ലിംഗവിവേചനമെന്ന ഹർജിക്കാരൻ്റെ വാദം തള്ളി; സ്ത്രീകൾക്കുള്ള സൗജന്യ യാത്രാ പദ്ധതിയായ 'പ്രിയദർശിനി' സർക്കാരിന് തുടരാമെന്ന് ഹൈകോടതി

കൊച്ചി: (KVARTHA) കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിച്ചുകൊണ്ടുള്ള സർക്കാരിൻ്റെ 'പ്രിയദർശിനി' പദ്ധതിയുമായി മുന്നോട്ട് പോകാമെന്ന് ഹൈകോടതി. സൗജന്യ യാത്രാ പദ്ധതി നിർത്തലാക്കണമെന്ന് ആവശ്യപ്പെട്ടുകൊണ്ട് സമർപ്പിച്ച പൊതുതാൽപര്യ ഹർജി ഹൈകോടതി ഡിവിഷൻ ബെഞ്ച് തള്ളി. കഴിഞ്ഞ ദിവസങ്ങളിൽ കോടതിയുടെ പരിഗണനയിൽ വന്ന ഹർജി വിധി പറയാനായി ജൂൺ 22 തിങ്കളാഴ്ചത്തേക്ക് മാറ്റുകയായിരുന്നു. ഇതിന് പിന്നാലെയാണ് പദ്ധതി തുടരാമെന്ന് ഡിവിഷൻ ബെഞ്ച് വ്യക്തമാക്കിയത്.

പ്രിയദർശിനി പദ്ധതി കേവലം രാഷ്ട്രീയ നേട്ടത്തിനുള്ള തെരഞ്ഞെടുപ്പ് വാഗ്ദാനമാണെന്നായിരുന്നു ഹർജിക്കാരൻ്റെ പ്രധാന വാദം. എന്നാൽ സർക്കാർ നൽകിയ വാക്ക് പാലിച്ചത് കണ്ടുകൂടെയെന്നും, ജനങ്ങൾക്ക് ഉപകാരപ്പെടുന്ന പദ്ധതി നിർത്തണമെന്ന് എങ്ങനെയാണ് പറയുകയെന്നും മുൻപ് വാദത്തിനിടെ കോടതി ഹർജിക്കാരനോട് ചോദിച്ചിരുന്നു. യാതൊരുവിധ ശാസ്ത്രീയ പഠനമോ സാമ്പത്തിക ആഘാതമോ വിലയിരുത്താതെയാണ് ഇത്തരമൊരു പദ്ധതി സർക്കാർ നടപ്പാക്കിയതെന്നും, ഇതിന് മുൻപായി ആവശ്യമായ പൊതുജനാഭിപ്രായ രൂപീകരണം നടത്തിയിട്ടില്ലെന്നും ഹർജിക്കാരൻ കോടതിയിൽ ചൂണ്ടിക്കാട്ടിയിരുന്നു.

രാഷ്ട്രീയ നേട്ടത്തിനായുള്ള തെരഞ്ഞെടുപ്പ് വാഗ്ദാനം അതേപടി നടപ്പിലാക്കിയതിലൂടെ സംസ്ഥാന സർക്കാരിന് പ്രതിവർഷം 800 കോടി രൂപയുടെ സാമ്പത്തിക ബാധ്യതയാണുണ്ടാകുകയെന്നും, ഇത് താങ്ങാൻ പറ്റാത്ത ഭാരമായി മാറുമെന്നും പൊതുതാൽപര്യ ഹർജിയിൽ ഉന്നയിച്ചിരുന്നു. കൂടാതെ പുരുഷന്മാരെയും സ്ത്രീകളെയും കേവലം ലിംഗത്തിൻ്റെ അടിസ്ഥാനത്തിൽ മാത്രം വേർതിരിക്കുന്നത് വിവേചനപരമാണെന്നും ഭരണഘടനാ വിരുദ്ധമാണെന്നും ഹർജിയിൽ ആരോപണമുണ്ടായിരുന്നു. പൊതുജനങ്ങളുടെ നികുതിപ്പണം ഉപയോഗിച്ച് ഭരണഘടനാ വിരുദ്ധമായി നടപ്പിലാക്കുന്ന ഈ പദ്ധതി റദ്ദാക്കണമെന്നും, കേസ് തീർപ്പാകുന്നത് വരെ പദ്ധതിയുടെ തുടർനടപടികൾ സ്റ്റേ ചെയ്യണമെന്നുമായിരുന്നു ഹർജിയിലെ പ്രധാന ആവശ്യം. എന്നാൽ ഈ വാദങ്ങളെല്ലാം തള്ളിക്കൊണ്ടാണ് ഡിവിഷൻ ബെഞ്ച് വിധി പ്രസ്താവിച്ചത്.

നാട്ടിലെ പ്രധാന വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The Kerala High Court dismissed a PIL against the Priyadarshini scheme, allowing the government to continue providing free KSRTC travel for women.

#KeralaHighCourt #PriyadarshiniScheme #KSRTC #KeralaGovernment #MalayalamNews #FreeTravel #AnjanaNews