മുംബൈ: (KVARTHA) അനിൽ അംബാനിയുടെ റിലയൻസ് പവർ കമ്പനിക്കും അനുബന്ധ സ്ഥാപനമായ റിലയൻസ് എൻ‌യു ബെസ്സിനുമെതിരെ സോളാർ എനർജി കോർപ്പറേഷൻ ഓഫ് ഇന്ത്യ (Solar Energy Corporation of India-SECI) കർശന നടപടികൾ സ്വീകരിക്കാൻ ഒരുങ്ങുന്നു. വ്യാജ ബാങ്ക് ഗ്യാരണ്ടി സമർപ്പിച്ചതിന് ഈ കമ്പനികൾക്ക്‌ സോളാർ എനർജി കോർപ്പറേഷൻ നോട്ടീസ് അയച്ചിട്ടുണ്ട്. ക്രിമിനൽ നടപടികൾ സ്വീകരിക്കാതിരിക്കാന്‍ കാരണങ്ങള്‍ ഉണ്ടെങ്കില്‍ അറിയിക്കാനുള്ളതാണ് നോട്ടീസ്. 

റിലയൻസ് പവർ സമർപ്പിച്ച ബാങ്ക് ഗ്യാരണ്ടി ഫിലിപ്പീൻസിലെ ഫസ്റ്റ് റാന്‍ഡ് ബാങ്കിന്റെ മനില ശാഖയിൽ നിന്നുള്ളതായാണ് കാണിക്കുന്നത്. എന്നാൽ, വിശദമായ പരിശോധനയിൽ ഫിലിപ്പീൻസിൽ അത്തരമൊരു ശാഖ ഇല്ലെന്ന് ബാങ്കിന്റെ ഇന്ത്യൻ ശാഖ സ്ഥിരീകരിച്ചു. ഈ വ്യാജ രേഖയുടെ അടിസ്ഥാനത്തിൽ, സോളാർ എനർജി കോർപ്പറേഷൻ ഓഫ് ഇന്ത്യ, റിലയൻസ് പവറിനെ ടെൻഡറിൽ നിന്ന് പൂർണ്ണമായും പുറത്താക്കി. സോളാർ എനർജി കോർപ്പറേഷൻ ഓഫ് ഇന്ത്യയുടെ ആരോപണ പ്രകാരം, റിലയൻസ് പവർ ടെൻഡർ നേടുക എന്ന ഒരേയൊരു ലക്ഷ്യത്തോടെ ബോധപൂർവ്വം ഈ വ്യാജ രേഖ സമർപ്പിച്ചു എന്നതാണ്. സംഭവം റിലയൻസ് പവറിന്റെ പ്രതിച്ഛായയെ ഗണ്യമായി ബാധിക്കും. വ്യാജ രേഖ സമർപ്പിച്ചത് ഒരു ഗുരുതരമായ കുറ്റകൃത്യമായാണ് കണക്കാക്കപ്പെടുന്നത്. സോളാർ എനർജി കോർപ്പറേഷൻ ഓഫ് ഇന്ത്യയുടെ ടെൻഡറുകളിൽ പങ്കെടുക്കാൻ മൂന്ന് വർഷത്തേക്ക് റിലയൻസ് പവറിന് അനുമതിയില്ല. 

എന്നാൽ റിലയൻസ് പവർ ഈ ആരോപണങ്ങളെ നിഷേധിച്ചിട്ടുണ്ട്. തങ്ങളുടെ ഭാഗത്ത് നിന്ന് ഒരു തെറ്റും സംഭവിച്ചിട്ടില്ലെന്നും, തേർഡ് പാർട്ടി ഗ്യാരണ്ടറാണ് വ്യാജ രേഖ നൽകിയതെന്നുമാണ് കമ്പനിയുടെ വാദം. ഈ സംഭവത്തിൽ കൂടുതൽ നിയമ നടപടികൾ ഉണ്ടാകാനുള്ള സാധ്യതയുണ്ട്. ഇതുമായി ബന്ധപ്പെട്ട് ഡൽഹി പോലീസ് ക്രിമിനൽ കേസ് രജിസ്റ്റർ ചെയ്തിട്ടുണ്ട്.

#AnilAmbani #ReliancePower #SECI #CorporateFraud #IndiaNews #LegalUpdates