എല്‍ഡിഎഫിന് 10 സീറ്റ് കിട്ടുമോ? കബാലി സ്റ്റൈല്‍ മറുപടിയുമായി പിണറായി

കണ്ണൂര്‍: (www.kvartha.com 22.04.2019) എല്‍ഡിഎഫിന് 10 സീറ്റ് കിട്ടുമോ എന്ന മാധ്യമപ്രവര്‍ത്തകരുടെ ചോദ്യത്തിന് കബാലി സ്റ്റൈല്‍ മറുപടിയുമായി മുഖ്യമന്ത്രി പിണറായി വിജയന്‍. 10 അല്ല അതുക്കും മേലെ എന്നായിരുന്നു പിണറായിയുടെ മറുപടി. കഴിഞ്ഞ ദിവസം കണ്ണൂര്‍ പ്രസ് ക്ലബില്‍ നടന്ന മീറ്റ് ദ പ്രസിലായിരുന്നു സംഭവം.

പരിപാടിക്കിടെ പത്ത് സീറ്റ് കിട്ടുമോയെന്ന് മാധ്യമപ്രവര്‍ത്തകര്‍ ചോദിച്ചു. പത്തോ, അതുക്കും മേലെയെന്ന് ഉടന്‍ വന്നു ഉത്തരം. ജാതിഭേദവും മതദ്വേഷവുമില്ലാതെ സാഹോദര്യത്തോടെ കഴിയുന്ന നവോത്ഥാന കേരളത്തിന്റെ നിലനില്‍പ്പിനായാണ് കേരളത്തിലെ ജനങ്ങള്‍ വോട്ട് ചെയ്യുകയെന്നും മതനിരപേക്ഷ സര്‍ക്കാര്‍ നിലവില്‍ വരേണ്ടത് ആവശ്യമാണെന്ന് ജനങ്ങള്‍ക്ക് അറിയാമെന്നും അദ്ദേഹം പറഞ്ഞു.

ബിജെപി പ്രലോഭിപ്പിച്ചാല്‍ കൂടെപോകാത്തവരെ വേണം ജയിപ്പിക്കാന്‍ എന്ന് മുഖ്യമന്ത്രി ആഹ്വാനം ചെയ്തു. എന്തൊക്കെ കോപ്രായങ്ങള്‍ കാണിച്ചാലും ബിജെപി ജയിക്കില്ല എന്നും നിലവില്‍ കേരളാ സര്‍ക്കാരിന് ഒപ്പമാണ് ജനങ്ങള്‍ എന്നും അദ്ദേഹം പറഞ്ഞു.