അടിമാലിയിലെ ദമ്പതികളുടെ കൊല; തമിഴ്‌നാട് സ്വദേശികളായ പിതാവും മകനും അറസ്റ്റില്‍

അടിമാലി: അടിമാലിയില്‍ ദമ്പതികളെ കൊലപ്പെടുത്തുകയും   മകനെ ഗുരുതരമായി വെട്ടിപ്പരിക്കേല്‍പ്പിക്കുകയും ചെയ്ത സംഭവത്തില്‍ പ്രതികളെ പോലീസ് അറസ്റ്റ് ചെയ്തു. ബൈസണ്‍വാലി പൊട്ടന്‍കാട്ടിലെ മുരുകന്‍ എന്ന ജയരാജ് മകന്‍ കറുപ്പുസ്വാമി എന്നിവരെയാണ് പോലീസ് അറസ്റ്റ് ചെയ്തത്.

പൂപ്പാറ വഴി തമിഴ്‌നാട്ടിലേക്ക് രക്ഷപ്പെടാന്‍ ശ്രമിക്കുന്നതിനിടെ വ്യാഴാഴ്ച പുലര്‍ച്ചെ മൂന്നാര്‍ ഡിവൈ.എസ്.പി പി.എന്‍ സജിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്യുകയായിരുന്നു.

ബൈസണ്‍വാലി പൊട്ടന്‍കാട് ചൂഴക്കവയലില്‍ അപ്പുക്കുട്ടന്‍(60), ഭാര്യ ശാന്ത(55) എന്നിവരാണ് വെട്ടേറ്റ് മരിച്ചത്. ഇവരുടെ മകന്‍ ബൈജു(38) ദേഹത്താകമാനം വെട്ടേറ്റ് ഗുരുതരാവസ്ഥയില്‍  കോട്ടയം മെഡിക്കല്‍ കോളജില്‍ ചികിത്സയില്‍ കഴിയുകയാണ്.

ബുധനാഴ്ച വൈകുന്നേരം നാലരമണിയോടെയാണ് ജയരാജും മകന്‍ കറുപ്പുസ്വാമിയും അപ്പുക്കുട്ടന്റെ വീട്ടില്‍ വാക്കത്തിയുമായെത്തി കുടുംബത്തിലെ മൂന്ന് പേരെയും തുരുതുരാ വെട്ടിപ്പരിക്കേല്‍പിച്ചത്.

ഗുരുതരമായി പരിക്കേറ്റ ദമ്പതികള്‍ സംഭവസ്ഥലത്തുവെച്ചു തന്നെ മരിച്ചിരുന്നു. വെട്ടേറ്റ ബൈജു  നാട്ടുകാരെ വിവരമറിയിക്കാനായി  പുറത്തേക്കോടിയെങ്കിലും റോഡരികില്‍ വീഴുകയായിരുന്നു. തുടര്‍ന്ന് അഞ്ചരമണിയോടെയാണ് നാട്ടുകാര്‍ റോഡരികില്‍ ദേഹമാസകലം വെട്ടിപ്പരിക്കേറ്റ് അബോധാവസ്ഥയില്‍ കിടക്കുന്ന ബൈജുവിനെ കണ്ടത്.

ഉടന്‍തന്നെ നാട്ടുകാര്‍ ബൈജുവിനെ  അടിമാലി താലൂക്ക് ആശുപത്രിയിലെത്തിച്ച് വിവരം പറയാന്‍ വീട്ടിലെത്തിയപ്പോഴാണ് മാതാപിതാക്കളെ വെട്ടേറ്റ് മരിച്ചനിലയില്‍ കണ്ടെത്തിയത്. അപ്പോഴേക്കും വൈകുന്നേരം ഏഴുമണിയായിരുന്നു. നാലേക്കറോളം വരുന്ന ഏലത്തോട്ടനു നടുവില്‍ ഒറ്റപ്പെട്ടുകിടക്കുന്ന വീടായതിനാല്‍ അക്രമികള്‍ വെട്ടിപ്പരിക്കേല്‍പിച്ച സംഭവമൊന്നും നാട്ടുകാര്‍ക്ക് അറിയാന്‍ കഴിഞ്ഞില്ല.

ജയരാജും മകന്‍ കറുപ്പുസ്വാമിയും പത്ത് വര്‍ഷം മുന്‍പ് തമിഴ്‌നാട്ടില്‍ നിന്നം കുടിയേറി പൊട്ടന്‍കാട്ടിലെത്തിയവരാണ്. ഇതിനിടെ ജയരാജിന്റെ കൈവശം ലൈസന്‍സില്ലാത്ത തോക്കുണ്ടെന്ന വിവരം ബൈജു രാജാക്കാട് പോലീസിനെ അറിയിക്കുകയുണ്ടായി.  ഇത് ജയരാജിന്റെ കുടുംബവും അപ്പുക്കുട്ടന്റെ കുടുംബവും തമ്മില്‍ ശത്രുതയിലാവാന്‍ കാരണമായി.

ആറുമാസം മുന്‍പ് വാക്കുതര്‍ക്കത്തിനിടെ കറുപ്പ് സ്വാമിയെ ബൈജു വെട്ടിക്കൊലപ്പെടുത്താന്‍ ശ്രമിച്ചിരുന്നു. ഇത് ഇവരുടെ ശത്രുത വര്‍ധിക്കാന്‍ കാരണമായി. ഈ സംഭവമാണ്  കറുപ്പ് സ്വാമിയെയും ജയരാജിനെയും അറുംകൊല ചെയ്യാന്‍ പ്രേരിപ്പിച്ചത്.
8 വയസുകാരന്‍ പിക്കപ്പ് വാന്‍ തട്ടി മരിച്ചു