പാണ്ട്യാല ഗോപാലൻ മാസ്റ്ററെ പൊതുവേദിയിൽ വരെ നീതിരഹിതമായി ആക്രമിച്ച മകനാണ് ഷാജിയെന്ന് മാസ്റ്ററുടെ ശിഷ്യൻ ഗംഗാധരൻ ചെമ്പാടത്ത്

പാണ്ട്യാല ഗോപാലൻ മാഷ് ഞങ്ങളുടെ പാർടിയിലെ പ്രമുഖനായ നേതാവാണ്. പിണറായിയെ കമ്യൂണിസം പഠിപ്പിച്ചത് മാഷാണെന്ന് പറയുന്നത് ശരിയായാലും തെറ്റായാലും നിഷേധിക്കേണ്ട കാര്യമല്ല. എന്നാൽ സ്വന്തം പിതാവ് പഠിപ്പിച്ച കമ്യൂണിസമാണ് തന്റെ നേർക്ക് പ്രയോഗിച്ചത് എന്ന് ഷാജി പറയുന്നേടത്ത് പൊരുത്തക്കേടുണ്ട്. ആ ഗുരുത്വമില്ലായ്മ പൊതുവേദിയിൽ നിന്നുവരെ കേട്ടവരാണ് ഞങ്ങൾ. അച്ഛനും മകനും നല്ല ബന്ധമായിരുന്നില്ല. പൊതുപ്രസംഗങ്ങളിലടക്കം ഗോപാലൻ മാസ്റ്ററെ നീതിരഹിതമായി ആക്രമിച്ച മകനാണിത്. പിന്നെ, മകന് തല്ല് കിട്ടിയതറിഞ്ഞാൽ ഏതച്ഛനാണ് സങ്കടമില്ലാതിരിക്കുക?

എസ് എഫ് ഐയുടെ പൂർവരൂപമായ കെ എസ് എഫിലൂടെയാണ് താനും പൊതുപ്രവർത്തനം പഠിച്ചുതുടങ്ങിയത്. 1967-68ൽ പാതിരിയാട് കോട്ടയം (കണ്ണൂർ ജില്ല) രാജാസ് ഹൈസ്കൂളിൽ കെ എസ് എഫ് യൂനിറ്റ് സെക്രടറിയായിരുന്നു. കൂത്തുപറമ്പ് നിർമലഗിരി കോളജിലായിരുന്നു തുടർപഠനം. ആ കാമ്പസ് ഫെഡറേഷന് നിരോധിത മേഖലയായിരുന്നു അന്ന്. 1973ൽ അധ്യാപകനായി.

പാർടി അനുഭാവ അധ്യാപക സംഘടനയായ കെ എസ് ടി എയുടെ കൂത്തുപറമ്പ് സബ് ജില്ല കമിറ്റിയിൽ പ്രവർത്തിക്കുമ്പോൾ ഗോപാലൻ മാസ്റ്റർ കെ എസ് ടി എ കണ്ണൂർ ജില്ല കമിറ്റിയിലുണ്ടായിരുന്നു. ഷാജിയെ താൻ ഇതുവരെ നേരിട്ട് കണ്ടിട്ടില്ലെന്ന് 69കാരനായ ഗംഗാധരൻ മാഷ് പറഞ്ഞു. ഞങ്ങളുടെ വീടുകൾ തമ്മിൽ മൂന്ന്-നാല് കിലോമീറ്റർ ദൂരമേയുള്ളൂ. ഇനിയും കൂടുതൽ പറയാൻ കഴിയും. എന്നാൽ നേരറിവില്ലാത്ത കേട്ടുകേൾവിയിലേക്ക് പോവുന്നത് ശരിയല്ലല്ലോ - മാഷ് പറഞ്ഞു.