ഹോക്കിങിന്റെ നിരയിലേക്ക് ഒരു ഇന്ത്യൻ പ്രതിഭ! ഗസ്സയിലെ വംശഹത്യക്കെതിരെയും മോദിക്കെതിരെയും ശബ്ദമുയർത്തിയ ശാസ്ത്രജ്ഞൻ; ഓസ്കാർ ക്ലൈൻ മെഡൽ നേടുന്ന ആദ്യ ഇന്ത്യക്കാരനായ അശോക് സെന്നിനെ അഭിനന്ദിക്കാൻ മടിയോ?

റെജിൻ പോൾ 

ബെംഗളൂരു: (KVARTHA) ഭൗതികശാസ്ത്ര ശാഖയ്ക്ക് നൽകിയ അവിസ്മരണീയമായ സംഭവനകൾ പരിഗണിച്ച്, 2026-ലെ വിശിഷ്ടമായ 'ഓസ്കാർ ക്ലൈൻ മെഡൽ' കരസ്ഥമാക്കി ലോക ഭൗതികശാസ്ത്ര രംഗത്ത് പുതിയൊരു ചരിത്രം കുറിച്ചിരിക്കുകയാണ് ഇന്ത്യക്കാരനായ സൈദ്ധാന്തിക ഭൗതികശാസ്ത്രജ്ഞൻ പ്രൊഫ. അശോക് സെൻ. 

ഈ അപൂർവ അന്താരാഷ്ട്ര ബഹുമതി തേടിയെത്തുന്ന ആദ്യ ഇന്ത്യൻ ശാസ്ത്രജ്ഞനാണ് ബംഗളൂരുവിലെ ഇൻ്റർനാഷണൽ സെന്റർ ഫോർ തിയററ്റിക്കൽ സയൻസസിലെ (ICTS) പ്രൊഫസറായ അശോക് സെൻ. സ്വീഡിഷ് ഭൗതികശാസ്ത്രജ്ഞനായ ഓസ്കാർ ക്ലൈൻ്റെ സ്മരണാർത്ഥം 1988 മുതൽ സ്റ്റോക്ക്‌ഹോം യൂണിവേഴ്സിറ്റിയും റോയൽ സ്വീഡിഷ് അക്കാദമി ഓഫ് സയൻസസിൻ്റെ നോബൽ കമ്മിറ്റിയും സംയുക്തമായാണ് ഈ അവാർഡ് നൽകിവരുന്നത്. 

സ്റ്റീഫൻ ഹോക്കിംഗ്, പീറ്റർ ഹിഗ്ഗ്സ്, സ്റ്റീവൻ വൈൻബെർഗ് തുടങ്ങിയ പ്രതിഭകൾ അലങ്കരിച്ച അതേ നിരയിലാണ് ഇപ്പോൾ പ്രൊഫ. സെന്നിൻ്റെ സ്ഥാനവും അടയാളപ്പെടുത്തപ്പെട്ടിരിക്കുന്നത്. 

ചരിത്ര നേട്ടം

റോയൽ സ്വീഡിഷ് അക്കാദമി ഓഫ് സയൻസസിൻ്റെ നോബൽ സമിതി പ്രഖ്യാപിച്ച ഈ പുരസ്കാരം സ്ട്രിംഗ് തിയറിയിലും ക്വാണ്ടം മേഖലയിലും അദ്ദേഹം നടത്തിയ വിപ്ലവകരമായ ഗവേഷണങ്ങൾക്കുള്ള ആദരവാണ്. അവാർഡ് സ്വീകരണത്തിന്റെ ഭാഗമായി ഒക്ടോബർ 22-ന് സ്റ്റോക്ക്‌ഹോം യൂണിവേഴ്‌സിറ്റിയിലെ അൽബാനോവ സെന്ററിൽ വച്ച് 'ഗ്രാവിറ്റി ഫ്രം സ്ട്രിംഗ്സ് ആൻഡ് സ്ട്രിംഗ്സ് ഫ്രം ഗ്രാവിറ്റി' എന്ന വിഷയത്തിൽ അദ്ദേഹം ഓസ്കാർ ക്ലൈൻ സ്മാരക പ്രഭാഷണം നടത്തുകയുണ്ടായി. 

പ്രപഞ്ചത്തിൻ്റെ അടിസ്ഥാന ഘടനയെക്കുറിച്ചും ഗുരുത്വാകർഷണത്തെ ക്വാണ്ടം തത്ത്വങ്ങളുമായി കൂട്ടിയോജിപ്പിക്കുന്നതിനെക്കുറിച്ചുമുള്ള അദ്ദേഹത്തിന്റെ പ്രബന്ധങ്ങൾ ലോക ശാസ്ത്രരംഗത്ത് വലിയ മാറ്റങ്ങൾക്ക് വഴിതുറന്നവയാണ്.

കൊൽക്കത്തയിലെ പ്രസിഡൻസി കോളേജിലും കൊൽക്കത്ത യൂണിവേഴ്സിറ്റിയിലും കാൺപൂർ ഐഐടിയിലുമായി പഠനം പൂർത്തിയാക്കിയ അശോക് സെൻ, സ്ട്രിംഗ് ഫീൽഡ് തിയറിയിലും തമോഗർത്തങ്ങളുടെ എൻട്രോപ്പി നിർണയത്തിലും ലോകത്തിലെ തന്നെ പ്രമുഖ ഗവേഷകരിൽ ഒരാളാണ്. 

പത്മശ്രീ, പത്മഭൂഷൺ, ഫണ്ടമെന്റൽ ഫിസിക്സ് ബ്രേക്ക്ത്രൂ പ്രൈസ്, ഡിരാക് മെഡൽ തുടങ്ങിയ നിരവധി പരമോന്നത ബഹുമതികൾ മുൻപും അദ്ദേഹത്തെ തേടിയെത്തിയിട്ടുണ്ട്. ഭൗതികശാസ്ത്രത്തിലെ സങ്കീർണമായ സങ്കൽപ്പങ്ങളെ ലളിതവും കൃത്യവുമായ ഗണിതശാസ്ത്ര മാതൃകകളിലൂടെ വ്യക്തമാക്കാൻ അദ്ദേഹത്തിന് കഴിഞ്ഞു.

ഈ അന്താരാഷ്ട്ര നേട്ടം പുറത്തുവന്നതോടെ ലോകമെമ്പാടുമുള്ള ശാസ്ത്ര സമൂഹം പ്രൊഫ. സെന്നിനെ അഭിനന്ദനങ്ങൾ കൊണ്ട് മൂടുകയാണ്. കേന്ദ്ര ഗവൺമെന്റിന്റെ പ്രിൻസിപ്പൽ സയന്റിഫിക് അഡ്വൈസറുടെ ഓഫീസ് സോഷ്യൽ മീഡിയയിലൂടെ പ്രൊഫ. സെന്നിനെ  അഭിനന്ദിച്ചു. 

ശാസ്ത്രീയ പ്രതിബദ്ധത

ശാസ്ത്രീയ ഗവേഷണങ്ങളിൽ മാത്രം ഒതുങ്ങിനിൽക്കുന്ന ഒന്നല്ല പ്രൊഫ. അശോക് സെന്നിൻ്റെ ജീവിതം; മറിച്ച് സമൂഹത്തോടും മാനവികതയോടുമുള്ള കൃത്യമായ നിലപാടുകൾ ഉയർത്തിപ്പിടിക്കുന്ന ഒന്നുകൂടിയാണ്. രാജ്യത്ത് അടുത്തകാലത്തായി കണ്ടുവരുന്ന ശാസ്ത്രീയ ബോധത്തിന്റെ അപചയത്തിനെതിരെയും അസഹിഷ്ണുതയുടെ വളർച്ചയ്‌ക്കെതിരെയും ശബ്ദമുയർത്തിയ പ്രമുഖ ശാസ്ത്രജ്ഞരിൽ പ്രധാനിയാണ് അദ്ദേഹം. 

2015-ൽ നരേന്ദ്ര മോദി സർക്കാരിൻ്റെ ഭരണത്തിൻകീഴിൽ രാജ്യത്ത് യുക്തിചിന്തയും ശാസ്ത്രബോധവും തകർക്കപ്പെടുകയാണെന്ന് ചൂണ്ടിക്കാട്ടി പ്രതിഷേധിച്ച പ്രമുഖ ഭൗതികശാസ്ത്രജ്ഞരുടെ കൂട്ടായ്മയിൽ അശോക് സെന്നും ഒപ്പുവെച്ചിരുന്നു. രാജ്യത്ത് വർദ്ധിച്ചുവരുന്ന വർഗീയതയോടും ശാസ്ത്രവിരുദ്ധമായ പ്രചാരണങ്ങളോടും പ്രധാനമന്ത്രി പുലർത്തുന്ന നിശബ്ദതയെ അന്ന് അശോക് സെന്നും സഹപ്രവർത്തകരും രൂക്ഷമായി വിമർശിച്ചിരുന്നു. 

കേവലം ലാബുകളിൽ പരീക്ഷണങ്ങൾ നടത്തുക മാത്രമല്ല, സ്വതന്ത്രവും അസഹിഷ്ണുതയില്ലാത്തതുമായ ശാസ്ത്രീയ അന്തരീക്ഷം ഉണ്ടാക്കിയെടുക്കൽ ഒരു ശാസ്ത്രജ്ഞൻ്റെ കടമയാണെന്ന് അദ്ദേഹം ഉറച്ചു വിശ്വസിച്ചു. രാജ്യത്തെ അക്കാദമിക് സ്ഥാപനങ്ങളുടെ സ്വയംഭരണാവകാശം സംരക്ഷിക്കപ്പെടണമെന്ന ആവശ്യത്തിലും അദ്ദേഹം എപ്പോഴും മുൻപന്തിയിലുണ്ടായിരുന്നു.

സയൻസ് ആന്റ് റിസർച്ച് മേഖലയിൽ കേന്ദ്രസർക്കാരുകൾ വരുത്തുന്ന ബജറ്റ് വെട്ടിക്കുറയ്ക്കലുകൾക്കെതിരെയും ശാസ്ത്ര സ്ഥാപനങ്ങളിലെ രാഷ്ട്രീയ ഇടപെടലുകൾക്കെതിരെയും തുടർച്ചയായി സംസാരിച്ച വ്യക്തിത്വമാണ് പ്രൊഫ. അശോക് സെൻ. സയൻസ് വ്യാജപ്രചാരണങ്ങൾക്കും രാഷ്ട്രീയ അജണ്ടകൾക്കും കീഴ്പ്പെടരുതെന്ന നിർബന്ധം അദ്ദേഹത്തിനുണ്ടായിരുന്നു. 

ഭരണാധികാരികളുടെ കസേരകളെയോ അധികാരത്തെയോ ഭയപ്പെടാതെ ശാസ്ത്രത്തിന്റെ സത്യസന്ധത വെളിപ്പെടുത്താൻ അദ്ദേഹം എപ്പോഴും ധൈര്യം കാണിച്ചു.

ആഗോള നിലപാടുകൾ

ഇന്ത്യൻ ആഭ്യന്തര രാഷ്ട്രീയത്തിൽ മാത്രമല്ല, അന്താരാഷ്ട്ര തലത്തിലുള്ള നീതിനിഷേധങ്ങൾക്കെതിരെയും അശോക് സെൻ ശബ്ദമുയർത്തിയിട്ടുണ്ട്. ഗസ്സയിലെ ദുരന്തപൂർണമായ മാനുഷിക പ്രതിസന്ധിയിൽ പ്രതിഷേധിച്ച് 2025-ൽ ഐക്യരാഷ്ട്രസഭ സെക്രട്ടറി ജനറൽ ആന്റോണിയോ ഗുട്ടെറസിനും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനും കത്തെഴുതിയ ആഗോള ശാസ്ത്രജ്ഞരുടെ കൂട്ടായ്മയിൽ പ്രൊഫ. അശോക് സെന്നും പങ്കാളിയായിരുന്നു. 

4,000-ത്തിലധികം വരുന്ന ആഗോള ശാസ്ത്രജ്ഞരാണ് അന്ന് പ്രതിഷേധത്തിൽ അണിനിരന്നത്.

ഗസ്സയിൽ വംശഹത്യ മൂലം ദുരിതം അനുഭവിക്കുന്ന ജനങ്ങൾക്ക് ഭക്ഷണവും ആരോഗ്യ സംരക്ഷണവും അടിസ്ഥാന സകര്യങ്ങളും നിഷേധിക്കുന്നത് അങ്ങേയറ്റം ക്രൂരവും സഹിക്കാനാവാത്തതുമാണെന്ന് ഈ നിവേദനത്തിൽ വ്യക്തമാക്കിയിരുന്നു. 

ശാസ്ത്രം കേവലം മനുഷ്യന്റെ സൗകര്യങ്ങൾക്ക് മാത്രമല്ല, മാനവികതയുടെയും ജീവന്റെയും സംരക്ഷണത്തിനാണ് നിലകൊള്ളേണ്ടതെന്ന് ഉച്ചത്തിൽ പ്രഖ്യാപിക്കാൻ അദ്ദേഹത്തിന് യാതൊരു മടിയുമുണ്ടായിരുന്നില്ല.

ഇതിനുപുറമെ, ഇസ്രായേലിൻ്റെയും അമേരിക്കൻ സഖ്യത്തിൻ്റെയും സൈനിക നീക്കങ്ങളിൽ ഇറാന്റെയും ഫലസ്തീന്റെയും ലെബനന്റെയും വിദ്യാഭ്യാസ-ഗവേഷണ സ്ഥാപനങ്ങൾ തകർക്കപ്പെട്ടപ്പോൾ, അതിനെതിരെ രംഗത്തുവന്ന അന്താരാഷ്ട്ര സ്ട്രിംഗ് തിയറി ഗവേഷകരുടെ കൂട്ടായ്മയിലും അദ്ദേഹം നിലപാടെടുത്തു. 

ആക്രമണത്തിന് ഇരയായ സർവകലാശാലകളിലെ അധ്യാപകർക്കും വിദ്യാർത്ഥികൾക്കും പൗരന്മാർക്കും ഐക്യദാർഢ്യം പ്രഖ്യാപിച്ചുകൊണ്ട് പ്രൊഫ. സെൻ പരസ്യ പ്രസ്താവനയിറക്കി. യുദ്ധവും സംഘർഷങ്ങളും ലോകത്തിൻ്റെ അറിവ് നിർമ്മാണത്തെ തകർക്കുകയാണെന്ന് അദ്ദേഹം ഓർമ്മിപ്പിച്ചു.

അന്താരാഷ്ട്ര തലത്തിൽ ഭൗതികശാസ്ത്രത്തിലെ ഏറ്റവും വലിയ പുരസ്കാരങ്ങളിലൊന്ന് നേടി ഒരു ഇന്ത്യൻ ശാസ്ത്രജ്ഞൻ രാജ്യത്തിന് അഭിമാനമായി മാറിയിട്ടും, കേന്ദ്ര ഭരണാധികാരികളുടെ ഭാഗത്തുനിന്നുണ്ടാകുന്ന ഔദ്യോഗിക നിശബ്ദത പ്രകടമാണ്. ഇന്ത്യയുടെ ശാസ്ത്ര സാങ്കേതിക മന്ത്രാലയത്തിന് കീഴിലെ പ്രിൻസിപ്പൽ സയന്റിഫിക് അഡ്വൈസർ പോസ്റ്റിലൂടെ പ്രൊഫ. സെന്നിനെ അഭിനന്ദിച്ചുവെങ്കിലും, പ്രധാനമന്ത്രി നരേന്ദ്ര മോദിയുടെ ഭാഗത്തുനിന്നും ഇനിയും ഒരു ഔദ്യോഗിക കുറിപ്പോ അഭിനന്ദന സന്ദേശമോ പുറത്തുവന്നിട്ടില്ല എന്നത് ശ്രദ്ധേയമാണ്.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Indian physicist Prof Ashoke Sen won the Oskar Klein Medal.

#Kvartha #AshokeSen #OskarKleinMedal #StringTheory #IndianScientist #PhysicsNews #MalayalamNews #SobhaNews