'കലുങ്ക് തമ്പ്രാനിൽ നിന്ന് കേരളത്തിന് മൊട്ടുസൂചിയുടെ ഉപകാരം പോലുമില്ല'; സുരേഷ് ഗോപിയെ പരിഹസിച്ച് വി ശിവൻകുട്ടി

തിരുവനന്തപുരം: (KVARTHA) കേന്ദ്രമന്ത്രി സുരേഷ് ഗോപിക്കെതിരെ രൂക്ഷമായ പരിഹാസവും വിമർശനവുമായി സംസ്ഥാന വിദ്യാഭ്യാസ മന്ത്രി വി. ശിവൻകുട്ടി രംഗത്ത്. സുരേഷ് ഗോപി വാ തുറക്കുന്നത് കള്ളം പറയാനും ഭക്ഷണം കഴിക്കാനും മാത്രമാണെന്ന് മന്ത്രി പറഞ്ഞു. തന്നെ ലക്ഷ്യംവെച്ച് കേന്ദ്രമന്ത്രി നടത്തിയ 'വിദ്യാഭ്യാസമുള്ള വിദ്യാഭ്യാസ മന്ത്രി വേണം' എന്ന പരാമർശത്തിന് മറുപടി നൽകുകയായിരുന്നു വി. ശിവൻകുട്ടി.

സുരേഷ് ഗോപി ഈ പരാമർശം നടത്തിയത് കേന്ദ്ര വിദ്യാഭ്യാസ മന്ത്രിയെക്കുറിച്ചായിരിക്കും എന്ന് വി ശിവൻകുട്ടി പരിഹസിച്ചു. സുരേഷ് ഗോപി പറയുന്നത് ആരും ശ്രദ്ധിക്കുന്നില്ല. അതുകൊണ്ടാണ് അദ്ദേഹം ഇപ്പോൾ കലുങ്കിൻ്റെ അടുത്ത് വന്നിരുന്ന് വർത്തമാനം പറയുന്നത്. 'കലുങ്കിസമാണ്' നടക്കുന്നതെന്നും മന്ത്രി പറഞ്ഞു. ഇതിനിടെ, പാവപ്പെട്ടവൻ പരാതിയുമായി വന്നാൽ കേന്ദ്രമന്ത്രി അവരെ അടിച്ചോടിക്കുകയാണെന്നും മന്ത്രി വിമർശനം ഉന്നയിച്ചു.

അഭിനയം ഉപേക്ഷിക്കുന്നതിനെക്കുറിച്ചുള്ള പരാമർശം

കേന്ദ്രമന്ത്രിസ്ഥാനം വേണ്ട, സിനിമയിൽ അഭിനയിക്കാൻ പോകുന്നു എന്ന് സുരേഷ് ഗോപി പറഞ്ഞതായി കേട്ടു. ഈ വിഷയത്തിലും വി ശിവൻകുട്ടി രൂക്ഷമായ ഭാഷയിൽ പ്രതികരിച്ചു. 'ഇയാൾ ഇനി സിനിമയിൽ അഭിനയിക്കാൻ പോയാൽ എട്ട് നിലയിൽ പൊട്ടും എന്നും അതുകൊണ്ട് ഉള്ള ജോലി തീർത്തിട്ട് പോകുന്നതാവും നല്ലതെന്നും' മന്ത്രി പരിഹസിച്ചു.

'അല്ലെങ്കിലും ഇപ്പോൾ അദ്ദേഹത്തിന് അഭിനയം ഒന്നുമില്ലല്ലോ എന്നും മമ്മൂട്ടിയും മോഹൻലാലും അഭിനയിക്കുന്നത് പോലെ അഭിനയിക്കാൻ പറ്റുമോയെന്നും' വി ശിവൻകുട്ടി ചോദിച്ചു. സുരേഷ് ഗോപിക്ക് ഒരു ദേശീയ തലത്തിൽ പുരസ്കാരം ലഭിച്ച കാര്യത്തെക്കുറിച്ചും മന്ത്രി പരാമർശിച്ചു. 'അതെങ്ങനെ കിട്ടിയെന്ന് താൻ പറയുന്നില്ലെന്നും' മന്ത്രി കൂട്ടിച്ചേർത്തു.

സുരേഷ് ഗോപിയുടെ വിമർശനം

ഇടുക്കി വട്ടവടയിലെ കോവിലൂരിൽ സംഘടിപ്പിച്ച 'കലുങ്ക് സൗഹൃദ സദസ്സിൽ' വച്ചായിരുന്നു കേന്ദ്രമന്ത്രി സുരേഷ് ഗോപി, വി ശിവൻകുട്ടിയെ പരിഹസിച്ചത്. വട്ടവടയിൽ ഇംഗ്ലീഷ് മീഡിയം സ്കൂൾ വേണമെന്ന നാട്ടുകാരുടെ ആവശ്യത്തിന് മറുപടി നൽകുകയായിരുന്നു അദ്ദേഹം. 'നല്ല വിദ്യാഭ്യാസമുള്ള വിദ്യാഭ്യാസ മന്ത്രി കേരളത്തിൽ വരട്ടെ, എന്നെ എപ്പോഴും കളിയാക്കുന്ന മന്ത്രിയാണ് ഇപ്പോൾ ഉള്ളത്. അവരൊക്കെ തെറിച്ച് മാറട്ടെ' എന്നായിരുന്നു സുരേഷ് ഗോപി പറഞ്ഞത്.

നിരന്തരമായി തന്നെ വിമർശിക്കുന്നയാളാണ് സംസ്ഥാനത്തെ വിദ്യാഭ്യാസമന്ത്രിയെന്നും അങ്ങനെയുള്ളവരിൽ നിന്ന് ഈ ആവശ്യങ്ങൾക്ക് മറുപടി പ്രതീക്ഷിക്കേണ്ടെന്നും സുരേഷ് ഗോപി കൂട്ടിച്ചേർത്തു. വട്ടവട പഞ്ചായത്തിലെ 18 കുടുംബങ്ങൾക്ക് വീടു നിർമിച്ചു നൽകുമെന്നും സുരേഷ് ഗോപി കലുങ്ക് സദസ്സിൽ പ്രഖ്യാപിച്ചു. വോട്ട് വാങ്ങി ജയിച്ച് ജനങ്ങളെ വഞ്ചിക്കുന്നവർക്ക് മാതൃകയായിരിക്കും ഇതെന്നും അദ്ദേഹം പറഞ്ഞു. ജനങ്ങളെ വഞ്ചിക്കുന്നവരെ റോഡിൽ പിടിച്ചുനിർത്തി ചോദ്യം ചെയ്യണമെന്നും സുരേഷ് ഗോപി അഭിപ്രായപ്പെട്ടു.

സുരേഷ് ഗോപിയുടെ ഈ വിമർശനങ്ങൾക്ക് ഫേസ്ബുക്ക് പോസ്റ്റിലൂടെയും വി. ശിവൻകുട്ടി മറുപടി നൽകി. ഒരു മൊട്ടുസൂചിയുടെ ഉപകാരം പോലും 'കലുങ്ക് തമ്പ്രാനിൽ' നിന്ന് കേരളത്തിനില്ലെന്ന് വി. ശിവൻകുട്ടി ഫേസ്ബുക്കിൽ കുറിച്ചു. കലുങ്കിസമാണ് സുരേഷ് ഗോപിയുടെ പ്രത്യയശാസ്ത്രമെന്നും അദ്ദേഹം പരിഹസിച്ചു. പിന്നാക്ക പഞ്ചായത്തായ വട്ടവടയിൽ റോഡ്, സ്‌കൂൾ, കൃഷി, വന്യമൃഗ ശല്യം, ആശുപത്രി ഉൾപ്പെടെയുള്ള അടിസ്‌ഥാന സൗകര്യങ്ങളുടെ അഭാവം ജനങ്ങൾ സുരേഷ് ഗോപിക്ക് മുൻപിൽ പരാതിയായി ഉന്നയിച്ചിരുന്നു. കലുങ്ക് സദസ്സ് ആരംഭിക്കുന്നതിന് മുൻപ് സുരേഷ് ഗോപിയും സംഘവും മഹാരാജാസ് കോളജിൽ കൊല്ലപ്പെട്ട അഭിമന്യുവിന്റെ കൊട്ടാക്കമ്പൂരിലെ വീട്ടിലെത്തി മാതാപിതാക്കളെ സന്ദർശിച്ചിരുന്നു.

സുരേഷ് ഗോപിയെ പരിഹസിച്ച വിദ്യാഭ്യാസ മന്ത്രിയുടെ പ്രതികരത്തെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Minister V Sivankutty slammed Central Minister Suresh Gopi, calling him 'Kalunk Thamburan' and predicting his acting career failure.

#VSivankutty #SureshGopi #Kalunkism #KeralaPolitics #Wayanad #Idukki