ബണ്ട്വാളിൽ പിക്കപ്പ് ഡ്രൈവർ കൊല്ലപ്പെട്ട സംഭവം: മൃതദേഹം വൻ ജലാവലിയുടെ സാന്നിധ്യത്തിൽ ഖബറടക്കി; 15 പേർക്കെതിരെ കേസ്, അന്വേഷണം ഊർജിതം

മംഗളൂരു: (KVARTHA) ബണ്ട്വാൾ റൂറൽ പോലീസ് സ്റ്റേഷൻ പരിധിയിലെ കോൾട്ട്മജലു ജുമാ മസ്ജിദ് സെക്രട്ടറിയും പിക്കപ്പ് ലോറി ഡ്രൈവറുമായ അബ്ദുൾ റഹിമാനെ (38) വെട്ടിക്കൊലപ്പെടുത്തിയ കേസിൽ 15 പേർക്കെതിരെ കേസ് രജിസ്റ്റർ ചെയ്തു. ആയിരങ്ങളെ സാക്ഷിയാക്കി മൃതദേഹം ബുധനാഴ്ച കുത്താർ മദനി നഗർ ജുമാമസ്ജിദ് ഖബർസ്ഥാനിൽ ഖബറടക്കി. കൊല്ലപ്പെട്ട യുവാവിനൊപ്പം ആക്രമിക്കപ്പെട്ട ഇംതിയാസ് എന്ന കലന്തർ ഷാഫിയുടെയും, സംഭവത്തിന് ദൃക്സാക്ഷിയായ മുഹമ്മദ് നിസാറിൻ്റെയും മൊഴിയുടെ അടിസ്ഥാനത്തിലാണ് എഫ്.ഐ.ആർ. രജിസ്റ്റർ ചെയ്തതെന്ന് അന്വേഷണത്തിന് നേതൃത്വം നൽകുന്ന ഡിവൈ.എസ്.പി. വിജയ് പ്രകാശ് അറിയിച്ചു.

പ്രതികളും ആക്രമണത്തിന്റെ രീതിയും

അബ്ദുറഹ്മാൻ്റെ പരിചയക്കാരായ ദീപക്, സുമിത് എന്നിവരുൾപ്പെടെയുള്ളവരാണ് പ്രതിപ്പട്ടികയിലുള്ളത്. സാമുദായികമോ വ്യക്തിവൈരാഗ്യമോ ആകാം ഈ ക്രൂരമായ ആക്രമണത്തിന് പിന്നിലെന്ന് പോലീസ് പ്രാഥമികമായി സംശയിക്കുന്നു. കൊല്ലപ്പെട്ട യുവാവിന് രാഷ്ട്രീയ പാർട്ടി ബന്ധങ്ങളോ ക്രിമിനൽ പശ്ചാത്തലമോ ഇല്ലെന്ന് പോലീസ് സ്ഥിരീകരിച്ചു. അതേസമയം, അക്രമികളുടെ സംഘടനാ ബന്ധങ്ങളെക്കുറിച്ച് വിശദമായ അന്വേഷണം നടന്നുവരികയാണ്. രാജീവി എന്നയാളുടെ വീടിനടുത്ത് പിക്കപ്പ് ലോറിയിൽ നിന്ന് മണൽ ഇറക്കുന്നതിനിടെയാണ് റഹ്മാനും ഇംതിയാസ് ഷാഫിയും ആക്രമിക്കപ്പെട്ടത്. ഇരുവർക്കും പരിചയമുള്ള ദീപക്കും സുമിത്തും ചേർന്ന് റഹ്മാനെ വാഹനത്തിൽ നിന്ന് വലിച്ചിറക്കി വാളുകൾ, കത്തികൾ, ഇരുമ്പ് ദണ്ഡുകൾ എന്നിവ ഉപയോഗിച്ച് അതിക്രൂരമായി ആക്രമിക്കുകയായിരുന്നു. ഈ ആക്രമണം തടയാൻ ശ്രമിച്ച ഷാഫിയുടെ നെഞ്ചിലും പുറകിലും കൈകളിലും കുത്തേറ്റു.

പോലീസ് അന്വേഷണം ഊർജിതമാക്കി

ആക്രമണം നടന്നയുടൻ നാട്ടുകാർ ഓടിക്കൂടിയതോടെ അക്രമികൾ ആയുധങ്ങളുമായി സംഭവസ്ഥലത്ത് നിന്ന് രക്ഷപ്പെട്ടു. ഗുരുതരമായി പരിക്കേറ്റ അബ്ദുൽ റഹ്മാൻ സംഭവസ്ഥലത്ത് വെച്ച് തന്നെ മരണപ്പെട്ടു. ആക്രമണത്തിൽ ഗുരുതരാവസ്ഥയിലായ ഷാഫി ആശുപത്രിയിൽ ചികിത്സയിലാണ്. കേസ് അന്വേഷണത്തിനായി ഡിവൈ.എസ്.പി. വിജയ് പ്രകാശിൻ്റെ നേതൃത്വത്തിൽ അഞ്ച് പോലീസ് സംഘങ്ങളെ രൂപീകരിച്ചിട്ടുണ്ട്. മംഗളൂരു സിറ്റി ക്രൈംബ്രാഞ്ചും ബണ്ട്വാൾ റൂറൽ പോലീസും ചേർന്നാണ് ഈ കൊലപാതക കേസിലെ അന്വേഷണം ഏകോപിപ്പിക്കുന്നത്.

നീതി തേടി ആയിരങ്ങൾ

മംഗളൂരു ദേർളക്കട്ടയിലെ ആശുപത്രിയിൽ പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം അബ്ദുൽ റഹിമാൻ്റെ മൃതദേഹം കുത്താർ മദനി നഗർ ജുമാമസ്ജിദ് ഖബർസ്ഥാനിൽ ആയിരങ്ങളുടെ വിലാപ യാത്രയ്ക്ക് ശേഷം ഖബറടക്കി. വൻ ജനസഞ്ചയം മൃതദേഹം ഏറ്റുവാങ്ങാനും അന്തിമോപചാരം അർപ്പിക്കാനും എത്തിച്ചേർന്നു. അബ്ദുൽ റഹിമാന് നീതി ലഭിക്കണമെന്ന മുദ്രാവാക്യങ്ങൾ ഉയർന്നു.

ഈ വാർത്തയെ കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കൂ. 

Article Summary: Pickup driver murdered in Bantwal, 15 accused. Funeral held with large public presence; investigation ongoing.

#BantwalMurder #AbdulRahiman #MangaluruCrime #KarnatakaPolice #JusticeForRahiman #CrimeNews