രണ്ട് വര്‍ഷം കൊണ്ട് കേരളത്തിലെ 50 ശതമാനം ജനങ്ങള്‍ക്കും പൈപ്പ് വെളളം: മന്ത്രി

ടെക്‌നോസിറ്റിയില്‍ പളളിപ്പുറം ശുദ്ധജല വിതരണ പദ്ധതിയുടെ നിര്‍മ്മാണോദ്ഘാടനം ജലവിഭവ വകുപ്പ് മന്ത്രി പി.ജെ ജോസഫ് നിര്‍വ്വഹിക്കുന്നു.

തിരുവനന്തപുരം: രണ്ട് വര്‍ഷം കൊണ്ട് കേരളത്തിലെ 50 ശതമാനത്തോളം ജനങ്ങള്‍ക്കും പൈപ്പ് വെളളം ലഭ്യമാക്കാനുളള നടപടികളുമായി ജലവിഭവ വകുപ്പ് മുന്നോട്ട് പോകുകയാണെന്ന് മന്ത്രി പി.ജെ ജോസഫ് അറിയിച്ചു. ടെക്‌നോസിറ്റിയില്‍ ജലവിഭവ വകുപ്പ് നടപ്പിലാക്കുന്ന ശുദ്ധജല വിതരണ പദ്ധതിയുടെ നിര്‍മ്മാണോദ്ഘാടനം പളളിപ്പുറം കുറക്കോട് നടന്ന ചടങ്ങില്‍ നിര്‍വ്വഹിച്ച് സംസാരിക്കുകയായിരുന്നു അദ്ദേഹം. ടെക്‌നോസിറ്റിയില്‍ നടപ്പിലാക്കിവരുന്ന നിരവധി വികസന പദ്ധതികളുടെ ഭാഗമായിട്ടുളളതാണ് ഈ ശുദ്ധജല വിതരണ പദ്ധതിയെന്ന് മന്ത്രി പറഞ്ഞു.

17.16 കോടി രൂപ ചെലവ് വരുന്ന പദ്ധതി നാല് ഘട്ടങ്ങളായാണ് നടപ്പിലാക്കുന്നതെന്നും ഇത് പൂര്‍ത്തിയാക്കുമ്പോള്‍ ടെക്‌നോസിറ്റിക്ക് ആവശ്യമായ മുഴുവന്‍ ശുദ്ധ ജലവും ലഭ്യമാക്കാന്‍ കഴിയുമെന്നും മന്ത്രി പറഞ്ഞു.

പാലോട് രവി എം.എല്‍.എ. അദ്ധ്യക്ഷത വഹിച്ച യോഗത്തില്‍ വി.ശശി എം.എല്‍.എ. മുഖ്യാതിഥിയായിരുന്നു. വാട്ടര്‍ അതോറിറ്റി ചീഫ് എഞ്ചിനീയര്‍ കെ.പി.ക്യഷ്ണകുമാര്‍ സ്വാഗതം പറഞ്ഞു. ടെക്‌നോപാര്‍ക്ക് സി.ഇ.ഒ. കെ.ജി.ഗിരീഷ് ബാബു, അടൂര്‍ക്കോണം ഗ്രാമപഞ്ചായത്ത് പ്രസിഡന്റ് നിസാര്‍, ജില്ലാ പഞ്ചായത്ത് അംഗം ബീഗം നബീസാ, ജന പ്രതിനിധികള്‍, രാഷ്ട്രീയകക്ഷിനേതാക്കള്‍, ഉദേ്യാഗസ്ഥര്‍ തുടങ്ങിയവര്‍ പങ്കെടുത്തു.