Vijay & BJP | തമിഴക രാഷ്ട്രീയത്തില്‍ ബിജെപിക്ക് വഴിവെട്ടുമോ വിജയ്? കാത്തിരുന്ന് കുരുക്കാന്‍ അണ്ണാമലൈയും കൂട്ടരും

എന്നാല്‍ ദ്രാവിഡ രാഷ്ട്രീയം പറയാതെ പൊതുവിഷയങ്ങള്‍ ഊന്നുന്ന വിജയിയുടെ പാര്‍ട്ടിയുമായി തങ്ങള്‍ക്ക് ഒത്തുപോകാന്‍ കഴിയുമെന്നാണ് അണ്ണാമലൈ നേതൃത്വം നല്‍കുന്ന തമിഴ്‌നാട്ടിലെ ബി.ജെ.പി കരുതുന്നത്. വിജയിയുടെ പാര്‍ട്ടിയെ പൂര്‍ണമായി സ്വാഗതം ചെയ്ത പാര്‍ട്ടികളിലൊന്ന് ബി.ജെ.പിയാണ്. ഞങ്ങളുടെ സഹോദരനെന്നാണ് അണ്ണാമലൈ വിജയിയെ വിശേഷിപ്പിച്ചത്. വരുംകാലങ്ങളില്‍ എന്‍.ഡി.എയ്‌ക്കൊപ്പം വിജയുമുണ്ടാകുമെന്നും തമിഴ് നാട്ടിലെ ദ്രാവിഡ രാഷ്ട്രീയപാര്‍ട്ടികള്‍ തൂത്തെറിയപ്പെടുമെന്നും ബി.ജെ.പി കരുതുന്നുണ്ട്.

നേരത്തെ വിജയിയും തമിഴ്‌നാട്ടിലെ ബി.ജെ.പി നേതാക്കളുമായുളള ഉരസലും പിണക്കങ്ങളും സഖ്യസാധ്യതയ്ക്കു കല്ലുകടിയായിട്ടുണ്ട്. തമിഴ് ജനതയെ ചൂഷണം ചെയ്യുന്ന അഴിമതി രാഷ്ട്രീയക്കാരെ ഇല്ലാതാക്കുമെന്നു പറയുന്ന ബി.ജെ.പി വിജയിയെ സ്വാഗതം ചെയ്തിട്ടുണ്ടെങ്കിലും ഇളയദളപതി അനുകൂലമായി പ്രതികരിച്ചിട്ടില്ല. നിഷ്പക്ഷ സത്യസന്ധ രാഷ്ട്രീയത്തിലേക്കുളള ബി.ജെ.പിയുടെ ക്ഷണം സ്വീകരിക്കാതെ തനിയെയുളള പോരാട്ടവും അസ്ഥിതിത്വവുമാണ് ഇപ്പോള്‍ വിജയിയുടെ തമിഴ് വെട്രി കഴകം.

അതേസമയം വരും കാലങ്ങളില്‍ വിജയ് രാഷ്ട്രീയ ചങ്ങാത്തമുണ്ടാക്കാന്‍ സാധ്യതയുളള പാര്‍ട്ടികളിലൊന്ന് ബി.ജെ.പി തന്നെയാണ്. പ്രത്യക്ഷമായി ബി.ജെ.പിയുമായി ഏറ്റുമുട്ടാന്‍ പോയിട്ടില്ല വിജയ്. എന്നാല്‍ പലഘട്ടങ്ങളിലും ബി.ജെ.പിനേതാക്കളുടെ ഭീഷണിയും പ്രതിഷേധങ്ങളും നേരിടേണ്ടി വന്നിട്ടുണ്ട്. മെര്‍സില്‍ സിനിമയില്‍ ജി.എസ്.ടി, ഡിജിറ്റല്‍ ഇന്ത്യ പരാമര്‍ശങ്ങളാണ് ബി.ജെ.പിയെ ചൊടിപ്പിച്ചത്. എന്നാല്‍ നേരിട്ടു തന്റെ സിനിമയിലൂടെ വിജയ്‌സംഘ്പരിവാര്‍ രാഷ്ട്രീയത്തെയോ നരേന്ദ്രമോദിയെയോ ആക്രമിച്ചിട്ടില്ല. അതുകൊണ്ട് തന്നെ വിജയിയെ ബി.ജെ.പി കേന്ദ്രനേതൃത്വം എതിരാളിയായി കാണുന്നേയില്ല.