ലുലു മാളിൽ നിന്നും ഓല ടാക്സി വിളിച്ച പെൺകുട്ടി ഇ വാലറ്റ് വഴി പണമടക്കാൻ ശ്രമിച്ചു, പണം ലിക്വിഡ് ആയി തന്നെ വേണമെന്ന് വാശി പിടിച്ച ഡ്രൈവർ യുവതിയുടെ മുഖത്തടിക്കുകയും ചീത്ത വിളിക്കുകയും ചെയ്തതായി ആരോപണം; പരാതിയിൽ പോലീസ് കേസെടുത്തു

കൊച്ചി: (www.kvartha.com 07.07.2017) ടാക്സി വിളിച്ച പെൺകുട്ടിക്ക് നേരെ ഓല ടാക്സി ഡ്രൈവറുടെ അക്രമണം. ലുലു മാളിൽ നിന്നും വാഹനത്തിൽ കയറിയ യുവതി ഇ വാലറ്റ് വഴി പണം നൽകാൻ ശ്രമിച്ചപ്പോഴായിരുന്നു ഡ്രൈവർ മുഖത്തടിക്കുകയും ചീത്ത വിളിക്കുകയും ചെയ്തത്. ബംഗളൂരു ഡിജിറ്റിൽ മാർക്കറ്റിംഗ് മാനേജറും മാവേലിക്കര സ്വദേശിനിയുമായ അവേത തമ്പാട്ടിയുടെ പരാതിയിൽ ഡ്രൈവർ വിനു കെ ബിക്കെതിരെ പോലീസ് കേസെടുത്തു. പ്രശ്നം ശ്രദ്ധയിൽ പെട്ട കമ്പനി അധികൃതർ ഇയാളെ ജോലിയിൽ നിന്നും സസ്‌പെൻഡ് ചെയ്യുകയും ചെയ്തു. പനമ്പള്ളി നഗറിൽ ചൊവ്വാഴ്‌ച രാത്രിയാണ് സംഭവം.

ലുലു മാളിൽ നിന്നും യാത്രക്കായി ഓല ടാക്സി വിളിച്ച പെൺകുട്ടി യാത്രാ കൂലിയായി 247 രൂപ ഇ വാലറ്റ് വഴി നൽകാൻ ശ്രമിച്ചതാണ് പ്രശ്നത്തിന് കാരണമെന്ന് പോലീസ് പറഞ്ഞു. തനിക്ക് പണം ലിക്വിഡ് ആയി തന്നെ വേണമെന്നും ഇലക്ട്രോണിക് മണി സ്വീകരിക്കില്ലെന്നും വിനു പറഞ്ഞു.




തന്റെ കയ്യിൽ വേറെ പണമില്ലെന്നും വേണമെങ്കിൽ നിങ്ങൾ കമ്പനിയുമായി ബന്ധപ്പെട്ടോളൂ എന്നും പറഞ്ഞപ്പോൾ ഡ്രൈവർ ചീത്ത വിളിക്കുകയായിരുന്നു. ഇയാളുടെ വീഡിയോ എടുക്കാൻ ശ്രമിച്ചപ്പോൾ മുഖത്തടിച്ചെന്നും പരാതിയിൽ പറയുന്നു. തുടർന്ന് ബുധനാഴ്ച രാവിലെ തേവര പോലീസ് സ്റ്റേഷനിൽ പരാതി നൽകി. ഐ പി സി സെക്ഷൻ 354 പ്രകാരം ഡ്രൈവർക്കെതിരെ പോലീസ് കേസെടുത്തു.