Hardik Pandya | ഏകദിന ലോകകപ്പിനിടെ പരുക്ക്; മുംബൈ ഇന്‍ഡ്യന്‍സ് കാപ്റ്റന്‍ ഹാര്‍ദിക് പാണ്ഡ്യക്ക് ഐ പി എല്‍ നഷ്ടമായേക്കും

ബംഗ്ലാദേശിനെതിരായ ലോകകപ്പ് മത്സരത്തിനിടെയാണ് ഹാര്‍ദിക് പാണ്ഡ്യയ്ക്ക് പരുക്കേറ്റത്. മത്സരത്തിന്റെ ഒമ്പതാം ഓവര്‍ ബൗള്‍ ചെയ്യുന്നതിനിടെയാണ് താരത്തിന്റെ കാലിന് പരുക്കേറ്റത്. ഹാര്‍ദിക് എറിഞ്ഞ ഒമ്പതാം ഓവറിലെ മൂന്നാം പന്തില്‍ ബംഗ്ലാദേശ് ഓപണര്‍ തന്‍സിദ് ഹസന്‍ ഒരു സ്ട്രെയ്റ്റ് ഡ്രൈവിലൂടെ ബൗണ്ടറി നേടിയിരുന്നു. ഈ ഷോട് തടയാന്‍ ശ്രമിക്കുന്നതിനിടെയാണ് കാലിന് പരുക്കേറ്റത്.

തുടര്‍ന്ന് ലോകകപ്പിലെ മറ്റുള്ള മത്സരങ്ങളെല്ലാം ഹാര്‍ദിക് പാണ്ഡ്യക്ക് നഷ്ടമായിരുന്നു. ആസ്‌ട്രേലിയക്കെതിരായ ട്വന്റി 20 സീരിസിലും ദക്ഷിണാഫ്രികക്കെതിരായ മത്സരങ്ങളിലും ഹാര്‍ദിക് കളിച്ചിരുന്നില്ല. ഇതിനിടെ ഗുജറാത് ടൈറ്റന്‍സില്‍ നിന്നും പൊന്നുംവിലക്ക് ഹാര്‍ദികിനെ സ്വന്തമാക്കി മുംബൈ ഇന്‍ഡ്യന്‍സ് കാപ്റ്റന്‍ സ്ഥാനവും താരത്തിന് നല്‍കിയിരുന്നു. ഇത് ഏറെ വിമര്‍ശനത്തിന് വഴിവച്ചിരുന്നു. രോഹിത് ശര്‍മയെ കാപ്റ്റന്‍ സ്ഥാനത്തുനിന്നും നീക്കിയതാണ് അദ്ദേഹത്തിന്റെ ആരാധകരെ ചൊടിപ്പിച്ചത്.

അഫ്ഗാനിസ്താനെതിരെയുള്ള ട്വന്റി 20 പരമ്പരയും ഹാര്‍ദിക് പാണ്ഡ്യക്ക് നഷ്ടമാകും. ജനുവരി 11 മുതല്‍ 17 വരെയാണ് അഫ്ഗാനിസ്താനെതിരായ ഇന്‍ഡ്യയുടെ പരമ്പര. ട്വന്റി 20 ലോകകപ്പിന് മുന്നോടിയായുള്ള ഇന്‍ഡ്യയുടെ അവസാന പരമ്പരയാണിത്. പരുക്ക് മൂലം ഇന്‍ഡ്യയുടെ സൂര്യകുമാര്‍ യാദവും അഫ്ഗാനിസ്താനെതിരായ പരമ്പരയില്‍ കളിക്കില്ലെന്ന റിപോര്‍ടുകളും പുറത്തുവരുന്നുണ്ട്.