ന്യൂഡൽഹി: (KVARTHA) ദക്ഷിണേഷ്യയിലെ ആദിമ ജനതയുടെ ഉത്ഭവത്തെക്കുറിച്ച് നിരവധി വ്യത്യസ്ത അഭിപ്രായങ്ങൾ നിലവിലുണ്ട്. ഈ സംശയങ്ങൾക്ക് ശാസ്ത്രീയമായ ഉത്തരം കണ്ടെത്താനായി, ഇന്ത്യൻ സർക്കാർ ഒരു വലിയ പഠനം ആരംഭിച്ചിരിക്കുകയാണ്. പുരാതന കാലത്തെ മനുഷ്യരുടെ ജീനുകളും ഇന്നത്തെ ജീനുകളും താരതമ്യം ചെയ്ത്, ദക്ഷിണേഷ്യയിലെ ജനസംഖ്യ എങ്ങനെ രൂപപ്പെട്ടു എന്നറിയാനാണ് ഈ പഠനം ലക്ഷ്യമിടുന്നത്. സാംസ്കാരിക മന്ത്രാലയത്തിന് കീഴിലുള്ള ആന്ത്രോപോളജിക്കൽ സർവേ ഓഫ് ഇന്ത്യയാണ് ഈ പഠനം നടത്തുന്നതെന്ന് ദി ന്യൂ ഇന്ത്യൻ എക്‌സ്പ്രസ് റിപ്പോർട്ട് ചെയ്തു.

ഇന്ത്യയിലെയും പാകിസ്ഥാനിലെയും വിവിധ പുരാവസ്തു സൈറ്റുകളിൽ നിന്ന് ശേഖരിച്ച 300-ലധികം പുരാതന അസ്ഥികൂട അവശിഷ്ടങ്ങൾ, പ്രത്യേകിച്ച് പല്ലുകൾ ഉൾപ്പെടെയുള്ള തലയോട്ടി ഭാഗങ്ങൾ, ആധുനിക ജീനോമിക്‌സ് ഉപയോഗിച്ച് വിശദമായ പഠനത്തിന് വിധേയമാക്കും. സിന്ധു നദീതട സംസ്‌കാര കേന്ദ്രങ്ങളായ ഹാരപ്പ, മോഹൻജൊ-ദാരോ ​​(ഇപ്പോൾ പാക്കിസ്ഥാനിൽ), ബർസഹോം (ജമ്മു കശ്മീർ), നാഗാർജുനകൊണ്ട (ആന്ധ്രപ്രദേശ്), മാസ്കി (കർണാടക), റോപ്പർ (പഞ്ചാബ്), ലോത്തൽ (ഗുജറാത്ത്) എന്നിവിടങ്ങളിൽ സ്വാതന്ത്ര്യത്തിനു മുമ്പും ശേഷവും നടത്തിയ ഖനനങ്ങളിൽ ശേഖരിച്ച അവശിഷ്ടങ്ങൾ ഇതിൽ ഉൾപ്പെടുന്നു. 

1922 മുതൽ 1958 വരെയുള്ള കാലഘട്ടത്തിൽ ആർക്കിയോളജിക്കൽ സർവേ ഓഫ് ഇന്ത്യ കണ്ടെത്തിയ അസ്ഥികൂട അവശിഷ്ടങ്ങൾ പിന്നീട് ഈ പുരാതന അവശിഷ്ടങ്ങളുടെ സംരക്ഷണ ചുമതല വഹിക്കുന്ന ആന്ത്രോപോളജിക്കൽ സർവേ ഓഫ് ഇന്ത്യ (AnSI) യെ ഏൽപ്പിച്ചിരുന്നു. പുരാതന ജീനോം വിവരങ്ങൾ വിശകലനം ചെയ്തുകൊണ്ട്, ദക്ഷിണേഷ്യയിലെ ആദിമ ജനതയുടെ വംശീയ ഉത്ഭവം, വ്യാപനം, ജീവിതരീതി എന്നിവയെക്കുറിച്ചുള്ള പുതിയതും ആഴമേറിയതുമായ ഉൾക്കാഴ്ചകൾ നേടാൻ ലക്ഷ്യമിടുന്നു. 

ജീവിത രീതി പഠിക്കും 

ഡിപ്പാർട്ട്‌മെൻറ് ഓഫ് സയൻസ് ആൻഡ് ടെക്‌നോളജിയുടെ കീഴിൽ പ്രവർത്തിക്കുന്ന ലഖ്‌നൗവിലെ ബീർബൽ സാഹ്‌നി ഇൻസ്റ്റിറ്റ്യൂട്ട് ഓഫ് പാലിയോസയൻസസിന്റെ സഹകരണത്തോടെയാണ് ഈ പദ്ധതി നടപ്പാക്കുന്നത്. ചരിത്രപരമായ വീക്ഷണകോണിൽ നിന്ന്, ഡിഎൻഎ വേർതിരിച്ചെടുത്തുകൊണ്ട് പുരാതന ഇന്ത്യൻ സമൂഹങ്ങളുടെ ഉത്ഭവം പര്യവേക്ഷണം ചെയ്യുകയാണ് ലക്ഷ്യമിടുന്നതെന്ന് അധികൃതർ പറഞ്ഞു. 

പുരാതന കാലത്തെ ആളുകൾ എന്ത് ഭക്ഷിച്ചു, അവർ എങ്ങനെ ജീവിച്ചിരുന്നു, എന്തൊക്കെ രോഗങ്ങൾ അവരെ ബാധിച്ചു, അവർ പ്രകൃതിയോട് എങ്ങനെ ഇടപെട്ടു, അതുപോലെ, അവർ ഒരു സ്ഥലത്തു നിന്ന് മറ്റൊരു സ്ഥലത്തേക്ക് എങ്ങനെയാണ് പോയി താമസിച്ചത് എന്നും അവരുടെ ജീനുകളിൽ എന്തൊക്കെ മാറ്റങ്ങൾ സംഭവിച്ചു എന്നും ഇതിൽ നിന്ന് അറിയാൻ സാധിക്കുമെന്നാണ് പ്രതീക്ഷിക്കുന്നത്.

ആര്യൻ കുടിയേറ്റ സിദ്ധാന്തം 

ആര്യൻ കുടിയേറ്റ സിദ്ധാന്തം ഇന്ത്യൻ ചരിത്രത്തിലെ ഒരു ചർച്ചാ വിഷയമാണ്. പണ്ട് കാലത്ത്, പാശ്ചാത്യ പണ്ഡിതന്മാർ വാദിച്ചിരുന്നത് ആര്യന്മാർ മധ്യേഷ്യയിൽ നിന്ന് ഇന്ത്യയിലേക്ക് കുടിയേറി സംസ്കാരം കൊണ്ടുവന്നു എന്നാണ്. എന്നാൽ ഇന്ത്യൻ പുരാവസ്തു ഗവേഷകർ വാദിക്കുന്നത് ആര്യന്മാർ തദ്ദേശീയരായിരുന്നു എന്നും അവർ സരസ്വതി നദിക്കരയിൽ താമസിച്ചിരുന്നു എന്നുമാണ്.

ഈ നദി വറ്റിയപ്പോൾ, അവർ ഇന്ത്യയിലും മറ്റ് രാജ്യങ്ങളിലും പലയിടങ്ങളിലേക്ക് കുടിയേറി, ഒടുവിൽ സിന്ധു നദീതടത്തിൽ സ്ഥിരതാമസമായി. ഉത്തർപ്രദേശിലെ സിനൗലിയിൽ നടന്ന പുരാവസ്തു ഉത്ഖനനങ്ങൽ ഇതിന് തെളിവായി ചൂണ്ടിക്കാട്ടുന്നു. 4000 വർഷം പഴക്കമുള്ള ഈ സ്ഥലത്ത് നിന്ന് തദ്ദേശീയ യോദ്ധാക്കളുടെയും അവരുടെ ആയുധങ്ങളുടെയും രഥങ്ങളുടെയും അവശേഷങ്ങൾ കണ്ടെത്തിയിട്ടുണ്ട്. ഇത് ആര്യന്മാർ തദ്ദേശീയരായിരുന്നു എന്ന വാദത്തെ ശക്തിപ്പെടുത്തുന്നു. ഈ കണ്ടെത്തലുകളെ അടിസ്ഥാനമാക്കി ചില മാറ്റങ്ങൾ എൻസിഇആർടി പാഠപുസ്തകങ്ങളിൽ അടുത്തിടെ വരുത്തിയിട്ടുണ്ട്.

2025 ഡിസംബറോടെ പൂർത്തിയാകും 

ആര്യൻ കുടിയേറ്റം നടന്നോ ഇല്ലയോ എന്ന ചോദ്യത്തിന് കൃത്യമായ ഉത്തരം കണ്ടെത്തുക എന്നത് ഈ പഠനത്തിന്റെ പ്രധാന ലക്ഷ്യങ്ങളിലൊന്നാണ്. പുരാതന ഇന്ത്യയിലെ ജനസംഖ്യയുടെ വികാസത്തെക്കുറിച്ചുള്ള വ്യക്തമായ ചിത്രം ലഭിക്കുകയും ഇന്ത്യൻ ചരിത്രത്തെക്കുറിച്ചുള്ള നിലവിലുള്ള അറിവ് കൂടുതൽ സമ്പന്നമാക്കുകയും ചെയ്യുക എന്നതാണ് ഈ ഗവേഷണത്തിന്റെ പ്രധാന ലക്ഷ്യം. ആൻഎസ്ഐയും ബീർബൽ സാഹ്‌നി ഇൻസ്റ്റിറ്റ്യൂട്ടും ചേർന്ന് നടത്തുന്ന ഈ പഠനം 2025 ഡിസംബറോടെ പൂർത്തിയാകുമെന്നാണ് പ്രതീക്ഷിക്കുന്നത്.

#ancientDNA #India #IndusValleyCivilization #genetics #archaeology #history