Congress | രാമക്ഷേത്ര പ്രതിഷ്ഠ ചടങ്ങുമായി ബന്ധപ്പെട്ട പരസ്യപ്രതികരണത്തിന് കോണ്‍ഗ്രസില്‍ വിലക്ക്; ബി ജെ പിയുടെ അജന്‍ഡയില്‍ വീഴരുതെന്ന് മുന്നറിയിപ്പ്

ന്യൂഡെല്‍ഹി: (KVARTHA) രാമക്ഷേത്ര പ്രതിഷ്ഠ ചടങ്ങുമായി ബന്ധപ്പെട്ട പരസ്യപ്രതികരണത്തിന് കോണ്‍ഗ്രസില്‍ വിലക്ക്. ഇതുസംബന്ധിച്ച നേതാക്കളുടെ പ്രതികരണങ്ങളില്‍ അതൃപ്തി ഉണ്ടായതിനെ തുടര്‍ന്നാണ് ഹൈകമാന്‍ഡ് വിലക്ക് ഏര്‍പ്പെടുത്തിയതെന്നാണ് അറിയുന്നത്. ബി ജെ പിയുടെ അജന്‍ഡയില്‍ വീഴരുതെന്ന് നേതാക്കള്‍ക്ക് നേതൃത്വം മുന്നറിയിപ്പ് നല്‍കിയതായുള്ള വിവരങ്ങളും പുറത്തുവരുന്നുണ്ട്.
അയോധ്യയില്‍ നിര്‍മിച്ച രാമക്ഷേത്രത്തിന്റെ ജനുവരിയില്‍ നടക്കുന്ന പ്രതിഷ്ഠ ചടങ്ങളില്‍ ക്ഷണം സ്വീകരിച്ച് പങ്കെടുക്കണോ വേണ്ടയോ എന്ന കാര്യത്തില്‍ കോണ്‍ഗ്രസ് ഇതുവരെ നിലപാട് വ്യക്തമാക്കിയിട്ടില്ല. കോണ്‍ഗ്രസിന്റെ സംസ്ഥാന ഘടകങ്ങളില്‍ പലതും വിയോജിപ്പ് അറിയിച്ച് രംഗത്തെത്തിയിരുന്നു. വിഷയത്തില്‍ വിവിധ നേതാക്കള്‍ പ്രതികരണവുമായി കഴിഞ്ഞ ദിവസങ്ങളില്‍ രംഗത്തുവരികയും ചെയ്തു.

കേരളത്തിലെ നേതാക്കളും വിഷയത്തില്‍ പ്രതികരണം നടത്തിയിരുന്നു. വിഷയത്തില്‍ കോണ്‍ഗ്രസിന് തീരുമാനിക്കാന്‍ സമയം നല്‍കണമെന്നാണ് ശശി തരൂര്‍ പറഞ്ഞത്. വിഷയത്തില്‍ നിലപാട് സ്വീകരിക്കേണ്ടത് കോണ്‍ഗ്രസ് ഹൈകമാന്‍ഡ് ആണെന്നാണ് കെ പി സി സി അധ്യക്ഷന്‍ കെ സുധാകരന്‍ പ്രതികരിച്ചത്. കോണ്‍ഗ്രസ് പങ്കെടുക്കുമോ എന്ന കാര്യത്തില്‍ കൃത്യ സമയത്ത് ഉത്തരം കിട്ടുമെന്നാണ് കെ സി വേണുഗോപാല്‍ പറഞ്ഞത്.