Climbing Stairs | ലിഫ്റ്റിനോടും എസ്കലേറ്ററുകളോടും 'നോ' പറഞ്ഞ് കോണിപ്പടിയിലൂടെ കയറുന്നതും ഇറങ്ങുന്നതും ശീലമാക്കൂ; ആരോഗ്യ ഗുണങ്ങൾ അത്ഭുതപ്പെടുത്തും!

നിങ്ങൾ മണിക്കൂറുകളോളം ഇരുന്നു ജോലി ചെയ്യുന്നവർ ആണെങ്കിൽ വ്യായാമത്തിന് സമയം ലഭിക്കില്ല. ഇതിന് പരിഹാരമായി എസ്കലേറ്ററുകൾക്കും ലിഫ്റ്റിനും ​​പകരം പടികൾ കയറുകയും ഇറങ്ങുകയും ചെയ്യുന്നത് നല്ലതാണ്. മാറിക്കൊണ്ടിരിക്കുന്ന നമ്മുടെ ജീവിതശൈലിയിൽ ആരോഗ്യത്തോടെ തുടരുക എന്നത് ഒരു വലിയ വെല്ലുവിളി തന്നെയാണ്. പണം ചിലവഴിക്കാതെയും സമയമെടുക്കാതെയും നിങ്ങളുടെ ജീവിതശൈലിയിൽ സ്വീകരിക്കാൻ കഴിയുന്ന ഒരു വ്യായാമമാണ് കോണിപ്പടി കയറി ഇറങ്ങുക എന്നത്. പടികൾ കയറുന്നതിൻ്റെ ഗുണങ്ങൾ എന്തൊക്കെയാണെന്ന് നോക്കാം.


ഭാരം കുറയുന്നു

ഒരു മണിക്കൂർ പടികൾ കയറുന്നതും ഇറങ്ങുന്നതും വളരെ തീവ്രമായ വ്യായാമമാണെന്ന് ആരോഗ്യ വിദഗ്ധർ പറയുന്നു. ഒരു പടി കയറുമ്പോൾ ഏകദേശം 0.17 കലോറിയും ഒരു പടി താഴേക്ക് പോകുമ്പോൾ 0.05 കലോറിയും നഷ്ടപ്പെടാം. ദിവസവും അരമണിക്കൂറെങ്കിലും പടികൾ കയറുകയും ഇറങ്ങുകയും ചെയ്യുകയാണെങ്കിൽ, ആവശ്യത്തിന് കലോറി എരിച്ചുകളയുന്നു. ഇത് ക്രമേണ ശരീരഭാരം കുറയ്ക്കാൻ സഹായിക്കുന്നു.


ഹൃദയം ആരോഗ്യത്തോടെയിരിക്കും

പ്രിവൻ്റീവ് മെഡിസിനിൽ പ്രസിദ്ധീകരിച്ച ഒരു പഠനമനുസരിച്ച്, പടികൾ കയറുന്നത് നിങ്ങളുടെ രക്തത്തിലെ ഉയർന്ന സാന്ദ്രതയുള്ള ലിപ്പോപ്രോട്ടീൻ (HDL) അല്ലെങ്കിൽ നല്ല കൊളസ്ട്രോൾ വർധിപ്പിക്കും. ഇത് ശരീരത്തിലെ രക്തചംക്രമണം മെച്ചപ്പെടുത്തുകയും ചെയ്യുന്നു. ഈ പഠനത്തിൽ, ഗവേഷകർ ദിവസവും പടികൾ കയറാനും ഇറങ്ങാനും ശുപാർശ ചെയ്തിട്ടുണ്ട്, കാരണം ഇത് ഹൃദയാരോഗ്യം മെച്ചപ്പെടുത്തുന്നതിനും ഹൃദ്രോഗം അകറ്റി നിർത്തുന്നതിനുമുള്ള നല്ലതും എളുപ്പവുമായ മാർഗമാണ്.


പേശികൾ ശക്തമാകുന്നു

പടികൾ കയറുമ്പോൾ, നിങ്ങളുടെ ശരീരത്തിന് പൂർണ ശക്തി പ്രയോഗിക്കേണ്ടതുണ്ട്, ഇത് പേശികളെ ശക്തിപ്പെടുത്തുന്നു. ഇത്തരത്തിലുള്ള വ്യായാമം വയറിലെ പേശികളെ ടോൺ ചെയ്യുന്നു. കാൽ, തുട, ഇടുപ്പ് പേശികളുടെ ശക്തി വർധിപ്പിക്കാനും ശരീരത്തിൻ്റെ താഴത്തെ ഭാഗങ്ങളിൽ പേശികളെ വളർത്താനും സഹായിക്കും.


നന്നായി ഉറങ്ങാം

നിങ്ങൾക്ക് ഉറക്കമില്ലായ്മയുടെ പ്രശ്നമുണ്ടെങ്കിൽ, കുറച്ച് ദിവസത്തേക്ക് പടികൾ കയറാനും ഇറങ്ങാനും തുടങ്ങുക. നിങ്ങൾ ശാരീരികമായി കൂടുതൽ ക്ഷീണിതരായിരിക്കുകയും കൂടുതൽ ശാരീരിക പ്രവർത്തനങ്ങൾ നടത്തുകയും ചെയ്യുമ്പോൾ, നിങ്ങളുടെ ഉറക്ക പ്രശ്നങ്ങളും പമ്പ കടക്കും.


എല്ലുകളെ ശക്തിപ്പെടുത്തുന്നു

നിങ്ങളുടെ എല്ലുകളിൽ വേദനയുണ്ടെങ്കിൽ, ദിവസവും പടികൾ ഉപയോഗിക്കുന്നത് വേദന കുറയ്ക്കുകയും എല്ലുകളെ ശക്തിപ്പെടുത്തുകയും ചെയ്യും. അസ്ഥികളുടെ സാന്ദ്രത നിലനിർത്താൻ, കാൽസ്യം അടങ്ങിയ ഭക്ഷണങ്ങൾ കഴിക്കുന്നതിനൊപ്പം 15 മിനിറ്റ് പടികൾ ഉപയോഗിക്കുന്നത് സന്ധികളെ വഴക്കമുള്ളതാക്കുകയും സന്ധി വേദന കുറയ്ക്കുകയും ചെയ്യുന്നു. ദിവസവും രണ്ടോ മൂന്നോ നിലകളിലേക്ക് പടികൾ കയറുകയും ഇറങ്ങുകയും ചെയ്യുന്ന ശീലം കുട്ടികളിലും വളർത്തിയെടുക്കണം.


പ്രമേഹത്തിൽ നിന്ന് സുരക്ഷിതരാവാം

പ്രമേഹത്തിൽ നിന്ന് സുരക്ഷിതരാവാനും നിങ്ങൾക്ക് പടികൾ കയറാം. പടികൾ കയറുന്നതും ഇറങ്ങുന്നതും മെറ്റബോളിസം വർധിപ്പിക്കുന്നു, ഇത് പ്രമേഹ സാധ്യത കുറയ്ക്കും. നിങ്ങൾക്ക് ടൈപ്പ്-2 പ്രമേഹമുണ്ടെങ്കിൽ, ഭക്ഷണം കഴിച്ച് കുറച്ച് മിനിറ്റ് പടികൾ കയറുകയും ഇറങ്ങുകയും ചെയ്യുന്നത് ഗുണം ചെയ്യും.


മാനസികാരോഗ്യത്തിന് ഗുണം ചെയ്യും

വ്യായാമം ചെയ്യുന്നത് നിങ്ങളുടെ ശരീരത്തിൽ സന്തോഷകരമായ ഹോർമോണുകൾ പുറപ്പെടുവിക്കുന്നു. പടികൾ കയറുന്നത് നിങ്ങളുടെ ഉള്ളിൽ എൻഡോർഫിൻ ഉത്പാദിപ്പിക്കുകയും നിങ്ങൾക്ക് സുഖം തോന്നുകയും ചെയ്യുന്നു. ഇതുകൂടാതെ, പടികൾ കയറുന്നത് നിങ്ങളുടെ ആരോഗ്യം മെച്ചപ്പെടുത്തുകയും നിങ്ങളെ ഊർജസ്വലനാക്കുകയും ചെയ്യുന്നു. അതിനാൽ നിങ്ങൾ സന്തുഷ്ടരായിരിക്കുകയും മാനസികാരോഗ്യം മികച്ചതായിരിക്കുകയും ചെയ്യുന്നു.


വാർധക്യത്തിൽ പ്രയോജനം

നിങ്ങളുടെ ദിനചര്യയിൽ നിങ്ങൾ ദിവസവും പടികൾ കയറുന്നതിന് മുൻഗണന നൽകിയാൽ, വാർധക്യത്തിൽ വീഴാനോ പരിക്കേൽക്കാനോ ഉള്ള സാധ്യത കുറയുമെന്ന് അലൈഡ് ഡെൻവർ സർവേ അവകാശപ്പെടുന്നു. നിങ്ങൾ എന്തെങ്കിലും ആരോഗ്യ പ്രശ്നങ്ങളോ മറ്റോ നേരിടുന്നുണ്ടെങ്കിൽ കോണിപ്പടികൾ ഉപയോഗിക്കാൻ തുടങ്ങുന്നതിന് മുമ്പ് ഡോക്ടറുടെ അഭിപ്രായം തേടുക.