IANS | വാര്‍ത്താ ഏജന്‍സിയായ ഐഎഎന്‍എസും അദാനിയുടെ കൈകളിലേക്ക്; ഭൂരിഭാഗം ഓഹരികളും സ്വന്തമാക്കി

ന്യൂഡെല്‍ഹി: (KVARTHA) വാര്‍ത്താ ഏജന്‍സി ഐഎഎന്‍എസ് ഇന്‍ഡ്യ പ്രൈവറ്റ് ലിമിറ്റഡിന്റെ ഭൂരിഭാഗം ഓഹരികളും സ്വന്തമാക്കി ഗൗതം അദാനി ഗ്രൂപ്. റെഗുലേറ്ററി ഫയലിംഗില്‍ അദാനി എന്റര്‍പ്രൈസസ് അനുബന്ധ സ്ഥാപനമായ എഎംജി മീഡിയ നെറ്റ് വര്‍ക് ലിമിറ്റഡ് (AMNL), ഐഎഎന്‍എസ് ഇന്‍ഡ്യ പ്രൈവറ്റ് ലിമിറ്റഡിന്റെ ഓഹരി ഷെയറുകള്‍ ഉള്‍പെടെ 50 ശതമാനം ഓഹരികള്‍ ഏറ്റെടുത്തതായുള്ള റിപോര്‍ടുകളാണ് പുറത്തുവരുന്നത്. എന്നാല്‍ എത്ര തുകയ്ക്കാണ് കരാര്‍ എന്ന് കംപനി വെളിപ്പെടുത്തിയിട്ടില്ല.
എഎംഎന്‍എല്‍ വഴിയാണ് അദാനി, ഓഹരികള്‍ വാങ്ങിയതെന്നാണ് റിപോര്‍ട്. ഐഎഎന്‍എസിന്റെ ഓഹരി ഉടമയായ സന്ദീപ് ബാംസായിയുമായി എഎംഎന്‍എല്‍ ഓഹരി ഉടമകളുടെ കരാറില്‍ ഒപ്പുവച്ചു. ഐഎഎന്‍എസിന്റെ പ്രവര്‍ത്തനവും മാനേജമെന്റ് നിയന്ത്രണവും ഇനി എ എം എന്‍ എലിന് ആയിരിക്കും, ഏജന്‍സിമാരുടെ ഡയറക്ടര്‍മാരെ നിയമിക്കാനുള്ള അവകാശം എ എം എന്‍ എലിനായിരിക്കുമെന്നും റിപോര്‍ട് പറയുന്നു.

ബിസിനസ്, ഫിനാന്‍ഷ്യല്‍ ന്യൂസ് ഡിജിറ്റല്‍ മീഡിയ പ്ലാറ്റ് ഫോമായ ബിക്യു പ്രൈം കൈകാര്യം ചെയ്യുന്ന ക്വിന്റില്യണ്‍ ബിസിനസ് മീഡിയയെ ഏറ്റെടുത്ത് കഴിഞ്ഞ വര്‍ഷം മാര്‍ചില്‍ അദാനി ഈ രംഗത്തേക്ക് ചുവടുവച്ചിരുന്നു. ഇതിന് പിന്നാലെയാണ് ഡിസംബറില്‍ എന്‍ഡിടിവിയുടെ 65 ശതമാനം ഓഹരികളും ഏറ്റെടുത്തത്. ഇപ്പോള്‍ ഐഎഎന്‍എസും സ്വന്തം. 2023 സാമ്പത്തിക വര്‍ഷത്തില്‍ ഐഎഎന്‍എസിന്റെ വിറ്റുവരവ് 11.86 കോടി രൂപയായിരുന്നു.

മുകളില്‍ പ്രസ്താവിച്ച പ്രകാരം ഏറ്റെടുക്കല്‍ അനുസരിച്ച്, ഐഎഎന്‍എസ് ഇപ്പോള്‍ എഎംഎന്‍എല്‍- ന്റെ ഒരു അനുബന്ധ സ്ഥാപനമാണ്. ഒരു ഒന്നാം തലമുറ സംരംഭകനായ അദാനി 1988-ല്‍ ഒരു ചരക്ക് വ്യാപാരിയായാണ് തുടങ്ങിയത്.