മുംബൈ: (KVARTHA) തന്റെ തോക്ക് പരിശോധിക്കുന്നതിനിടയിൽ അബദ്ധത്തിൽ കാലിൽ വെടിയേറ്റ ബോളിവുഡ് നടൻ ഗോവിന്ദയെ മുംബൈയിലെ ആശുപത്രിയിൽ നിന്ന് ഡിസ്ചാർജ് ചെയ്തു.

കഴിഞ്ഞ ചൊവ്വാഴ്ച പുലർച്ചെ പുറത്തിറങ്ങാൻ തയ്യാറെടുക്കുമ്പോൾ ലൈസൻസുള്ള തന്റെ റിവോൾവർ പരിശോധിക്കുന്നതിനിടെയാണ് താരത്തിന് വെടിയേറ്റത്. മുംബൈയിലെ ഒരു പ്രമുഖ ആശുപത്രിയിലെ തീവ്രപരിചരണ വിഭാഗത്തിൽ താരത്തെ പ്രവേശിപ്പിച്ചു. ഏകനാഥ് ഷിൻഡെയുടെ നേതൃത്വത്തിലുള്ള ശിവസേന അംഗമായ താരം, ഉടൻ തന്നെ ശസ്ത്രക്രിയയ്ക്ക് വിധേയനായിരുന്നു.

നാല് ദിവസത്തെ ചികിത്സയ്ക്ക് ശേഷം, വെള്ളിയാഴ്ച ഗോവിന്ദ ആശുപത്രി വിട്ടു. ഭാര്യ സുനിത അഹൂജയ്ക്കും മകൾ ടീനയ്ക്കുമൊപ്പം ആശുപത്രിയിൽ നിന്ന് വീട്ടിലേക്ക് മടങ്ങാനെത്തിയ നടൻ മാധ്യമപ്രവർത്തകരെയും ആരാധകരെയും അഭിവാദ്യം ചെയ്തു.

‘എന്നെ സ്‌നേഹിക്കുന്ന മാധ്യമപ്രവർത്തകർക്കും അധികാരികള്‍ക്കും ആരാധകർക്കും ഞാൻ നന്ദി പറയുന്നു.’ ഗോവിന്ദ പറഞ്ഞു. ഗോവിന്ദയ്ക്ക് ആറാഴ്ചയെങ്കിലും വിശ്രമം നിർദ്ദേശിച്ചിട്ടുണ്ടെന്ന് സുനിത അഹൂജ മാധ്യമപ്രവർത്തകരോട് പറഞ്ഞു.

 #Govinda #Bollywood #Gunshot #HealthUpdate #Mumbai #ActorNews