കണ്ണൂർ: (KVARTHA) റെയിൽവേ സ്റ്റേഷനിൽ നിന്ന് ട്രെയിനിൽ കയറാൻ ശ്രമിക്കുന്നതിനിടെ കാൽ വഴുതി വീണ് യാത്രക്കാരൻ മരിച്ചു. നാറാത്ത് സ്വദേശി കുഞ്ഞി മടലികത്ത് ഹൗസിൽ പി. ഖാസിം (62) ആണ് മരിച്ചത്.

വെള്ളിയാഴ്ച ഉച്ചയ്ക്ക് 2.50-ന് കണ്ണൂരിൽ നിന്ന് എറണാകുളത്തേക്ക് പുറപ്പെടുകയായിരുന്ന ഇൻ്റർസിറ്റി എക്സ്പ്രസ്സിൽ കയറാൻ ശ്രമിക്കുമ്പോഴാണ് അപകടം സംഭവിച്ചത്. പ്ലാറ്റ്‌ഫോമിനും ട്രെയിനിനുമിടയിൽ അകപ്പെട്ട ഖാസിമിനെ ഉടൻ തന്നെ പുറത്തെടുത്ത് ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

റെയിൽവേ അധികൃതർ നൽകുന്ന വിവരമനുസരിച്ച്, പ്ലാറ്റ്‌ഫോം ഒന്നിൽ കോച്ച് മൂന്നിന് സമീപമായിരുന്നു അപകടം. ട്രെയിൻ പുറപ്പെടുന്നതിന് തൊട്ട് മുമ്പ് തന്നെ ഖാസിം ട്രെയിനിൽ കയറാൻ ശ്രമിച്ചിരുന്നുവെങ്കിലും, ഈ സമയം കാൽ വഴുതി പ്ലാറ്റ്‌ഫോമിനും ട്രെയിനിനുമിടയിൽ വീഴുകയായിരുന്നു. അദ്ദേഹത്തോടൊപ്പം മറ്റാരും ഉണ്ടായിരുന്നില്ല. ട്രെയിൻ നീങ്ങിയതോടെ രക്ഷാപ്രവർത്തനം വൈകുകയും മരണം സംഭവിക്കുകയുമായിരുന്നു.

അപകടത്തിൽ ഖാസിമിന്റെ ഫോൺ തകർന്നുപോയതിനാൽ, മരിച്ചയാളെ തിരിച്ചറിയാൻ കുറച്ച് സമയമെടുത്തു. മറ്റു യാത്രക്കാരാണ് ട്രെയിനിനും പ്ലാറ്റ്‌ഫോമിനുമിടയിൽ നിന്ന് ഖാസിമിനെ പുറത്തെടുത്തത്. റെയിൽവേ പോലീസാണ് തുടർന്ന് അദ്ദേഹത്തെ ആശുപത്രിയിലേക്ക് മാറ്റിയത്. കണ്ണൂര്‍ നാറാത്ത് മടത്തികൊവ്വല്‍ താമസിച്ചിരുന്ന ഖാസിം ഈയടുത്തായി കമ്പില്‍ പാട്ടയം ലീഗ് ഓഫിസിനു സമീപത്താണ് താമസം.

സംഭവത്തെക്കുറിച്ച് റെയിൽവേ പോലീസ് അന്വേഷണം ആരംഭിച്ചിട്ടുണ്ട്.

#TrainAccident, #Kannur, #PassengerDeath, #RailwayAccident, #KeralaNews, #PlatformFall