പോലീസുകാരനെ കടിച്ച് വിലങ്ങുമായി കടന്ന 'എയ്ഡ്‌സ് രോഗി' ക്കായി അന്വേഷണം

Biju

കൊല്ലം: പോലീസുകാരനെ കടിച്ച ശേഷം എയ്ഡ്‌സ് രോഗിയാണെന്ന് പറഞ്ഞ് ഭീഷണിപ്പെടുത്തിയ ശേഷം വിലങ്ങുമായി രക്ഷപ്പെട്ട പ്രതിക്കു വേണ്ടി പോലീസ് അന്വേഷണം ഊര്‍ജിതമാക്കി. കൊട്ടിയം തഴുത്തല സ്വദേശി കിളി ബിജു എന്ന ബിജുവിനു (28) വേണ്ടിയാണ് അന്വേഷണം ഊര്‍ജിതമാക്കിയിരിക്കുന്നത്. കഴിഞ്ഞ ദിവസം രാത്രിയാണു സംഭവം. നിരവധി ക്രിമിനല്‍ കേസിലെ പ്രതിയായ ബിജുവിനെ കൊട്ടിയം എസ്.ഐ രാജേഷും സംഘവും കൊട്ടാരക്കരയില്‍ നിന്ന് അറസ്റ്റ് ചെയ്യുകയായിരുന്നു.

പോലീസ് ക്ലബില്‍ വിശദമായി ചോദ്യം ചെയ്തതിനുശേഷം കൊട്ടിയം സ്‌റ്റേഷനിലേക്കു കൊണ്ടു പോകുമ്പോള്‍ ജീപ്പില്‍ വെച്ച് പോലീസുകാരെ ആക്രമിക്കാനും ശ്രമിച്ചിരുന്നു. എ.ആര്‍. ക്യാമ്പിലെ സിവില്‍ പോലീസ് ഓഫിസറുടെ കാലില്‍ കടിച്ചുപറിച്ച ശേഷം താന്‍ എയ്ഡ്‌സ് രോഗിയാണെന്ന് പറഞ്ഞ് ഭീതിപരുത്തുകയായിരുന്നു.

ബിജുവിന്റെ രക്തം പരിശോധിക്കുന്നതിനായി കൊട്ടിയത്തെ സ്വകാര്യ ആശുപത്രിയിലെത്തിക്കുകയും പരിക്കേറ്റ പോലീസ് ഓഫിസര്‍ക്കു മരുന്നുവെച്ച് കെട്ടുന്നതിനുമിടെ ബിജു പോലീസിനെ കബളിപ്പിച്ച് വിലങ്ങുമായി രക്ഷപ്പെടുകയായിരുന്നു. ബിജുവിന് വേണ്ടി പോലീസ് വ്യാപകമായ അന്വേഷണമാണ് നടത്തിവരുന്നത്. തഴുത്തല ജംഗ്ഷനിലെ സുനില്‍ എന്നയാളെ തലയ്ക്കു വെട്ടി കൊലപ്പെടുത്താന്‍ ശ്രമിച്ച കേസുകളിലുള്‍പടെ നിരവധി ക്രിമിനല്‍ കേസുകളില്‍ പ്രതിയാണ് ബിജുവെന്ന് പോലീസ് വെളിപ്പെടുത്തി.