Train Firing | ഓടുന്ന ട്രെയിനിൽ 4 പേരെ വെടിവെച്ച് കൊന്ന സംഭവത്തിൽ 2 ആർപിഎഫ് ഉദ്യോഗസ്ഥരെ സർവീസിൽ നിന്ന് പിരിച്ചുവിട്ടു; 'ചുമതല നിർവഹിക്കുന്നതിൽ പരാജയപ്പെട്ടു'; പ്രതി ജയിലിൽ തന്നെ; കുറ്റപത്രത്തിൽ ചുമത്തിയിരിക്കുന്നത് വിദ്വേഷ കുറ്റങ്ങളടക്കം

  
'യാത്രക്കാർക്ക് സുരക്ഷയും സംരക്ഷണവും നൽകേണ്ടത് ഡ്യൂട്ടിയിലുള്ള കുറ്റാരോപിതരായ കോൺസ്റ്റബിൾമാരുടെ ഉത്തരവാദിത്തമായിരുന്നു. എന്നിരുന്നാലും, അവർ അത് ചെയ്യുന്നതിൽ പരാജയപ്പെട്ടു. ആരോപണവിധേയരായ കോൺസ്റ്റബിൾമാരുടെ പ്രവൃത്തി യാത്രക്കാർക്കിടയിൽ ആർപിഎഫിനോടുള്ള വിശ്വാസം ഇല്ലാതാക്കുകയും സേനയിലെ മറ്റ് അംഗങ്ങൾക്കിടയിൽ അച്ചടക്കമില്ലായ്മയെക്കുറിച്ച് തെറ്റായ സന്ദേശം നൽകുകയും ചെയ്യും', രണ്ട് കോൺസ്റ്റബിൾമാരുടെ പിരിച്ചുവിടൽ ഉത്തരവിൽ പറയുന്നു.

നേരത്തെ സർവീസിൽ നിന്ന് പിരിച്ചുവിട്ട, കേസിലെ പ്രതി ചേതൻ സിങ്‌ ചൗധരി ഇപ്പോൾ അകോള ജയിലിലാണുള്ളത്. ട്രെയിനിലെ ബി-5 കോച്ചിൽ വെച്ചാണ് ചേ​ത​ൻ സി​ങ്ങ് തന്‍റെ മേലുദ്യോഗസ്ഥനായ എഎസ്ഐ ടിക്കാറാം മീണയെ വെടിവെച്ചു കൊന്നത്. തുടർന്ന് അടുത്തുള്ള കോച്ചുകളിലേക്ക് പോയ ഇയാൾ അസ്ഗർ അബ്ബാസ് ശൈഖ് (48), അബ്ദുൽ ഖാദർ മുഹമ്മദ് ഹുസൈൻ ഭൻപുർവാല (64), സയ്യിദ് സൈഫുല്ല (40) എന്നീ യാത്രക്കാരെയും കാരണമില്ലാതെ കൊലപ്പെടുത്തുകയായിരുന്നുവെന്നാണ് കേസ്.

നാല് പേരെ കൊലപ്പെടുത്തിയ ശേഷം ഇയാൾ വിദ്വേഷ പരാമർശങ്ങൾ നടത്തിയെന്നും ആരോപണമുണ്ട്. സംഭവത്തിൻ്റെ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലായിരുന്നു. 39 ദൃക്സാക്ഷികളുടെ വിവരങ്ങളടങ്ങിയ 1,097 പേജുള്ള കുറ്റപത്രമാണ് ബോറിവലി ജിആർപി ഉദ്യോഗസ്ഥർ ചൗധരിക്ക് എതിരെ സമർപ്പിച്ചിരിക്കുന്നത്. ഐപിസി സെക്ഷൻ 302 (കൊലപാതകം), 153 എ (മതം, വംശം, ജന്മസ്ഥലം, താമസസ്ഥലം എന്നിവയുടെ അടിസ്ഥാനത്തിൽ വിവിധ വിഭാഗങ്ങൾക്കിടയിൽ ശത്രുത വളർത്തൽ) തുടങ്ങിയ വകുപ്പുകളാണ് ചുമത്തിയിരിക്കുന്നത്.