High Court | വണ്ടിപ്പെരിയാര്‍ കേസ്: തെളിവില്ലെന്ന് കണ്ട് വെറുതെ വിട്ട പ്രതിയുടെ കുടുംബത്തിന് പൊലീസ് സുരക്ഷ നല്‍കണമെന്ന് ഹൈകോടതി

കൊച്ചി: (KVARTHA) വണ്ടിപ്പെരിയാറില്‍ ആറുവയസുകാരിയെ പീഡിപ്പിച്ച് കൊലപ്പെടുത്തിയെന്ന കേസില്‍ തെളിവില്ലെന്ന് കണ്ട് വെറുതെ വിട്ട പ്രതി അര്‍ജുന്റെ കുടുംബത്തിന് പൊലീസ് സുരക്ഷ നല്‍കണമെന്ന് ഹൈകോടതി. വീട്ടിലുള്ള സാധനങ്ങള്‍ എടുക്കാന്‍ പോകാനും കുടുംബത്തിന് സംരക്ഷണം നല്‍കണമെന്ന് കോടതി നിര്‍ദേശിച്ചു.

വണ്ടിപ്പെരിയാര്‍ പൊലീസിനാണ് ഹൈകോടതി ഇതുസംബന്ധിച്ച നിര്‍ദേശം നല്‍കിയത്. ജീവനും സ്വത്തിനും ഭീഷണിയുണ്ടെന്നും സംരക്ഷണം നല്‍കണമെന്നും ആവശ്യപ്പെട്ട് അര്‍ജുന്റെ അച്ഛന്‍ സുന്ദറും കുടുംബാംഗങ്ങളും നല്‍കിയ ഹര്‍ജിയിലാണ് ഹൈകോടതി സിംഗിള്‍ ബെഞ്ചിന്റെ ഉത്തരവ്.


2021 ജൂണ്‍ 30ന് വണ്ടിപ്പെരിയാര്‍ ചുരക്കുളം എസ്റ്റേറ്റ് ലയത്തില്‍ ആറു വയസ്സുകാരിയെ പീഡിപ്പിച്ച് കൊലപ്പെടുത്തിയെന്ന കേസില്‍ പ്രതിയായിരുന്നു അര്‍ജുന്‍. എന്നാല്‍, കൊലപാതകവും ബലാത്സംഗവും അടക്കമുള്ള കുറ്റങ്ങള്‍ തെളിയിക്കാന്‍ പ്രോസിക്യൂഷന് കഴിഞ്ഞില്ലെന്ന് ചൂണ്ടിക്കാട്ടി കട്ടപ്പന അതിവേഗ സ്‌പെഷല്‍ കോടതി ജഡ്ജ് വി മഞ്ജുവാണ് പ്രതിയെ വെറുതെ വിട്ടത്. കഴിഞ്ഞ വ്യാഴാഴ്ചയാണ് വിധി വന്നത്.

കോടതി വെറുതെ വിട്ടെങ്കിലും തങ്ങള്‍ വെറുതെ വിടില്ലെന്നും കുട്ടിയുടെ അച്ഛന്‍ അവനെ കൊല്ലുമെന്നും കൊല്ലപ്പെട്ട കുട്ടിയുടെ അമ്മ കോടതിമുറ്റത്ത് വെച്ച് വിളിച്ചു പറഞ്ഞിരുന്നു. വിവാഹം കഴിഞ്ഞ് വര്‍ഷങ്ങള്‍ക്ക് ശേഷം കിട്ടിയ മകളാണ് പ്രതിയുടെ ക്രൂര പീഡനത്തെ തുടര്‍ന്ന് മരിച്ചത്. ഇതിന്റെ വിഷമം കുട്ടിയുടെ മാതാപിതാക്കള്‍ക്ക് ഉണ്ടായിരുന്നു.