Jailbreak | കണ്ണൂര്‍ സെന്‍ട്രല്‍ ജയിലില്‍ മയക്കുമരുന്ന് തടവുകാരന്റെ ജയില്‍ചാട്ടം ആസൂത്രിതമെന്ന് പൊലീസ്; സിസിടിവി ദൃശ്യം ലഭിച്ചു

കണ്ണൂര്‍: (KVARTHA) എംഡിഎംഎ കേസിലെ പ്രതി എടക്കാട് പൊലീസ് സ്‌റ്റേഷന്‍ പരിധിയിലെ അർശാദിന്റേത് ആസൂത്രിത ജയില്‍ ചാട്ടമാണെന്നാണ് കണ്ണൂര്‍ ടൗണ്‍ പൊലീസിന്റെ പ്രാഥമിക അന്വേഷണത്തിൽ കണ്ടെത്തൽ. ജയില്‍ കവാടത്തിലെ ഗാന്ധി പ്രതിമയ്ക്കു സമീപമുളള പടവുകളില്‍ നിന്നും എല്ലാ ദിവസവും രാവിലെ പത്രക്കെട്ട് എടുത്തിരുന്നത് അർശാദായിരുന്നു. ജയില്‍ വെല്‍ഫെയര്‍ ഓഫീസിലായിരുന്നു നല്ല നടപ്പുകാരനായ ഇയാള്‍ ജോലി ചെയ്തിരുന്നത്. ജയില്‍ ലൈബ്രറിയുടെ ചുമതലക്കാരില്‍ ഒരാളും ഇയാളായിരുന്നു.
   
അതുകൊണ്ടു തന്നെ ജയിലിന്റെ പുറത്ത് കവാടത്തിലും കാന്റീനിലും പോകാനുളള സ്വാതന്ത്ര്യം ചിലപ്പോഴെക്കെ ഇയാള്‍ക്ക് ലഭിച്ചിരുന്നു. ഇത് ദുരുപയോഗം ചെയ്താണ് ഇയാള്‍ ജയില്‍ ചാട്ടത്തിനുളള ആസൂത്രണം നടത്തിയത്. ഞായറാഴ്ച പുലര്‍ച്ചെ ആറരയോടെ പത്രക്കെട്ട് എടുക്കുന്നതിനായി പുറത്തു പോയ ഇയാള്‍ നിമിഷനേരം കൊണ്ട് നേരത്തെ പറഞ്ഞതു പ്രകാരം റോഡരികില്‍ സ്റ്റാര്‍ടാക്കി നിര്‍ത്തിയിട്ട കൂട്ടാളിയുടെ ബൈകില്‍ കയറി കടന്നുകളയുകയായിരുന്നു.