അമിതവണ്ണം; എയര്‍ ഇന്ത്യ ജീവനക്കാരെ പിരിച്ചുവിടാനൊരുങ്ങുന്നു

ന്യൂഡല്‍ഹി: (www.kvartha.com 14.09.2015) അമിതഭാരമുള്ള ജീവനക്കാരെ എയര്‍ ഇന്ത്യ ജോലിയില്‍ നിന്ന് പിരിച്ചുവിടാനൊരുങ്ങുന്നു. ഡയറക്ടര്‍ ഓഫ് സിവില്‍ ഏവിയേഷന്റെ മാനദണ്ഡങ്ങള്‍ പാലിക്കാത്ത എയര്‍ഹോസ്റ്റസുമാര്‍ ഉള്‍പ്പെടെയുള്ള 125 കാബിന്‍ ക്രൂ ജീവനക്കാരെയാണ് പിരിച്ചുവിടാന്‍ നോക്കുന്നത്. ഇതില്‍ ചിലര്‍ക്ക് വിമാനത്താവളത്തില്‍ തന്നെ ജോലി നല്‍കാനും ചിലരെ സ്വയം വിരമിക്കലിലൂടെ പിരിച്ചയക്കാനുമാണ് എയര്‍ ഇന്ത്യയുടെ തീരുമാനം.

ഭാരം കുറയ്ക്കണമെന്നാവശ്യപ്പെട്ട് എയര്‍ ഇന്ത്യ നേരത്തേ ജീവനക്കാര്‍ക്ക് നിര്‍ദേശം നല്‍കിയിരുന്നു. എന്നാല്‍ ഇത് പാലിക്കാന്‍ തയ്യാറാകാത്തവരെയാണ് ഇപ്പോള്‍ നീക്കാനൊരുങ്ങുന്നത്. അമിതവണ്ണമുള്ളവരെ കാബിന്‍ ക്രൂവായി പരിഗണിക്കാനാവില്ലെന്ന് ഏവിയേഷന്‍ അധികൃതര്‍ നേരത്തേ വ്യക്തമാക്കിയിരുന്നു. പൊതുമേഖലാസ്ഥാപനമായ എയര്‍ ഇന്ത്യക്ക് 3,500 കാബിന്‍ ക്രൂ ജീവനക്കാരാണ് ഇപ്പോഴുള്ളത്. ഇതില്‍ 2,200 പേര്‍ കരാര്‍ ജോലിക്കാരാണ്.

ശരീരഭാരം സംബന്ധിച്ച് പുരുഷന്‍മാര്‍ക്ക് 18 മുതല്‍ 25 വരെ ബി.എം.ഐയും സ്ത്രീകള്‍ക്ക് 18 മുതല്‍ 22 വരെ ബി.എം.ഐയുമാണ് ഡയറക്ടര്‍ ഓഫ് സിവില്‍ ഏവിയേഷന്‍ നിഷ്‌കര്‍ഷിച്ചിരിക്കുന്ന മാനദണ്ഡം.