Protocol | വയനാട് ദുരന്തം: ഡി എന് എ സാമ്പിളെടുക്കുന്നതിന് മാനസികാരോഗ്യ പ്രോട്ടോകോള് നല്കുമെന്ന് മന്ത്രി വീണാ ജോര്ജ്
വയനാട്: (KVARTHA) ഉരുള്പൊട്ടല് ദുരന്തത്തില് മരിച്ചവരുടെ മൃതദേഹങ്ങള് തിരിച്ചറിയാന് ഡി എന് എ പരിശോധനക്കായി സാമ്പിളെടുക്കുമ്പോള് ബന്ധുക്കള്ക്ക് മാനസികാരോഗ്യ പ്രോട്ടോകോള് നല്കുമെന്ന് വ്യക്തമാക്കി ആരോഗ്യമന്ത്രി വീണാ ജോര്ജ്. തിരിച്ചറിയാന് കഴിയാത്ത മൃതദേഹങ്ങളുടെയും ശരീര ഭാഗങ്ങള് മാത്രം ലഭിച്ചവയുടെയും സാമ്പിളുകള് ഡിഎന്എ പരിശോധനയ്ക്കായി എടുത്തിട്ടുണ്ടെന്നും മന്ത്രി പറഞ്ഞു.
കാണാതായ തങ്ങളുടെ പ്രിയപ്പെട്ടവരെ തേടി ആരെങ്കിലും എത്തുമ്പോള് അവരുടെ സാമ്പിളുകള് കൂടി എടുത്ത് ഡിഎന്എ പരിശോധന നടത്തിയാല് മരിച്ചത് ആരാണ് എന്നുള്ളത് തിരിച്ചറിയാന് കഴിയും. അതിനുവേണ്ടി ജീവിച്ചിരിക്കുന്നവരുടെ പ്രത്യേകിച്ച് ദുരന്തത്തിന് ഇരയായവരുടെ സാമ്പിളുകള് ഡിഎന്എ പരിശോധനയ്ക്ക് എടുക്കുമ്പോള് മാനസികമായി അവരെ സജ്ജമാക്കുന്നതിന് ആരോഗ്യ വകുപ്പ് മാനദണ്ഡങ്ങള് തയ്യാറാക്കിയതായും മന്ത്രി അറിയിച്ചു.
ദുരന്തത്തിന്റെ തീവ്രതയും പ്രിയപ്പെട്ടവരെ സംബന്ധിച്ച ആശങ്കയും വലിയ രീതിയില് അനുഭവിക്കുന്നവരെ മാനസികമായി അതിന് സജ്ജമാക്കുകയും അവരുടെ ഹൃദയവിചാരങ്ങള്ക്കൊപ്പം നിന്നുകൊണ്ട് എന്താണ് പരിശോധന എന്നുള്ളതും എന്താണതിന്റെ പ്രാധാന്യം എന്നുള്ളതും വളരെ സൗമ്യമായി പറഞ്ഞു മനസ്സിലാക്കുകയും ചെയ്യുക എന്നുള്ളതാണ് ഈ മാനദണ്ഡങ്ങളിലൂടെ ലക്ഷ്യമിടുന്നത് എന്നും മന്ത്രി അറിയിച്ചു.
