പൂക്കോട് വെറ്റിനറി കോളജ് വിദ്യാര്‍ഥി സിദ്ധാര്‍ത്ഥിന്റെ മരണം: എസ് എഫ് ഐയേയും സി പി എമ്മിനേയും വിമര്‍ശിച്ച് എഴുത്തുകാരന്‍ എന്‍ പ്രഭാകരന്‍

എന്‍ പ്രഭാകരന്റെ കുറിപ്പ് ഇവിടെ വായിക്കാം.

കഴിഞ്ഞ കുറച്ചു ദിവസങ്ങളായി ഞാന്‍ എഫ്ബിയില്‍ ഒന്നും എഴുതിയിരുന്നില്ല. അല്‍പകാലത്തേക്ക് വിട്ടുനിനില്‍ക്കാമെന്നു തീരുമാനിച്ചതായിരുന്നു. ആരെയും ഞെട്ടിക്കുന്ന ഒരു കൊലപാതകം കേരളത്തില്‍ നടന്നതിനു ശേഷവും മൗനം തുടരുന്നതില്‍ മന:സാക്ഷിക്കൂത്തനുഭവപ്പെട്ടതുകൊണ്ടു തന്നെയാണ് ആ തീരുമാനത്തില്‍ നിന്നുമാറി ഈ കുറിപ്പുമായി ഞാന്‍ വരുന്നത്.

വിദ്യാര്‍ത്ഥിജീവിതകാലത്ത് ഞാന്‍ എസ്എഫ്.ഐയുടെ പ്രവര്‍ത്തകനായിരുന്നു.അക്കാലത്തെ അനുഭവങ്ങളുടെ ഓര്‍മകള്‍ ഇപ്പോഴും എനിക്ക് പ്രിയപ്പെട്ടവ തന്നെയാണ്. പക്ഷേ, വയനാട്ടിലെ പൂക്കോട് വെറ്ററിനറി യൂനിവേഴ്‌സിറ്റിയിലെ സിദ്ധാര്‍ത്ഥന്‍ എന്ന വിദ്യാര്‍ത്ഥിയെ അതേ കോളേജിലെ എസ്.എഫ്.ഐക്കാര്‍,അതും ഹോസ്റ്റലില്‍ അവന്റെ റൂംമെയ്റ്റ്‌സായിരുന്നവര്‍ കൂടി ചേര്‍ന്ന്, ആള്‍ക്കൂട്ട വിചാരണ നടത്തി പട്ടിണിക്കിട്ട് മര്‍ദ്ദിച്ചു കൊലപ്പെടുത്തിയ സംഭവം ഒരു ന്യായീകരണവും സാധ്യമല്ലാത്ത അങ്ങേയറ്റം ഹീനമായ കൃത്യമാണെന്ന് പറയാതിരിക്കാന്‍ അത് കാരണമാവുകയേയില്ല.

ഏത് വിദ്യാര്‍ത്ഥിസംഘടനയായാലും പാര്‍ട്ടിയായാലും അതിന്റെ ഒരു യൂനിറ്റില്‍ പോലും ക്രിമിനലുകള്‍ക്ക് അധികാരം കയ്യാളാനാവുന്ന അവസ്ഥ രൂപപ്പെടുന്നുണ്ടെന്നു കണ്ടാല്‍ ഉടനടി ആ യൂനിറ്റിന്റെ പ്രവര്‍ത്തനം താല്‍ക്കാലികമായെങ്കിലും മരവിപ്പിക്കേണ്ടതാണ്. ഒരു സംഘടനയ്ക്കു മാത്രമേ ഒരു കോളേജില്‍ പ്രവര്‍ത്തിക്കാനാവൂ, ഒരു പാര്‍ട്ടിക്കു മാത്രമേ ഒരു രാജ്യത്ത് പ്രവര്‍ത്തന സ്വാതന്ത്ര്യം അനുവദിക്കപ്പെടുകയുള്ളൂ എന്നൊക്കെ വരുന്നത് ആ സംഘടനയെയും പാര്‍ട്ടിയെയും തന്നെ നശിപ്പിക്കുകയേയുള്ളൂ. ഇക്കാര്യം ചരിത്രം നമ്മെ ബോധ്യപ്പെടുത്തിക്കഴിഞ്ഞതാണെന്നും എന്‍ പ്രഭാകരന്‍ ചൂണ്ടിക്കാട്ടി.

Keywords:  Kannur, Kerala, Kannur-News, Kerala-News, Siddharth's death: Writer N Prabhakaran criticizes SFI and CPM