Power Outage | കനത്ത മഴയും കാറ്റും: കണ്ണൂരിലെ വൈദ്യുതി പുനസ്ഥാപനം പൂര്ണമാകാന് 2 ദിവസം കൂടി വേണ്ടിവരുമെന്ന് കെ എസ് ഇ ബി
ജില്ലയിലെ ജനജീവനം കാര്യമായി താളം തെറ്റിയിരിക്കുകയാണ്
വൈദ്യുതി ജീവനക്കാര് 24 മണിക്കൂറും പ്രവര്ത്തിച്ച് കേടുപാടുകള് പരിഹരിക്കാനുള്ള ശ്രമത്തിലാണ്
കണ്ണൂര്: (KVARTHA) കനത്ത മഴയും കാറ്റും (Rain, Wind) കണ്ണൂര് ജില്ലയെ പിടികൂടിയതിനെ തുടര്ന്നുണ്ടായ വ്യാപകമായ വൈദ്യുതി തടസ്സം പൂര്ണമായും പരിഹരിക്കാന് രണ്ടു ദിവസം കൂടി വേണ്ടിവരുമെന്ന് കെ എസ് ഇ ബി (KSEB) അധികൃതര് അറിയിച്ചു.
ഡെപ്യൂട്ടി ചീഫ് എന്ജിനിയര് എം പി സുധീര് പറയുന്നത്:
കനത്ത മഴയും കാറ്റും കാരണം ജില്ലയിലെ വൈദ്യുതി ലൈനുകള്ക്കും ഉപകരണങ്ങള്ക്കും വ്യാപകമായ നാശനഷ്ടം സംഭവിച്ചു. ഇതില്, ആയിരക്കണക്കിന് വൈദ്യുതി തൂണുകള് ഒടിഞ്ഞുവീണു, ആയിരക്കണക്കിന് വൈദ്യുതി ട്രാന്സ്ഫോര്മറുകള് തകര്ന്നു.
കണ്ണൂര്, പയ്യന്നൂര്, തലശ്ശേരി, ഇരിട്ടി ഉള്പ്പെടെയുള്ള എല്ലാ പ്രദേശങ്ങളിലും വൈദ്യുതി തടസ്സം നേരിടുന്നതിനാല്, ജില്ലയിലെ ജനജീവനം കാര്യമായി താളം തെറ്റിയിരിക്കുകയാണ്. വൈദ്യുതി ജീവനക്കാര് 24 മണിക്കൂറും പ്രവര്ത്തിച്ച് കേടുപാടുകള് പരിഹരിക്കാനുള്ള ശ്രമത്തിലാണ്. എന്നാല്, വ്യാപകമായ നാശനഷ്ടം കാരണം പുനസ്ഥാപന പ്രവര്ത്തനങ്ങള്ക്ക് താമസം ഉണ്ടായിരിക്കുകയാണ്.
സംഭവത്തെ കുറിച്ച് കെ എസ് ഇ ബി അധികൃതര് പറയുന്നത്:
വൈദ്യുതി ലഭ്യത പുനസ്ഥാപിക്കുന്നതിന് ജനങ്ങളുടെ സഹകരണം അനിവാര്യമാണ്. വൈദ്യുതി ലൈനുകള്ക്ക് അടുത്ത് വസ്തുക്കള് ഇടാതിരിക്കുക, കേടുപാടുകള് കണ്ടെത്തിയാല് ഉടന് തന്നെ കെ എസ് ഇ ബിയെ അറിയിക്കുക തുടങ്ങിയ കാര്യങ്ങളില് ജനങ്ങള് ശ്രദ്ധിക്കണം.
വൈദ്യുതി തടസ്സം, ലൈന് തകരാര് എന്നിവ അറിയിക്കുന്നതിന് വേണ്ടി കെ എസ് ഇ ബിയുടെ കസ്റ്റമര് കെയര് നമ്പര് 9496001912 ല് ബന്ധപ്പെടാവുന്നതാണ്. അതുപോലെ കണ്ണൂര്, തലശ്ശേരി പ്രദേശങ്ങളിലെ വൈദ്യുതി തടസ്സം സംബന്ധിച്ച് കണ്ട്രോള് റൂം നമ്പര് 9496011176, പയ്യന്നൂര്, ഇരിട്ടി ഭാഗങ്ങളിലെ വൈദ്യുതി തടസ്സങ്ങള് അറിയിക്കുന്നതിന് ശ്രീകണ്ഠാപുരം കണ്ട്രോള് റൂം നമ്പര് 9496018618 ലും ബന്ധപ്പെടാവുന്നതാണ്.
