Budget | 2047ഓടെ ഇന്ത്യയെ വികസിത രാജ്യമാക്കാനാണ് ശ്രമിക്കുന്നതെന്ന് നിർമല സീതാരാമൻ; 'സർക്കാരിന്റെ ശ്രദ്ധ 4 വിഭാഗങ്ങളിൽ'; കേന്ദ്ര ബജറ്റ് അവതരണം തുടങ്ങി
Feb 1, 2024, 11:40 IST
ന്യൂഡെൽഹി: (KVARTHA) ധനമന്ത്രി നിർമല സീതാരാമൻ ബജറ്റ് അവതരണം തുടങ്ങി. കഴിഞ്ഞ 10 വർഷത്തിനിടെ സമ്പദ്‌വ്യവസ്ഥയിൽ വളരെയധികം വികസനം ഉണ്ടായതായി ധനമന്ത്രി പറഞ്ഞു. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ അത് പുരോഗമിച്ചു. അദ്ദേഹം പ്രധാനമന്ത്രിയായപ്പോൾ ഒരുപാട് വെല്ലുവിളികൾ ഉണ്ടായിരുന്നു. സബ്‌കാ സാത്ത്, സബ്‌കാ വികാസ് എന്ന മന്ത്രം കൊണ്ടാണ് സർക്കാർ ഈ വെല്ലുവിളികളെ നേരിട്ടത്. ജനക്ഷേമ പദ്ധതികളും വികസനവും നടപ്പിലാക്കിയതായും മന്ത്രി കൂട്ടിച്ചേർത്തു.
രാജ്യത്തിന് പുതിയ ലക്ഷ്യവും പുതിയ പ്രതീക്ഷയും ലഭിച്ചു. വൻ ഭൂരിപക്ഷത്തോടെ ജനങ്ങൾ വീണ്ടും സർക്കാരിനെ തിരഞ്ഞെടുത്തു. ഞങ്ങൾ ഇരട്ടി വെല്ലുവിളികൾ സ്വീകരിച്ച് സബ്‌കാ സാത്ത്, സബ്‌കാ വികാസ്, സബ്‌കാ വിശ്വാസ് എന്നീ മന്ത്രങ്ങളുമായി പ്രവർത്തിച്ചു. 'സബ്ക പ്രയാസ്' എന്ന മന്ത്രത്തോടെ നമ്മൾ കൊറോണ യുഗത്തെ അഭിമുഖീകരിച്ച് അമൃത് കാലത്തിലേക്ക് പ്രവേശിച്ചുവെന്നും നിർമല സീതാരാമൻ പറഞ്ഞു.
കഴിഞ്ഞ 10 വർഷത്തിനിടയിൽ എല്ലാവർക്കും വീട്, എല്ലാ വീടിനും വെള്ളം, എല്ലാവർക്കും ബാങ്ക് അക്കൗണ്ട് തുടങ്ങിയ പദ്ധതികൾ റെക്കോർഡ് സമയത്തിനുള്ളിൽ പൂർത്തിയാക്കി. 80 കോടി ജനങ്ങൾക്ക് സൗജന്യ റേഷൻ നൽകി. കർഷകരുടെ ഉൽപന്നങ്ങളുടെ മിനിമം താങ്ങുവില വർധിപ്പിച്ചു. സാമൂഹിക മാറ്റം കൊണ്ടുവരാൻ അസമത്വം ഇല്ലാതാക്കാൻ ശ്രമിച്ചു. ദരിദ്രർ, സ്ത്രീകൾ, യുവാക്കൾ, കർഷകർ എന്നീ നാല് വിഭാഗങ്ങളിലാണ് ശ്രദ്ധ. അവരുടെ ആവശ്യങ്ങളും അഭിലാഷങ്ങളും പ്രധാനമാണെന്നും 2047ഓടെ ഇന്ത്യയെ വികസിത രാജ്യമാക്കാനാണ് ശ്രമിക്കുന്നതെന്നും ധനമന്ത്രി പറഞ്ഞു.
രണ്ടാം മോദി സർക്കാരിൻ്റെ അവസാന ബജറ്റാണ് ഇത്. തന്റെ ആറാമത്തെ ബജറ്റാണ് നിർമല സീതാരാമൻ സഭയിൽ അവതരിപ്പിക്കുന്നത്. മൊറാർജി ദേശായിക്ക് ശേഷം ആറ് തവണ ബജറ്റ് അവതരിപ്പിക്കാൻ അവസരം ലഭിച്ച രണ്ടാമത്തെ ധനമന്ത്രിയാണ് സീതാരാമൻ. നേരത്തെ ബജറ്റിന് മന്ത്രിസഭ അംഗീകാരം നൽകിയിരുന്നു.
< !- START disable copy paste -->
keywords: News, Malayalam News, Budget, Finance, Govt, Budget, Nimala Seetharaman, Budget: We need to focus on four major pillars, says FM
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
