Rifa Mehnu's Death | വ്ലോഗര് റിഫ മെഹ്നുവിന്റെ മൃതദേഹം പോസ്റ്റുമോര്ടം നടത്തുന്നതിനായി പുറത്തെടുത്തു; ഇന്ക്വസ്റ്റ് നടപടികള് പൂര്ത്തിയാക്കി; മെഡികല് കോളജ് ആശുപത്രിയിലേക്ക് മാറ്റും; ആന്തരികാവയവങ്ങള് രാസപരിശോധനയ്ക്ക് വിധേയമാക്കാന് തീരുമാനം
May 7, 2022, 18:08 IST
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT
കോഴിക്കോട്: (www.kvartha.com) ദുബൈയില് താമസസ്ഥലത്ത് ദുരൂഹ സാഹചര്യത്തില് മരിച്ച നിലയില് കണ്ടെത്തിയ മലയാളി വ്ലോഗര് റിഫ മെഹ്നുവിന്റെ മൃതദേഹം പോസ്റ്റുമോര്ടം നടത്തുന്നതിനായി പുറത്തെടുത്തു. കോഴിക്കോട് തഹസില്ദാരുടെ മേല്നോട്ടത്തിലാണ് മൃതദേഹം പുറത്തെടുത്തത്. താമരശ്ശേരി ഡിവൈഎസ്പിയുടെ നേതൃത്വത്തിലുള്ള പൊലീസ് സംഘവും ഫൊറന്സിക് വിദഗ്ധരും പാവണ്ടൂര് ജുമാ മസ്ജിദ് ഖബറിടത്തിലെത്തി ഇന്ക്വസ്റ്റ് നടപടികള് പൂര്ത്തിയാക്കി. ആന്തരികാവയവങ്ങള് രാസപരിശോധനക്ക് വിധേയമാക്കാനായി മൃതദേഹം കോഴിക്കോട് മെഡികല് കോളജ് ആശുപത്രിയിലേക്ക് മാറ്റും.
പോസ്റ്റുമോര്ടം ശനിയാഴ്ച തന്നെ നടക്കുമെന്ന് തഹസില്ദാര് എ എം പ്രേംലാല് അറിയിച്ചു. എംബാം ചെയ്തതിനാല് മൃതദേഹം കൂടുതല് അഴുകിയിരുന്നില്ല. നടപടികള് പൂര്ത്തിയാക്കിയ ശേഷം ശനിയാഴ്ച തന്നെ മൃതദേഹം മറവുചെയ്യും.
മൃതദേഹം പുറത്തെടുത്ത് പോസ്റ്റുമോര്ടം നടത്താന് അനുമതി വേണമെന്ന അന്വേഷണസംഘത്തിന്റെ ആവശ്യം ആര്ഡിഒ കഴിഞ്ഞ ദിവസമാണ് അംഗീകരിച്ചത്. റിഫ മെഹ്നുവിന്റെ മൃതദേഹം പുറത്തെടുത്ത് പോസ്റ്റുമോര്ടം നടത്താന് അന്വേഷണ സംഘം ആര് ഡി ഒയ്ക്ക് അപേക്ഷ നല്കിയിരുന്നു. അന്വേഷണ ഉദ്യോഗസ്ഥനായ താമരശേരി ഡിവൈഎസ്പിയാണ് അപേക്ഷ നല്കിയത്.
ഭര്ത്താവ് മെഹ്നാസിനെതിരായ കേസന്വേഷണത്തിന്റെ ഭാഗമായാണ് നടപടി. റിഫയുടെ വീടിന് സമീപത്തെ പള്ളി കബറിസ്ഥാനില് സംസ്കരിച്ച മൃതദേഹം പുറത്തെടുത്ത് പോസ്റ്റുമോര്ടം നടത്താനാണ് അന്വേഷണ സംഘത്തിന് ഇപ്പോള് അനുമതി ലഭിച്ചിരിക്കുന്നത്.
റിഫയുടെ മരണത്തിലെ സത്യം പുറത്തുവരുമെന്ന പ്രതീക്ഷയിലാണ് കുടുംബം. തുടരന്വേഷണത്തില് നിര്ണയകമാണ് പോസ്റ്റുമോര്ടം റിപോര്ടട്ട്. റിഫയുടെ മരണത്തില് ഭര്ത്താവിനും സുഹൃത്തിനും പങ്കുണ്ടെന്ന നിലപാടിലാണ് കുടുംബാംഗങ്ങള്.
മാര്ച് ഒന്നിന് ദുബൈ ജലാലിയയിലെ ഫ്ലാറ്റിലാണ് റിഫയെ മരിച്ച നിലയില് കണ്ടെത്തിയത്. ആത്മഹത്യയാണെന്നും മരണത്തില് അസ്വാഭാവികതയില്ലെന്നുമുള്ള ദുബെ പൊലീസിന്റെ നിഗമനത്തിന്റെ അടിസ്ഥാനത്തില് പോസ്റ്റുമോര്ടം നടത്താതെയാണ് മൃതദേഹം നാട്ടിലേക്ക് വിട്ടുനല്കിയത്.
എന്നാല് റിഫയ്ക്ക് അവിഹിത ബന്ധമുള്ളതായി ആരോപിച്ച് മെഹ്നാസ് മര്ദിച്ചെന്നും ഇയാളുടെ പീഡനം സഹിക്കാനാവാതെയാണ് റിഫയുടെ ആത്മഹത്യയെന്നും ബന്ധുക്കള് പൊലീസില് പരാതി നല്കിയിരുന്നു. പിന്നാലെ ഭര്ത്താവ് മെഹനാസിനെതിരെ പൊലീസ് കെസെടുത്തു. ആത്മഹത്യാ പ്രേരണയ്ക്കും, മാനസികമായും ശാരീരികമായും ഉപദ്രവിച്ചതിനുമാണ് ജാമ്യമില്ലാ വകുപ്പുകള് ചുമത്തി കേസ് എടുത്തിരിക്കുന്നത്.
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
