Fire Accident | ബെംഗ്‌ളൂറില്‍ ഓടിക്കൊണ്ടിരുന്ന കാറിന് തീപ്പിടിച്ച് മലയാളി വെന്തുമരിച്ചു

ബെംഗ്‌ളൂറു: (KVARTHA) നെലമംഗലയില്‍ ഓടിക്കൊണ്ടിരുന്ന കാറിന് തീപ്പിടിച്ച് മലയാളി വെന്തുമരിച്ചു. വയനാട് മേപ്പാടി സ്വദേശി അനില്‍കുമാര്‍ (48) ആണ് മരിച്ചത്. സീറ്റ് ബെല്‍റ്റ് ധരിച്ചിരുന്നതിനാല്‍ കാര്‍ ഓടിച്ച അനില്‍കുമാറിന് പുറത്തു കടക്കാനായില്ല.

ചൊവ്വാഴ്ച വൈകിട്ട് മൂന്നോടെയാണ് അപകടം. നെലമംഗലയില്‍നിന്ന് ഷെട്ടിഹള്ളിയിലേക്ക് പോകുകയായിരുന്ന കാറിനാണ് തീപിടിച്ചത്. ഈ സമയത്ത് അനില്‍ കുമാര്‍ മാത്രമാണ് കാറിലുണ്ടായിരുന്നത്. അപകടത്തില്‍ കാര്‍ പൂര്‍ണമായും കത്തിനശിച്ചു.

തീ പടരുന്നതുകണ്ട് മറ്റു വാഹനയാത്രക്കാരും സമീപവാസികളുമെത്തി കാറിന്റെ ചില്ലുതകര്‍ത്ത് രക്ഷപ്പെടുത്താന്‍ ശ്രമിച്ചെങ്കിലും കഴിഞ്ഞില്ല. നെലമംഗലയില്‍നിന്ന് അഗ്‌നിരക്ഷാസേനയും പൊലീസുമെത്തിയാണ് തീയണച്ചത്. അപ്പോഴേക്കും അനില്‍കുമാര്‍ മരിച്ചിരുന്നു. മൃതദേഹം നെലമംഗലയിലെ ആശുപത്രിയിലേക്കുമാറ്റി.