പത്തനംതിട്ട: (KVARTHA) നാടിനെ ഞെട്ടിച്ച് വാഹനാപകടത്തിൽ നാല് പേർ മരിച്ച ദുരന്തത്തിന് കാരണം ഡ്രൈവർ ഉറങ്ങിപ്പോയതാകാമെന്ന് പൊലീസിന്റെ പ്രാഥമിക നിഗമനം. അപകടത്തിൽ റോഡിന്റെ അശാസ്ത്രീയ നിർമാണവും ഒരു കാരണമായിരിക്കാമെന്ന സംശയവും പ്രദേശവാസികൾ ഉന്നയിച്ചിട്ടുണ്ട്. 

പുനലൂർ-മൂവാറ്റുപുഴ സംസ്ഥാനപാതയിൽ കലഞ്ഞൂർ മുറിഞ്ഞകല്ലിൽ സംഭവിച്ച അപകടത്തിൽ, ശബരിമല തീർഥാടകർ സഞ്ചരിച്ച ബസിലേക്ക് കാർ ഇടിച്ചുകയറുകയായിരുന്നു. കാർ യാത്രക്കാരായ കുമ്പഴ മല്ലശ്ശേരി സ്വദേശികളായ നിഖിൽ മത്തായി, ഭാര്യ അനു നിഖിൽ, നിഖിലിൻ്റെ പിതാവ് മത്തായി ഈപ്പൻ, അനുവിൻ്റെ പിതാവ് ബിജു പി ജോർജ് എന്നിവരാണ് അപകടത്തിൽ മരിച്ചത്.

ഡ്രൈവർ ഉറങ്ങിപ്പോയതാകാം അപകടകാരണമെന്നാണ് എംവിഡിയുടെയും പൊലീസിൻറെയും വിലയിരുത്തലെന്ന് ഗതാഗത മന്ത്രി കെ ബി ഗണേഷ് കുമാർ വ്യക്തമാക്കി. അടുത്തിടെയായി അപകടങ്ങൾ വർധിക്കുകയാണ് എന്നും ഇക്കാര്യം മുഖ്യമന്ത്രിയുടെ ശ്രദ്ധയിൽപ്പെടുത്തിയിട്ടുണ്ടെന്നും മന്ത്രി കൂട്ടിച്ചേർത്തു.

അപകടത്തിൽ പ്രതികരിച്ച കെ യു ജനീഷ് കുമാർ എംഎൽഎ, രണ്ടാഴ്ച മുമ്പ് നടന്ന നിഖിലിൻ്റെയും അനുവിൻ്റെയും വിവാഹത്തിൽ താനും പങ്കെടുത്തിരുന്നുവെന്നും ഈ സംഭവം തന്നെ വല്ലാതെ വേദനിപ്പിച്ചുവെന്നും പറഞ്ഞു. റോഡിന്റെ നിർമാണം പൂർത്തിയായി വരുന്നതേ ഉള്ളൂ. ടാറിംഗ് കഴിഞ്ഞത് മുതൽ എല്ലാ വാഹനങ്ങളും ഇത് വഴിയാണ് വരുന്നത്. മുന്നറിയിപ്പ് ബോർഡ് സ്ഥാപിച്ചു വരികയാണ്. റോഡ് നല്ല നിലയിൽ കിടക്കുന്നത് കൊണ്ടുതന്നെ വാഹനങ്ങൾ അമിത വേഗതയിൽ വരാറുണ്ടെന്ന് നാട്ടുകാർ പറയുന്നതായും അദ്ദേഹം കൂട്ടിച്ചേർത്തു. 

റോഡ് സുരക്ഷ എത്രത്തോളം പ്രധാനമാണെന്നാണ് ഈ അപകടം നമ്മെ ഓർമ്മിപ്പിക്കുന്നതെന്ന് വിദഗ്ധർ പ്രതികരിച്ചു. റോഡുകൾ ശാസ്ത്രീയമായി നിർമിക്കുക, ഡ്രൈവർമാർക്ക് അവബോധം നൽകുക, വാഹനങ്ങൾ പരിശോധിക്കുക തുടങ്ങിയ കാര്യങ്ങളിലൂടെ അപകടങ്ങൾ കുറയ്ക്കാൻ സാധിക്കും. അധികൃതർ ഈ വിഷയത്തിൽ കൂടുതൽ ശ്രദ്ധ കേന്ദ്രീകരിക്കേണ്ടത് അനിവാര്യമാണെന്നും ഇവർ ചൂണ്ടിക്കാട്ടുന്നു.

#PathanamthittaAccident #DriverFatigue #RoadSafety #FatalAccident #KeralaRoads #Investigation