഖാമൂലം പരാതി നൽകിയെങ്കിലും പ്രശ്‌നത്തിന് പരിഹാരം കാണാത്തതിനെ തുടർന്നാണ് നീൽ ശുക്ല ഗുജറാത്ത് ഹൈകോടതിയിൽ കേസ് ഫയൽ ചെയ്തത്.

കുട്ടികളെ ലൈംഗികമായി ദുരുപയോഗം ചെയ്യുന്ന തരത്തിലുള്ള വസ്തുക്കൾ കണ്ടെത്തിയാൽ കമ്പനി നടപടി എടുക്കാറുണ്ടെന്ന് ഗൂഗിളിനെ ഉദ്ധരിച്ച് ബിബിസി റിപ്പോർട്ട് ചെയ്തു. അതേസമയം, കേസിൽ ഇനിയൊരു ഉത്തരവുണ്ടാകുന്നതുവരെ നീൽ ശുക്ലയുടെ അക്കൗണ്ട് ഡിലീറ്റ് ചെയ്യുന്നതിൽ നിന്ന് ഗൂഗിളിനെ ഗുജറാത്ത് ഹൈകോടതി വിലക്കിയിട്ടുണ്ട്. ഈ കേസിൻ്റെ അടുത്ത വാദം ഇനി ഏപ്രിൽ 30 ന് നടക്കും.