ഉത്സവകാലത്ത് വിപണിയിൽ സജീവമായി ഇടപെടും; സപ്ലൈകോ ക്രിസ്മസ് - പുതുവത്സര ഫെയറുകൾക്ക് തുടക്കമായി

തിരുവനന്തപുരം: (KVARTHA) ഉത്സവകാലത്ത് വിപണിയിൽ ഫലപ്രദമായ ഇടപെടൽ നടത്തി വിലക്കയറ്റം നിയന്ത്രിക്കുമെന്ന് ഭക്ഷ്യ-പൊതുവിതരണ വകുപ്പ് മന്ത്രി ജി ആർ അനിൽ. ജനങ്ങൾക്ക് ആശ്വാസകരമായ രീതിയിൽ അവശ്യസാധനങ്ങളുടെ വില നിയന്ത്രിക്കാൻ സപ്ലൈകോയുടെ ഉത്സവ ഫെയറുകളിലൂടെ സാധിക്കുമെന്നും അദ്ദേഹം പറഞ്ഞു. 

സപ്ലൈകോയുടെ ക്രിസ്മസ് - പുതുവത്സര ഫെയറിന്റെ സംസ്ഥാനതല ഉദ്ഘാടനം പുത്തരിക്കണ്ടം നായനാർ പാർക്കിൽ നിർവഹിച്ചു സംസാരിക്കുകയായിരുന്നു മന്ത്രി. തിരുവനന്തപുരം പുത്തരിക്കണ്ടം മൈതാനം, കൊല്ലം ആശ്രാമം മൈതാനം, പത്തനംതിട്ട റോസ് മൗണ്ട് ഓഡിറ്റോറിയം, കോട്ടയം തിരുനക്കര മൈതാനം, എറണാകുളം മറൈൻഡ്രൈവ്, തൃശൂർ തേക്കിൻകാട് മൈതാനം എന്നിവിടങ്ങളിലാണ് പ്രധാന ഫെയറുകൾ നടക്കുന്നത്. 

കൂടാതെ സംസ്ഥാനത്തെ എല്ലാ താലൂക്കുകളിലും സപ്ലൈകോയുടെ തിരഞ്ഞെടുത്ത വിപണനശാലകളിൽ പ്രത്യേക ഫെയറുകൾ ഉണ്ടാകും. ഡിസംബർ 31 വരെയാണ് ഫെയറുകൾ പ്രവർത്തിക്കുക.

280-ൽ അധികം ഉൽപ്പന്നങ്ങൾക്ക് പ്രത്യേക ഓഫറുകളും ബ്രാൻഡഡ് നിത്യോപയോഗ സാധനങ്ങൾക്ക് അഞ്ചു മുതൽ 50 ശതമാനം വരെ വിലക്കുറവും ഫെയറുകളിൽ ലഭിക്കും. 20 കിലോഗ്രാം അരി 25 രൂപ നിരക്കിൽ ലഭ്യമാകും. 500 രൂപയ്ക്ക് മുകളിൽ സബ്‌സിഡി ഇതര സാധനങ്ങൾ വാങ്ങുന്നവർക്ക് ഒരു കിലോ ശബരി ഉപ്പ് ഒരു രൂപയ്ക്ക് നൽകും. 

സബ്‌സിഡി വെളിച്ചെണ്ണയുടെ വില ലിറ്ററിന് 10 രൂപ കുറച്ച് 309 രൂപയാക്കി. ഒരാൾക്ക് രണ്ട് ലിറ്റർ വരെ ഈ നിരക്കിൽ ലഭിക്കും. സബ്‌സിഡി ഇതര ശബരി വെളിച്ചെണ്ണയുടെ വില 20 രൂപ കുറച്ച് 329 രൂപയാക്കിയിട്ടുണ്ട്. 

ഉഴുന്ന്, കടല, വൻപയർ, തുവരപ്പരിപ്പ് എന്നിവയ്ക്ക് കിലോയ്ക്ക് രണ്ട് മുതൽ മൂന്ന് രൂപ വരെ വീണ്ടും കുറച്ചതായും ജനുവരി മാസത്തെ സബ്‌സിഡി സാധനങ്ങൾ മുൻകൂട്ടി വാങ്ങാൻ സൗകര്യമുണ്ടെന്നും മന്ത്രി അറിയിച്ചു.

ക്രിസ്മസിനോട് അനുബന്ധിച്ച് 'സാന്റ ഓഫർ' എന്ന പേരിൽ 12 ഉൽപ്പന്നങ്ങൾ അടങ്ങിയ പ്രത്യേക കിറ്റ് അവതരിപ്പിച്ചിട്ടുണ്ട്. കേക്ക്, പഞ്ചസാര, തേയില, പായസം മിക്സ്, ശബരി അപ്പം പൊടി, മസാലകൾ എന്നിവയടങ്ങിയ 667 രൂപയുടെ കിറ്റ് 500 രൂപയ്ക്ക് ലഭിക്കും. 

സപ്ലൈകോയുടെ പെട്രോൾ പമ്പുകളിൽ നിന്ന് 250 രൂപയ്ക്ക് ഇന്ധനം നിറയ്ക്കുന്ന ഇരുചക്ര വാഹനങ്ങൾക്കും ഓട്ടോറിക്ഷകൾക്കും, 1000 രൂപയ്ക്ക് മുകളിൽ ഇന്ധനം നിറയ്ക്കുന്ന മറ്റ് വാഹനങ്ങൾക്കും പ്രത്യേക കൂപ്പണുകൾ നൽകും. 

1000 രൂപയ്ക്ക് സബ്‌സിഡി ഇതര സാധനങ്ങൾ വാങ്ങുമ്പോൾ ഈ കൂപ്പൺ ഉപയോഗിച്ച് 50 രൂപ ഇളവ് നേടാം. സിഗ്‌നേച്ചർ മാർട്ട് എന്ന പേരിൽ അത്യാധുനിക ഷോപ്പിംഗ് മാളുകൾ തലശ്ശേരി, എറണാകുളം, കോട്ടയം എന്നിവിടങ്ങളിൽ ഉടൻ ആരംഭിക്കുമെന്നും മന്ത്രി പറഞ്ഞു.

വെള്ള, നീല റേഷൻ കാർഡുടമകൾക്ക് ജനുവരി മുതൽ സ്പെഷ്യൽ അരിയും 17 രൂപ നിരക്കിൽ രണ്ട് കിലോ വീതം ആട്ടയും വിതരണം ചെയ്യും. സംസ്ഥാന സർക്കാരിന്റെ ഇടപെടലിലൂടെ കേന്ദ്രം 6459 മെട്രിക് ടൺ ഗോതമ്പ് അനുവദിച്ചതിനാലാണ് ഇത് സാധ്യമായത്. 

അർഹരായ കുടുംബങ്ങൾക്ക് മുൻഗണനാ കാർഡിനായി അപേക്ഷിക്കാനുള്ള കാലാവധി ഡിസംബർ 31 വരെ നീട്ടിയിട്ടുണ്ട്. പൊതുവിപണിയിലെ വിലക്കയറ്റം നിയന്ത്രിക്കാൻ സർക്കാർ നടത്തുന്ന ഇടപെടലുകൾ ജനങ്ങൾ പരമാവധി പ്രയോജനപ്പെടുത്തണമെന്ന് മന്ത്രി അഭ്യർത്ഥിച്ചു.

സപ്ലൈകോയുടെ അൻപതാം വാർഷികത്തോടനുബന്ധിച്ച് മുൻ മാനേജിംഗ് ഡയറക്ടർമാരുടെ അനുഭവക്കുറിപ്പുകൾ അടങ്ങിയ സുവനീർ മന്ത്രി പ്രകാശനം ചെയ്തു. ചടങ്ങിൽ അഡ്വ. ആന്റണി രാജു എം എൽ എ അധ്യക്ഷത വഹിച്ചു. 

സപ്ലൈകോ മാനേജിംഗ് ഡയറക്ടർ ജയകൃഷ്ണൻ വി എം സ്വാഗതവും വാർഡ് കൗൺസിലർ എസ് കെ പി രമേഷ്, പൊതുവിതരണ കമ്മീഷണർ ഹിമ കെ, സപ്ലൈകോ അഡിഷണൽ ജനറൽ മാനേജർ എം ആർ ദീപു, മേഖലാ മാനേജർ സ്മിത തുടങ്ങിയവർ സംസാരിച്ചു.

ഈ വാർത്ത ഷെയർ ചെയ്യൂ. 

Article Summary: Minister G.R. Anil inaugurated Supplyco Christmas-New Year fairs across Kerala, offering discounts and special kits.

#Supplyco #ChristmasFair #KeralaNews #PriceControl #GRAnil #SpecialOffer