ഇടുക്കി: (KVARTHA) തൊടുപുഴ വണ്ടിപ്പെരിയാറിന് സമീപം അരണക്കല്ലിൽ ഇറങ്ങിയ കടുവയെ കണ്ടെത്തി. വനം വകുപ്പ് ഡ്രോൺ ഉപയോഗിച്ച് നടത്തിയ തിരച്ചിലിലാണ് കടുവയെ കണ്ടെത്താനായത്. ഉടൻ തന്നെ കടുവയെ മയക്കുവെടി വെച്ച് പിടികൂടാനുള്ള ശ്രമങ്ങൾ ആരംഭിച്ചിട്ടുണ്ട്. ഇതിന്റെ ഭാഗമായി തോട്ടം തൊഴിലാളികളോട് ജോലിക്ക് പോകരുതെന്ന് നിർദേശം നൽകിയിട്ടുണ്ട്. കടുവയെ പിടികൂടിയ ശേഷം കൊണ്ടുപോകാനുള്ള കൂട് സ്ഥലത്ത് എത്തിക്കുകയും ഡ്രോൺ നിരീക്ഷണം തുടരുകയാണെന്നും അധികൃതർ അറിയിച്ചു.

കടുവ തോട്ടം തൊഴിലാളികളുടെ വളർത്തുമൃഗങ്ങളെ ആക്രമിച്ചു കൊന്നിരുന്നു. നാരായണൻ എന്നയാളുടെ പശുവിനെയും ബാലമുരുകൻ്റെ നായയെയുമാണ് കടുവ കൊന്നത്. ഇത് പ്രദേശവാസികളെ കൂടുതൽ ഭയത്തിലാഴ്ത്തിയിട്ടുണ്ട്. കഴിഞ്ഞ ദിവസം സമീപത്തുള്ള ഗ്രാമ്പി എന്ന സ്ഥലത്തും ഒരു കടുവയെ കണ്ടിരുന്നു.  അവിടെ പരുക്കേറ്റ നിലയിൽ കണ്ട കടുവയെ തിങ്കളാഴ്ച രാവിലെ മുതൽ കാണാതായിരുന്നു. 

ഡ്രോൺ ഉൾപ്പെടെയുള്ള സംവിധാനങ്ങൾ ഉപയോഗിച്ച് വനം വകുപ്പ് വ്യാപകമായ തിരച്ചിൽ നടത്തിയെങ്കിലും കടുവയെ കണ്ടെത്താനായിരുന്നില്ല. എന്നാൽ ഇപ്പോൾ അരണക്കല്ലിൽ കണ്ടെത്തിയ കടുവ ഗ്രാമ്പിയിൽ കണ്ട അതേ കടുവയാണെന്ന് വനം വകുപ്പ് സ്ഥിരീകരിച്ചു.

അതിനിടെ, കടുവ അക്രമാസക്തനാകാനും മനുഷ്യജീവന് ഹാനികരമാകാനും സാധ്യതയുള്ളതിനാൽ പീരുമേട് താലൂക്കിലെ വണ്ടിപ്പെരിയാർ ഗ്രാമ പഞ്ചായത്ത് വാർഡ് 15 ൽ ജില്ലാ കലക്ടർ വി വിഗ്നേശ്വരി നിരോധനാജ്ഞ പ്രഖ്യാപിച്ചു. ഭാരതീയ നാഗരിക് സുരക്ഷാ സംഹിത 163 വകുപ്പ് പ്രകാരം തിങ്കളാഴ്ച രാവിലെ ആറ് മണി മുതൽ മറ്റൊരു ഉത്തരവ് പുറപ്പെടുവിക്കുന്നത് വരെയാണ് നിരോധനാജ്ഞ നിലവിലുണ്ടാവുക. പൊതുജനങ്ങളുടെ സുരക്ഷ ഉറപ്പാക്കുന്നതിന്റെ ഭാഗമായാണ് ഈ നടപടി.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.

 A tiger that had ventured into the residential area of Aranakkallu near Vandiperiyar in Idukki has been located by the forest department using a drone. Efforts are underway to tranquilize and capture the animal. A prohibitory order has been issued in Ward 15 of Vandiperiyar Grama Panchayat by the District Collector due to the potential threat to human life. The tiger had previously attacked and killed domestic animals in the area.

#Tiger #Vandiperiyar #Idikki #KeralaForest #Wildlife #ProhibitoryOrder