തിരുവനന്തപുരം നഗരത്തിൽ അനധികൃത തട്ടുകടകൾക്കെതിരേ കർശന നടപടിയുമായി പൊലീസ്; കോട്ടൺഹിൽ സ്കൂളിന് സമീപത്തുനിന്ന് 12 കടകൾ ഒഴിപ്പിച്ചു

തിരുവനന്തപുരം: (KVARTHA) തിരുവനന്തപുരം നഗരത്തിൽ മാനദണ്ഡങ്ങൾ ലംഘിച്ച് പ്രവർത്തിച്ചിരുന്ന അനധികൃത തട്ടുകടകൾക്കെതിരേ സിറ്റി പൊലീസ് ശക്തമായ നടപടികൾ തുടരുന്നു. വഴുതക്കാട് കോട്ടൺഹിൽ സ്കൂളിന് സമീപം വഴി തടസ്സപ്പെടുത്തി പ്രവർത്തിച്ചിരുന്ന 12 തട്ടുകടകളാണ് മ്യൂസിയം എസ്എച്ച്ഒ പ്രശാന്തിൻ്റെ നേതൃത്വത്തിൽ ഒഴിപ്പിച്ചത്. സിറ്റി പൊലീസ് കമ്മീഷണർ ഡോ അരുൾ ആർബി കൃഷ്ണയുടെ നിർദേശപ്രകാരമായിരുന്നു നടപടി. 

ഇത്തരം കടകൾ ഒരു കാരണവശാലും അനുവദിക്കില്ലെന്ന് കമ്മീഷണറും മേയർ വി വി രാജേഷും വ്യക്തമാക്കിയിട്ടുണ്ട്. സാധാരണക്കാരുടെ മറവിൽ വൻകിട ഹോട്ടലുകൾ വഴി തടസ്സപ്പെടുത്തിയും ഗുണനിലവാരം പാലിക്കാതെയും തട്ടുകടകൾ നടത്തുന്ന വിവരം കഴിഞ്ഞ ദിവസം റിപ്പോർട്ട് ചെയ്തിരുന്നു. 

കടകൾ ഒഴിപ്പിക്കാനെത്തിയപ്പോൾ നടത്തിപ്പുകാർ പ്രതിഷേധവുമായെത്തിയെങ്കിലും ലൈസൻസ് ഉൾപ്പെടെ ഹാജരാക്കാൻ കഴിയാത്തതിനെ തുടർന്ന് പിൻവാങ്ങി. ഇവിടെ പാചകം ചെയ്ത അവശിഷ്ടങ്ങൾ നീക്കം ചെയ്യാനും നിർദേശം നൽകിയിട്ടുണ്ട്. കോട്ടൺഹിൽ സ്കൂൾ പിടിഎയും ഇതുസംബന്ധിച്ച് പരാതി നൽകിയിരുന്നു.

ഫുഡ് ട്രക്കുകൾക്ക് നിയന്ത്രണവും ഉപജീവന സംരക്ഷണവും

വെള്ളയമ്പലം-ശാസ്തമംഗലം റോഡിൽ അനധികൃതമായി ഫുഡ് ട്രക്കുകൾ നിർത്തിയിട്ട് ഭക്ഷണം ഇരുന്ന് കഴിക്കാൻ സൗകര്യമൊരുക്കുന്നത് നിരോധിച്ചു. ഇവയിൽനിന്ന് പാർസൽ മാത്രം അനുവദിക്കാനാണ് തീരുമാനം. എന്നാൽ ഉപജീവനത്തിനായി തട്ടുകട നടത്തുന്ന യഥാർഥ കച്ചവടക്കാരെ സംരക്ഷിക്കുമെന്നും ഇതിനായി പ്രത്യേക സ്ഥലം നിർണയിക്കുന്നതിനുള്ള നടപടികൾ പുരോഗമിക്കുകയാണെന്നും മേയർ വി വി രാജേഷ് അറിയിച്ചു. 

തട്ടുകടകളുടെ മറവിൽ റോഡ് കയ്യേറുന്നതും പഴകിയ ഭക്ഷണം ചൂടാക്കി വിൽക്കുന്നതും തടയും. സെക്രട്ടേറിയറ്റിനു മുന്നിലെ ചില വെജിറ്റേറിയൻ ഹോട്ടലുകൾ ഉൾപ്പെടെയുള്ളവ ഈടാക്കുന്ന ഉയർന്ന ഭക്ഷണവില നിയന്ത്രിക്കാൻ സർക്കാർ ഇടപെടണമെന്ന് കോർപ്പറേഷൻ ആവശ്യപ്പെടും. ഓണത്തോടനുബന്ധിച്ച് വഴിയോരക്കച്ചവടക്കാരെ പരമാവധി സഹായിക്കുന്ന നിലപാടാണ് കോർപ്പറേഷനുള്ളത്.

അനധികൃത നിർമാണങ്ങൾക്കെതിരേ പ്രത്യേക സ്ക്വാഡ്

നഗരത്തിലെ അനധികൃത കെട്ടിട നിർമാണങ്ങൾ കൂടുതലും അവധി ദിവസങ്ങളിലാണ് നടക്കുന്നതെന്ന കണ്ടെത്തലിൻ്റെ അടിസ്ഥാനത്തിൽ, ഇത് തടയാൻ ഓണക്കാലത്ത് പ്രത്യേക സ്ക്വാഡ് രൂപവത്കരിച്ച് പരിശോധന നടത്തുമെന്ന് മേയർ വി വി രാജേഷ് അറിയിച്ചു. കഴിഞ്ഞ ദിവസത്തെ പരിശോധനയിൽ നിരവധി അനധികൃത നിർമാണങ്ങൾ കണ്ടെത്തി നിർത്തിവെക്കാൻ നിർദേശം നൽകിയിരുന്നു. 

സ്റ്റോപ്പ് മെമ്മോ നൽകിയാലും അവഗണിച്ച് നിർമാണം തുടരുന്ന സാഹചര്യത്തിൽ മേയറും സെക്രട്ടറിയും നേരിട്ടിറങ്ങി പുളിമൂട്, ഗാന്ധാരി അമ്മൻകോവിൽ എന്നിവിടങ്ങളിൽ പരിശോധന നടത്തി. ഉദ്യോഗസ്ഥരുടെ അലംഭാവത്തിനെതിരെയും നടപടിയുണ്ടാകും. അനധികൃത നിർമാണങ്ങൾ ഉടമകൾ സ്വന്തം ചെലവിൽ പൊളിച്ചുമാറ്റണം, അല്ലെങ്കിൽ കോർപ്പറേഷൻ പൊളിച്ചുമാറ്റി ചെലവ് ഈടാക്കും.

ഹോസ്റ്റൽ നടത്തുന്നതിനായി കെട്ടിടങ്ങൾ നിർമിച്ച് സാമ്പത്തിക തട്ടിപ്പ് നടത്തുന്നവർക്കെതിരേ പൊലീസ് അന്വേഷണം നടത്തണമെന്നും ആവശ്യപ്പെട്ടിട്ടുണ്ട്. പുത്തരിക്കണ്ടം മൈതാനം മുൻകൂറായി സർക്കസ് നടത്തിപ്പിന് നൽകിയ മുൻ ഭരണസമിതിയുടെ നടപടി ചൂണ്ടിക്കാണിച്ച മേയർ, ഇനി ഇത്തരം കാര്യങ്ങളിൽ മുൻകൂറായി അനുമതി നൽകില്ലെന്നും വ്യക്തമാക്കി. ഓണം സദ്യകളുടെ ഗുണനിലവാരം പരിശോധിക്കുമെന്നും കോർപ്പറേഷൻ്റെ ഓണാഘോഷം ഓഗസ്റ്റ് 21-ന് നടക്കുമെന്നും മേയർ കൂട്ടിച്ചേർത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Thiruvananthapuram city police removed 12 illegal street food stalls near Cotton Hill School, while Mayor V V Rajesh announced strict measures including food truck restrictions, Onam special squads for illegal constructions, and food quality checks.

#Kvartha #ThiruvananthapuramNews #StreetFoodStalls #IllegalConstruction #MayorVVRajesh #KeralaPolice #Onam2026 #MalayalamNews #AmmuNews