പത്തനംതിട്ടയിലെ തിയറ്ററുകൾക്കെതിരെ ലീഗൽ മെട്രോളജി വിഭാഗം കേസെടുത്തു; പോപ്‌കോൺ, കോഫി എന്നിവയുടെ അളവിൽ കുറവ് കണ്ടെത്തിയതിനെ തുടർന്നാണ് നടപടി

പത്തനംതിട്ട: (KVARTHA) പത്തനംതിട്ടയിലെ ധന്യ, രമ്യ സിനിമാ തിയറ്ററുകൾക്കെതിരെ ലീഗൽ മെട്രോളജി വിഭാഗം കേസെടുത്തു. തിയറ്ററുകളിൽ നടത്തിയ മിന്നൽ പരിശോധനയ്ക്ക് പിന്നാലെയാണ് കേസ്. പോപ്‌കോൺ, കോഫി എന്നിവയുടെ അളവിൽ വ്യാപകമായ കുറവ് കണ്ടെത്തിയതിനെ തുടർന്നാണ് അധികൃതർ കേസെടുത്തത്. 

മീഡിയം, സ്മാൾ വിഭാഗങ്ങളിലായായിരുന്നു പോപ്‌കോൺ വിൽപ്പനയ്ക്ക് വെച്ചിരുന്നത്. ഇതിൽ മീഡിയത്തിൽ 70 ഗ്രാം എന്നാണ് രേഖപ്പെടുത്തിയിരുന്നതെങ്കിലും തൂക്കം നോക്കിയപ്പോൾ 51 ഗ്രാം മാത്രമാണ് ഉണ്ടായിരുന്നത്. സ്മാൾ വിഭാഗത്തിൽ 55 ഗ്രാം എന്ന് രേഖപ്പെടുത്തിയിരുന്നതിൽ 41 ഗ്രാം പോപ്‌കോൺ മാത്രമാണ് ലഭിച്ചത്. 

കോഫി 180 മില്ലി എന്ന് രേഖപ്പെടുത്തിയിരുന്നിടത്ത് ഉണ്ടായിരുന്നത് വെറും 105 മില്ലി മാത്രമായിരുന്നു. തുടർന്നാണ് ധന്യ, രമ്യ തിയറ്ററുകൾക്കെതിരെ ലീഗൽ മെട്രോളജി വിഭാഗം കേസ് രജിസ്റ്റർ ചെയ്തത്.

ട്രിനിറ്റി തിയറ്ററിന് നോട്ടീസ്

അതേസമയം പത്തനംതിട്ടയിലെ തന്നെ ട്രിനിറ്റി തിയറ്ററിലും ഉദ്യോഗസ്ഥർ പരിശോധന നടത്തി. ഇവിടെ ഭക്ഷണത്തിൽ അളവ് കൃത്യമായിരുന്നെങ്കിലും വില നിലവാര ബോർഡ് സ്ഥാപിക്കാത്തതിന് ട്രിനിറ്റി തിയറ്ററിന് അധികൃതർ നോട്ടീസ് നൽകി. എന്നാൽ തിയറ്ററിലെ ഭക്ഷ്യ വിൽപ്പന കരാറുകാരനെയാണ് ഏൽപിച്ചിരുന്നതെന്ന് തിയറ്റർ ഉടമകൾ ലീഗൽ മെട്രോളജി വിഭാഗത്തോട് വ്യക്തമാക്കിയിട്ടുണ്ട്.

സിനിമ കാണാനെന്ന വ്യാജേന പരിശോധന

ലീഗൽ മെട്രോളജി വിഭാഗവും സിവിൽ സപ്ലൈസും സംയുക്തമായാണ് വെള്ളിയാഴ്ച (സെപ്റ്റംബർ 11) പത്തനംതിട്ടയിലെ തിയറ്ററുകളിൽ മിന്നൽ പരിശോധന നടത്തിയത്. ആദ്യം ഉദ്യോഗസ്ഥർ സിനിമ കാണാൻ എന്ന രീതിയിൽ ആളുകളോടൊപ്പം രഹസ്യമായി തിയറ്ററിൽ കയറുകയായിരുന്നു. 

തുടർന്ന് പുറത്തിറങ്ങി ഭക്ഷണ പദാർഥങ്ങൾ വാങ്ങി. ഇതിന് പിന്നാലെയാണ് കൂടുതൽ ഉദ്യോഗസ്ഥർ തിയറ്റർ കോംപ്ലക്സിനുള്ളിലേക്ക് ഔദ്യോഗിക വാഹനത്തിൽ എത്തിയത്. തുടർന്ന് വിശദമായ പരിശോധന നടത്തുകയായിരുന്നു. പോപ്‌കോണും കോഫിയുമാണ് സംഘം പ്രധാനമായും പരിശോധിച്ചത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: The Legal Metrology department filed a case against Dhanya and Ramya theatres in Pathanamthitta for selling under-weighed popcorn and coffee, following a sting operation on Friday, September 11, 2026, while Trinity theatre was issued a notice for lacking a price board.

#Kvartha #Pathanamthitta #LegalMetrology #TheatreFoodScam #DhanyaRamyaTheatre #KeralaNews #MalayalamNews #CivilSupplies #AmmuNews