കൊച്ചി: (KVARTHA) യാക്കോബായ സുറിയാനി ക്രിസ്ത്യാനി സഭയുടെ പുതിയ ശ്രേഷ്ഠ കാതോലിക്കാ ബാവയായി ജോസഫ് മാർ ഗ്രിഗോറിയോസ് ലബനനിൽ നടക്കുന്ന ചടങ്ങിൽ സ്ഥാനമേൽക്കുകയാണ്. സഭയുടെ പരമാധ്യക്ഷൻ ഇഗ്നാത്തിയോസ് അഫ്രേം രണ്ടാമൻ പാത്രിയർക്കീസ് ബാവയുടെ മുഖ്യ കാർമികത്വത്തിൽ ലബനനിലെ അച്ചാനെയിലെ സെന്റ് മേരീസ് പാത്രിയർക്കാ കത്തീഡ്രലിൽ വെച്ച് നടക്കുന്ന സ്ഥാനാരോഹണ ശുശ്രൂഷയിൽ മോർ ഗ്രിഗോറിയോസ് ജോസഫ്, മോർ ബസേലിയോസ് ജോസഫ് ഒന്നാമൻ എന്ന പുതിയ നാമം സ്വീകരിക്കും.

സംസ്ഥാന സർക്കാരിനെ പ്രതിനിധീകരിച്ച് വ്യവസായ മന്ത്രി പി രാജീവിൻ്റെ നേതൃത്വത്തിലുള്ള ഏഴംഗ സംഘം ലബനനിൽ എത്തിച്ചേർന്നിട്ടുണ്ട്. എംഎൽഎമാരായ അനൂപ് ജേക്കബ്, ഇ.ടി. ടൈസൺ മാസ്റ്റർ, എൽദോസ് പി. കുന്നപ്പിള്ളി, ജോബ് മൈക്കിൾ, പി.വി. ശ്രീനിജിൻ, പ്രിൻസിപ്പൽ സെക്രട്ടറി എ.പി.എം. മുഹമ്മദ് ഹനീഷ് എന്നിവരാണ് സംഘത്തിൽ. കേന്ദ്ര സർക്കാരിനെ പ്രതിനിധീകരിച്ച് മുൻ മന്ത്രി വി. മുരളീധരൻ്റെ നേതൃത്വത്തിലുള്ള സംഘവും ചടങ്ങിൽ പങ്കെടുക്കുന്നു. 

ആരാണ് ജോസഫ് മാർ ഗ്രിഗോറിയോസ്?

മുളന്തുരുത്തി പെരുമ്പിള്ളി ശ്രാമ്പിക്കൽ പള്ളത്തിട്ടയിൽ വർഗീസിൻ്റെയും സാറാമ്മയുടെയും മകനായി 1960 നവംബർ 10നാണ് ജോസഫ് മാർ ഗ്രഗോറിയോസിൻ്റെ ജനനം. മുളന്തുരുത്തി മാർത്തോമൻ കത്തീഡ്രലിലായിരുന്നു മാമോദീസ. പെരുമ്പിള്ളി പ്രൈമറി സ്‌കൂളിലും മുളന്തുരുത്തി ഹൈസ്‌കൂളിലുമായി സ്കൂൾ വിദ്യാഭ്യാസം പൂർത്തിയാക്കിയ അദ്ദേഹം പതിമൂന്നാം വയസ്സിൽ മഞ്ഞനിക്കര ദയറായിൽ ഗീവറുഗീസ് മാർ ഗ്രീഗോറിയോസ് മെത്രാപ്പോലീത്തയിൽനിന്ന് ശെമ്മാശപട്ടം സ്വീകരിച്ചു. പെരുമ്പിള്ളി മോർ യൂലിയോസ് സെമിനാരിയിൽ വൈദിക പഠനം പൂർത്തിയാക്കി.

മികച്ച വിദ്യാഭ്യാസവും ആഗോളതലത്തിലുള്ള അനുഭവവും

എറണാകുളം മഹാരാജാസ് കോളജിൽനിന്ന് സാമ്പത്തിക ശാസ്ത്രത്തിൽ ബിരുദവും അയർലൻഡിലെ സെൻ്റ് പാട്രിക് കോളജിൽനിന്ന് വേദശാസ്ത്രത്തിൽ ബിരുദവും ഡബ്ളിൻ യൂണിവേഴ്‌സിറ്റിയിൽ നിന്ന് എംഫിലും, യു.എസിൽനിന്ന് ക്ലീനിക്കൽ പാസ്‌റ്ററൽ ആൻഡ് കൗൺസിലിങ്ങിൽ ഡിപ്ലോമയും അദ്ദേഹം നേടിയിട്ടുണ്ട്. 1984 മാർച്ച് 25ന് മാർ ബസേലിയോസ് പൗലൂസ് രണ്ടാമൻ ബാവാ അദ്ദേഹത്തെ കശ്ശീശാ പദവിയിലേക്ക് ഉയർത്തി. 

1984 മുതൽ നാല് വർഷം ബെംഗളൂരു സെന്റ് മേരീസ് പള്ളിയിൽ വികാരിയായി സേവനമനുഷ്ഠിച്ചു. ഉപരിപഠനത്തിനായി യുഎസിൽ ആയിരുന്നപ്പോൾ വിവിധ ദേവാലയങ്ങളിൽ ശുശ്രൂഷകൾ നടത്തി. ഇംഗ്ലണ്ടിലെ സെൻ്റ് തോമസ് സിറിയൻ ഓർത്തഡോക്സ് പള്ളി സ്ഥാപിക്കുകയും അവിടെ അഞ്ചുവർഷം വികാരിയായി സേവനം ചെയ്യുകയും ചെയ്തു.

എക്യുമെനിക്കൽ വേദികളിൽ സഭയുടെ പ്രതിനിധിയായും നിലയ്ക്കൽ എക്യുമെനിക്കൽ ട്രസ്‌റ്റിയായും അദ്ദേഹം പ്രവർത്തിക്കുന്നു. ഗൾഫ്-യൂറോപ്യൻ ഭദ്രാസനങ്ങളുടേയും, കൊല്ലം-തുമ്പമൺ-നിരണം, തൃശൂർ, മലബാർ ഭദ്രാസനങ്ങളുടേയും, അങ്കമാലി ഭദ്രാസനത്തിൽ വിവിധ മേഖലകളുടെയും ചുമതല അദ്ദേഹം വഹിച്ചിട്ടുണ്ട്. ബസേലിയോസ് തോമസ് പ്രഥമൻ ബാവ സ്ഥാനമൊഴിഞ്ഞതിനെ തുടർന്ന് 2019 ഓഗസ്റ്റിൽ സഭയുടെ മെത്രാപ്പോലീത്തൻ ട്രസ്റ്റിയായി തിരഞ്ഞെടുക്കപ്പെട്ടു.  

യാക്കോബായ സഭ

കേരളത്തിലെ ഏറ്റവും പഴക്കംചെന്ന ക്രൈസ്തവ വിഭാഗങ്ങളിൽ ഒന്നാണ് യാക്കോബായ സുറിയാനി ക്രിസ്ത്യാനി സഭ. തോമാശ്ലീഹായിലൂടെ സ്ഥാപിതമായി എന്ന് വിശ്വസിക്കപ്പെടുന്ന ഈ സഭ, കിഴക്കിന്റെ കാതോലിക്കോസ് എന്നറിയപ്പെടുന്ന അന്ത്യോഖ്യാ പാത്രിയർക്കീസിന്റെ കീഴിലാണ്. നൂറ്റാണ്ടുകളായി കേരളത്തിന്റെ സാമൂഹിക സാംസ്കാരിക രംഗങ്ങളിൽ ഈ സഭയ്ക്ക് വലിയ സ്വാധീനമുണ്ട്. പാരമ്പര്യങ്ങളെയും ആരാധനാ രീതികളെയും മുറുകെ പിടിക്കുന്ന ഒരു സഭ എന്ന നിലയിൽ യാക്കോബായ സഭയ്ക്ക് തനതായ ഒരു സ്ഥാനമുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Joseph Mar Gregorios is appointed as the new Supreme Catholic Bava of the Jacobite Church, taking over the role in Lebanon with significant recognition.

#JosephMarGregorios #JacobiteChurch #SupremeCatholicBava #Lebanon #NewAppointment #JacobiteChurchNews