കനവ് കണ്ണൂർ

(KVARTHA) ഇംഗ്ലീഷ് സാഹിത്യത്തിലെ പ്രശസ്തനായ ഇന്ത്യൻ എഴുത്തുകാരൻ ആർ.കെ. നാരായൺ അന്തരിച്ചിട്ട് മെയ് 13 ന് 24 വർഷം തികഞ്ഞു. രാശിപുരം കൃഷ്ണസ്വാമി അയ്യർ നാരായണസ്വാമി എന്ന ആർ.കെ. നാരായൺ മാൽഗുഡി എന്ന സാങ്കല്പിക ലോകത്തിലെ കഥകളിലൂടെ ലക്ഷക്കണക്കിന് വായനക്കാരുടെ ഹൃദയം കവർന്ന എഴുത്തുകാരനാണ്.

വിധി ഒരുക്കിയ വൈചിത്ര്യമെന്ന് പറയട്ടെ, ബിരുദ പ്രവേശന പരീക്ഷയിൽ ഇംഗ്ലീഷ് സാഹിത്യത്തിൽ തോറ്റ ആർ.കെ. നാരായണനാണ് പിന്നീട് ഇംഗ്ലീഷ് ഭാഷയിൽ തന്റെ സർഗ്ഗാത്മക രചനകളിലൂടെ ലോകമെമ്പാടും ആരാധകരെ നേടിയത്. ആദ്യകാലത്ത് പ്രസാധകർ പുസ്തകങ്ങൾ നിരസിച്ചത് പതിവായിരുന്നെങ്കിലും, ഇന്ത്യയിൽ സാഹിത്യത്തിനുള്ള നോബൽ സമ്മാനത്തിന് ഏറ്റവും കൂടുതൽ തവണ നാമനിർദ്ദേശം ചെയ്യപ്പെട്ടതും അദ്ദേഹമാണ്.

നാരായണന്റെ കൃതികൾ മനുഷ്യജീവിതത്തെക്കുറിച്ചുള്ള ആഴത്തിലുള്ള ഉൾക്കാഴ്ചകൾ ലളിതവും മനോഹരവുമായ ഭാഷയിൽ അവതരിപ്പിക്കുന്നു. അദ്ദേഹത്തിൻ്റെ പല കഥകളുടെയും പശ്ചാത്തലം ദക്ഷിണേന്ത്യയിലെ സാങ്കല്പിക പട്ടണമായ മാൽഗുഡിയാണ്. 'സ്വാമി ആന്റ് ഫ്രണ്ട്സ്' എന്ന ആദ്യ നോവൽ മുതൽ അദ്ദേഹത്തിൻ്റെ മിക്ക കൃതികളും തനതായ വ്യക്തിത്വം പുലർത്തി.

1906 ഒക്ടോബർ 10ന് കർണാടകത്തിലെ ഒരു തമിഴ് ബ്രാഹ്മണ കുടുംബത്തിലാണ് ആർ.കെ. നാരായൺ ജനിച്ചത്. ഹൈസ്കൂൾ അധ്യാപകനായി ഔദ്യോഗിക ജീവിതം ആരംഭിച്ചെങ്കിലും അഞ്ചു ദിവസത്തിനകം രാജി വെച്ച് അദ്ദേഹം സാഹിത്യ രചനയിൽ മുഴുകി. പ്രശസ്ത കാർട്ടൂണിസ്റ്റ് ആർ.കെ. ലക്ഷ്മൺ അദ്ദേഹത്തിൻ്റെ ഇളയ സഹോദരനാണ്.

അൻപത് വർഷത്തിലധികം നീണ്ട സാഹിത്യ ജീവിതത്തിൽ ആർ.കെ. നാരായൺ പതിനാല് നോവലുകൾ, അഞ്ച് ചെറുകഥാ സമാഹാരങ്ങൾ, നിരവധി യാത്രാ വിവരണങ്ങൾ, ഗദ്യേതര കൃതികൾ, ഇന്ത്യൻ ഇതിഹാസങ്ങളുടെ സംക്ഷിപ്ത ഇംഗ്ലീഷ് പരിഭാഷകൾ, 'മൈ ഡേയ്സ്' എന്ന ഓർമ്മക്കുറിപ്പ് എന്നിവ രചിച്ചു.

അദ്ദേഹത്തിൻ്റെ ഏറ്റവും പ്രശസ്തമായ കൃതിയായ 'സ്വാമിയും കുട്ടികളും' സ്വാമിനാഥൻ എന്ന കുട്ടിയുടെ മനോഭാവങ്ങളെയും ചിന്തകളെയും ആഴത്തിൽ പഠിച്ച് രചിച്ചതാണ്. കുട്ടികളുടെ സൗഹൃദവും കലഹവും സ്കൂൾ ജീവിതത്തോടുള്ള വെറുപ്പും കളികളും വളരെ തന്മയത്വത്തോടെ ഈ നോവലിൽ അവതരിപ്പിക്കുന്നു. ഇന്ത്യൻ സ്വാതന്ത്ര്യ സമര പശ്ചാത്തലത്തിൽ രചിക്കപ്പെട്ട 'മഹാത്മാവിനെ കാത്ത്' എന്ന പ്രണയകഥ ഗാന്ധിയൻ ചിന്തകൾക്കും പ്രണയത്തിനും ഒരുപോലെ പ്രാധാന്യം നൽകുന്ന കൃതിയാണ്.

പത്മഭൂഷൺ, മരണാനന്തര ബഹുമതിയായ പത്മവിഭൂഷൺ തുടങ്ങിയ നിരവധി പുരസ്കാരങ്ങളും രാജ്യസഭാ അംഗത്വവും ലഭിച്ച ആർ.കെ. നാരായൺ 87-ാം വയസ്സുവരെ സാഹിത്യ രചനയിൽ സജീവമായിരുന്നു. 94-ാം വയസ്സിൽ, 2001-ൽ അദ്ദേഹം അന്തരിച്ചു.

ഈ പോസ്റ്റ് ഷെയർ ചെയ്യുക, നിങ്ങളുടെ അഭിപ്രായങ്ങൾ രേഖപ്പെടുത്തുക. 

Summary: Indian English literature's iconic figure R.K. Narayan, creator of Malgudi, passed away 24 years ago on May 13th. Despite failing his English entrance exam, he garnered global acclaim for his works, earning numerous accolades.

#RKNarayan, #IndianLiterature, #EnglishLiterature, #Malgudi, #LiteraryGenius, #Tribute