ഭര്‍ത്താവ് അശ്ലീല ചിത്രങ്ങള്‍ക്ക് അടിമ, ദാമ്പത്യ ബന്ധം തകര്‍ച്ചയില്‍; പോണ്‍ സൈറ്റുകള്‍ പൂര്‍ണമായും നിരോധിക്കണമെന്നാവശ്യപ്പെട്ട് സുപ്രീംകോടതിയില്‍ 27കാരിയുടെ പരാതി

ന്യൂഡല്‍ഹി: (www.kvartha.com 16.02.2018) അശ്ലീല വെബ് സൈറ്റുകള്‍ ഇന്ത്യയില്‍ പൂര്‍ണമായും നിരോധിക്കണമെന്ന് ആവശ്യപ്പെട്ട് 27കാരിയായ മുംബൈ സ്വദേശിനി സുപ്രീം കോടതിയില്‍ ഹര്‍ജി സമര്‍പ്പിച്ചു. തന്റെ ഭര്‍ത്താവ് പോണ്‍ സൈറ്റുകള്‍ക്ക് അടിമയാണെന്നും ഇതുമൂലം ദാമ്പത്യ ബന്ധം തകര്‍ച്ചയുടെ വക്കിലാണെന്നും ചൂണ്ടിക്കാട്ടിയാണ് യുവതി ഹര്‍ജിയുമായി സുപ്രീം കോടതിയെ സമീപിച്ചത്.

അശ്ലീല വെബ് സൈറ്റുകളിലെ ചിത്രങ്ങള്‍ങ്ങള്‍ക്ക് അടിമയായ തന്റെ ഭര്‍ത്താവ് ലൈംഗിക വൈകൃതങ്ങള്‍ പ്രകടിപ്പിക്കുന്നതായി യുവതി ഹര്‍ജിയില്‍ ചൂണ്ടിക്കാണിച്ചിട്ടുണ്ട്. ഇതുമൂലം ദാമ്പത്യ ജീവിതത്തിലെ പല കാര്യങ്ങളിലും ഭര്‍ത്താവ് തന്നെ അവഗണിക്കുകയാണെന്നും വിവാഹ ബന്ധം ഏതു നിമിഷവും തകരുമെന്നും യുവതി ഹര്‍ജിയില്‍ പറയുന്നുണ്ട്. തന്റെ ഭര്‍ത്താവ് കൂടുതല്‍ സമയവും ചിലവഴിക്കുന്നത് അശ്ലീല ചിത്രങ്ങള്‍ കാണാന്‍ വേണ്ടിയാണെന്നും യുവതി കോടതിയെ അറിയിച്ചു.


2013ല്‍ ഓണ്‍ലൈന്‍ പോണോഗ്രഫി നിരോധിക്കണമെന്ന് ആവശ്യപ്പെട്ട് ഹര്‍ജി സമര്‍പ്പിച്ച അഭിഭാഷകന്‍ കമലേഷ് വാസ്വാനി മുഖേനയാണ് യുവതി സുപ്രീം കോടതിയെ സമീപിച്ചത്. ഉഭയസമ്മത പ്രകാരമുള്ള വിവാഹമോചനത്തിന് ഭര്‍ത്താവ് നിര്‍ബന്ധിക്കുന്നതായും ഇതിനോടകം തന്നെ കുടുംബ കോടതിയെ സമീപിച്ചതായും യുവതി പറഞ്ഞു.