കേന്ദ്രസർക്കാർ നയങ്ങൾക്കെതിരെ ബുധനാഴ്ച നടക്കുന്ന അഖിലേന്ത്യാ പണിമുടക്ക് ബന്ദായിമാറും; ജനജീവിതം സ്തംഭിക്കും!

കണ്ണൂർ: (KVARTHA) കേന്ദ്രസർക്കാരിന്റെ തൊഴിലാളി വിരുദ്ധ നയങ്ങൾക്കെതിരെ ബി എം എസ് ഒഴികെയുള്ള കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ആഹ്വാനം ചെയ്ത അഖിലേന്ത്യാ പണിമുടക്ക് ബുധനാഴ്ച അർധരാത്രി മുതൽ ആരംഭിക്കും. 

പൊരുതി നേടിയ തൊഴിലവകാശങ്ങൾ കവർന്നെടുക്കാൻ ആരെയും അനുവദിക്കില്ലെന്ന തൊഴിലാളികളുടെ ശക്തമായ താക്കീതായി ഈ പണിമുടക്ക് മാറുമെന്ന് ട്രേഡ് യൂണിയൻ നേതാക്കൾ അറിയിച്ചു. പണിമുടക്ക് ബന്ദായി മാറാൻ സാധ്യതയുണ്ട്.

പണിമുടക്കിന്റെ ഭാഗമായി തിരുവനന്തപുരത്ത് രാജ്ഭവനു മുന്നിലും ജില്ലാ കേന്ദ്രങ്ങളിൽ കേന്ദ്രസർക്കാർ ഓഫീസുകൾക്ക് മുന്നിലും പ്രതിഷേധ കൂട്ടായ്മകളും പ്രകടനങ്ങളും നടത്താൻ തീരുമാനിച്ചിട്ടുണ്ട്. 

രാജ്ഭവനു മുന്നിലുള്ള പ്രതിഷേധം ജൂലൈ ഒൻപതിന് രാവിലെ 10 മണിക്ക് സിഐടിയു സംസ്ഥാന ജനറൽ സെക്രട്ടറി എളമരം കരീം ഉദ്ഘാടനം ചെയ്യും. രാവിലെ മ്യൂസിയം ജങ്ഷനിൽ നിന്ന് പ്രകടനമായാണ് രാജ്ഭവനു മുന്നിലേക്ക് എത്തുക.

ജൂലൈ ഒൻപത് അർധരാത്രി മുതൽ ജൂലൈ 10 അർധരാത്രി വരെ 24 മണിക്കൂറാണ് പണിമുടക്ക്. സിഐടിയു, ഐഎൻടിയുസി, എൻഎൽയു, കെടിയുസി എസ്, കെടിയുസി എം, ഐഎൻഎൽസി, എൻടിയുഐ, എച്ച്എംകെപി, എഐടിയുസി, എൽപിഎഫ്, യുടിയുസി, എച്ച്എംഎസ്, സേവ, ടിയുസിഐ, എൻഎൽസി, ടിയുസിസി, ജെഎൽയു എന്നീ സംഘടനകളാണ് പണിമുടക്കിൽ പങ്കെടുക്കാൻ നോട്ടീസ് നൽകിയിട്ടുള്ളത്.

കർഷകരും കർഷകത്തൊഴിലാളികളും, കേന്ദ്ര-സംസ്ഥാന സർക്കാർ ജീവനക്കാരും, അധ്യാപകരും, പൊതുമേഖലാ ജീവനക്കാരും, ബാങ്കിങ്, ഇൻഷുറൻസ് ജീവനക്കാരും പണിമുടക്കിൽ പങ്കെടുക്കുമെന്ന് അറിയിച്ചിട്ടുണ്ട്. ഇതോടെ ജനജീവിതം സ്തംഭിക്കുമെന്ന് ഉറപ്പായി.

വിലക്കയറ്റം തടയുക, ലേബർ കോഡുകൾ പിൻവലിക്കുക, പൊതുമേഖലാ ഓഹരി വിൽപന അവസാനിപ്പിക്കുക, മിനിമം വേതനം 26,000 രൂപയായും പെൻഷൻ 9000 രൂപയായും നിശ്ചയിക്കുക, സ്കീം വർക്കർമാരെ തൊഴിലാളികളായി അംഗീകരിക്കുക തുടങ്ങിയ ആവശ്യങ്ങൾ ഉന്നയിച്ചാണ് ഈ പൊതുപണിമുടക്ക്. 

കേരളം, തമിഴ്നാട്, കർണാടക ഉൾപ്പെടെ പ്രതിപക്ഷ പാർട്ടികൾ ഭരിക്കുന്ന സംസ്ഥാനങ്ങളിൽ പണിമുടക്ക് ബന്ദായി മാറി ജനജീവിതം സ്തംഭിപ്പിക്കുമെന്നും മുന്നറിയിപ്പുണ്ട്.

ബുധനാഴ്ച നടക്കുന്ന പണിമുടക്കിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക 

Article Summary: Nationwide strike on Wednesday against central policies to paralyze public life.

#AllIndiaStrike #BharatBandh #TradeUnionStrike #CentralGovernmentPolicies #LaborRights #IndiaProtest