ഓടുന്ന ട്രെയിനിനു നേരെ കല്ലേറ്: 10 വയസുകാരന്റെ തലയോട്ടി പൊട്ടി

കൊച്ചി: എറണാകുളത്തു നിന്ന് ഗോവയിലേക്ക് പോവുകയായിരുന്ന മഡ്ഗാവ് എക്‌സ്പ്രസ് ട്രെയിനിനു നേരെയുണ്ടായ കല്ലേറില്‍ പത്തു വയസുകാരന്റെ തലയോട്ടിക്ക്  പൊട്ടി.

കണ്ണൂര്‍ സൂറാസ് വീട്ടില്‍ മുസ്തഫ റാസിയുടെ മകന്‍ അദ്‌നാന്‍ റാസിയുടെ തലയോട്ടിയാണ് കല്ലേറിനെ തുടര്‍ന്ന് പൊട്ടിയത്. ഗുരുതരമായി പരിക്കേറ്റ അദ്‌നാനെ കളമശേരിയിലെ  സ്വകാര്യ ആശുപത്രിയില്‍ ശസ്ത്രക്രിയയ്ക്ക് വിധേയനാക്കി.

കണ്ണൂര്‍ അഡ്വര്‍ട്ടൈസിംഗ് ഏജന്‍സീസ് അസോസിയേഷന്‍ ജില്ലാ ട്രഷററായ മുസ്തഫയും കുടുംബവും ആലപ്പുഴയില്‍ നടന്ന ഏജന്‍സിയുടെ കുടുംബസംഗമത്തില്‍ പങ്കെടുത്ത് തിരിച്ചുവരുമ്പോഴാണ് സംഭവം. തിങ്കളാഴ്ച ഉച്ചയ്ക്ക് 2.15 മണിയോടെ ട്രെയിന്‍ പേരണ്ടൂര്‍ കനാലിനടുത്തെത്തിയപ്പോഴാണ് കല്ലേറുണ്ടായത്.

ADNAN

ട്രെയിനിലെ ജനലിനരികിലുള്ള സീറ്റില്‍ ഇരിക്കുകയായിരുന്ന അദ്‌നാന്റെ തലയ്ക്ക് പിന്നില്‍ കല്ല് പതിച്ചതിനെ തുടര്‍ന്ന് തലയോട് പൊട്ടി രക്തം വാര്‍ന്നൊഴുകുകയായിരുന്നു. തുടര്‍ന്ന്  ആലുവയിലിറങ്ങിയ അദ്‌നാനും കുടുംബവും റെയില്‍വേ പ്രൊട്ടക്ഷന്‍ ഫോഴ്‌സിന്റെ (ആര്‍.പി.എഫ്) സഹായത്തോടെ ആലുവ ജനറല്‍ ആശുപത്രിയില്‍ പ്രഥമ ശുശ്രൂഷ നടത്തുകയായിരുന്നു.

പിന്നീട് നില ഗുരുതരമായതിനാല്‍ കളമശേരിയിലെ സ്വകാര്യ ആശുപത്രിയിലേക്ക് മാറ്റുകയായിരുന്നു. ആര്‍.പി.എഫ് കേസെടുത്ത് അന്വേഷണം ആരംഭിച്ചു. ഒരു തവണ മാത്രമാണ് ട്രെയിനിനു നേരെ കല്ലേറുണ്ടായതെന്ന് മുസ്തഫ പറഞ്ഞു.

സംഭവം നടന്ന ട്രാക്കിന് സമീപമുള്ള വല്ലാര്‍പാടം കണ്ടെയ്‌നര്‍ ടെര്‍മിനിലേക്കുള്ള വഴില്‍ സാമൂഹ്യവിരുദ്ധര്‍ സ്ഥിരമായി മദ്യപിക്കാറുണ്ട്.  ഇവരെ ചുറ്റിപ്പറ്റിയാണ് അന്വേഷണം നടക്കുന്നതെന്ന് റെയില്‍വേ പ്രൊട്ടക്ഷന്‍ ഫോഴ്‌സ് സി.ഐ. പ്രിന്‍സ് പറഞ്ഞു.
അധ്യാപകന്‍ മൊബൈലില്‍ ഫോട്ടോയെടുത്തതിനെ ചൊല്ലി കലോത്സവ പന്തലില്‍ സംഘര്‍ഷം