വൈദ്യുതി നിയന്ത്രണം; ജനങ്ങളെ മുൻകൂട്ടി അറിയിക്കണമെന്ന് കെഎസ്ഇബിക്ക് റെഗുലേറ്ററി കമീഷൻ്റെ കർശന നിർദേശം

തിരുവനന്തപുരം: (KVARTHA) ജനങ്ങളെ മുൻകൂട്ടി അറിയിക്കാതെ കെഎസ്ഇബിക്ക് തോന്നുംപടി വൈദ്യുതി നിയന്ത്രണം ഏർപ്പെടുത്താനാകില്ലെന്ന് വൈദ്യുതി റെഗുലേറ്ററി കമീഷൻ. ലോഡ് ഷെഡിങ് ഏർപ്പെടുത്തുന്ന സമയവും ദൈർഘ്യവും മുൻകൂട്ടി എസ്എംഎസ് അടക്കമുള്ള സംവിധാനങ്ങളിലൂടെ ജനങ്ങളെ അറിയിക്കണമെന്ന് കമീഷൻ നിർദേശിച്ചു. 

ഒരു വർഷത്തേക്ക് വൈദ്യുതി വാങ്ങാൻ അനുമതി നൽകുന്നതുമായി ബന്ധപ്പെട്ട് ജൂലൈ 18 ശനിയാഴ്ച നടന്ന തെളിവെടുപ്പിലാണ് കമീഷൻ ഈ കർശന നിർദേശം നൽകിയത്. ഇതിന് കെഎസ്ഇബി സമ്മതം അറിയിച്ചിട്ടുണ്ട്. ഒരേ പ്രദേശത്ത് ഒരാഴ്ച കഴിവതും ഒരേ സമയത്ത് നിയന്ത്രണം നടപ്പാക്കണമെന്നാണ് കമീഷൻ നിർദേശിച്ചിരിക്കുന്നത്. 

അടിയന്തര സാഹചര്യങ്ങളിൽ ഏതൊക്കെ ഫീഡറുകളിൽ വൈദ്യുതി നിയന്ത്രണം ഏർപ്പെടുത്തുമെന്ന വിവരം അതത് സെക്ഷൻ ഓഫീസുകൾ ജനങ്ങളെ അറിയിക്കണം. തത്സമയ വിപണിയിൽ നിന്ന് അധിക വൈദ്യുതി ലഭിക്കുകയോ ഉപഭോഗം കുറയുകയോ ചെയ്താൽ നിയന്ത്രണസമയം കുറയ്ക്കണമെന്നും നിർദേശിച്ചു. 

അടുത്ത ദിവസം എത്ര വൈദ്യുതി കുറവുണ്ടാകുമെന്ന് തലേദിവസം വൈകുന്നേരം തന്നെ കെഎസ്ഇബിക്ക് അറിയാനാകുമെന്നും ഉപഭോക്താക്കൾക്ക് എസ്എംഎസ് നൽകാനുള്ള സംവിധാനം ബോർഡിനുണ്ടെന്നും കമീഷൻ ചൂണ്ടിക്കാട്ടി.

കെഎസ്ഇബിക്ക് രൂക്ഷ വിമർശനം

വൈദ്യുതി വാങ്ങുന്നതിനുള്ള നടപടികളിൽ കാലതാമസം വരുത്തിയതിലും ആസൂത്രണത്തിലെ പിഴവുകളിലും കെഎസ്ഇബിക്കെതിരെ കമീഷൻ രൂക്ഷ വിമർശനം ഉന്നയിച്ചു. കൂടുതൽ വൈദ്യുതി വാങ്ങാനുള്ള ടെൻഡറുകൾ ജൂലൈ ഒന്നിന് സ്റ്റാൻഡിങ് കമ്മിറ്റിയും ജൂലൈ രണ്ടിന് കോർ കമ്മിറ്റിയും അംഗീകരിച്ചിട്ടും അനുമതിക്കായി കമീഷന് അപേക്ഷ നൽകിയത് 14 ദിവസം കഴിഞ്ഞാണ്. 

പവർ എക്സ്ചേഞ്ചിൽ വൈദ്യുതി ലഭ്യമായിരിക്കെ ലോഡ് ഷെഡിങ് ഏർപ്പെടുത്തിയതും വലിയ വീഴ്ചയാണെന്ന് കമീഷൻ കുറ്റപ്പെടുത്തി. യൂണിറ്റിന് 5.96 രൂപയ്ക്ക് 200 മെഗാവാട്ട് വൈദ്യുതി വാങ്ങുന്നതിലെ ലാഭനഷ്ടങ്ങൾ ബോർഡ് വിലയിരുത്തിയിട്ടില്ല. 

22 ചാർട്ടേഡ് അക്കൗണ്ടൻ്റുമാർ ജോലിചെയ്യുന്ന സ്ഥാപനത്തിന് അതിന് കഴിയാത്തതിൽ കമീഷൻ അതൃപ്തി അറിയിച്ചു. പകൽ വൈദ്യുതി ഉപഭോഗം കൂട്ടാൻ നിരക്കിൽ നൽകുന്ന 10 ശതമാനം ഇളവ് 25 ശതമാനമാക്കണമെന്ന് ആവശ്യപ്പെട്ടിട്ടും ഉദ്യോഗസ്ഥർ താല്പര്യം കാണിക്കുന്നില്ലെന്നും കമീഷൻ വിമർശിച്ചു.

വൈദ്യുതി വാങ്ങാൻ അനുമതി; നിയന്ത്രണം തുടരും

ഒരു വർഷത്തേക്ക് 840 കോടി രൂപ ചെലവിൽ 140 കോടി യൂണിറ്റ് വൈദ്യുതി വാങ്ങാൻ കമീഷൻ അനുമതി നൽകി. ജൂലൈ 19 ഞായറാഴ്ച മുതൽ വൈദ്യുതി വാങ്ങൽ ആരംഭിക്കുമെന്ന് കെഎസ്ഇബി അറിയിച്ചു. നല്ല മഴ ലഭിക്കുകയോ തത്സമയ വിപണിയിൽ നിന്ന് അതത് ദിവസത്തെ കുറവ് നികത്താൻ ആവശ്യത്തിന് വൈദ്യുതി ലഭിക്കുകയോ ചെയ്യാത്ത പക്ഷം നിലവിലെ നിയന്ത്രണം തുടരുമെന്നും ബോർഡ് വ്യക്തമാക്കി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക

Article Summary: Regulatory Commission asks KSEB to inform public in advance before load shedding.

#KSEB #KeralaPowerCrisis #ElectricityBoard #KeralaNews #Trivandrum #RegulatoryCommission #AmmuNews