O R Kelu | കെ രാധാകൃഷ്ണന് പകരം ഒ ആര് കേളു പിണറായി മന്ത്രിസഭയില് അംഗമാകും; പട്ടികജാതി പട്ടികവര്ഗ ക്ഷേമ വകുപ്പാകും കൈകാര്യം ചെയ്യുക
വയനാട് ജില്ലയില് നിന്ന് സിപിഎം സംസ്ഥാന സമിതിയിലെത്തിയ ആദ്യ പട്ടികവര്ഗ നേതാവാണ് ഒആര് കേളു
കുറിച്യ സമുദായക്കാരനായ കേളു പട്ടികജാതി-പട്ടികവര്ഗ പിന്നോക്ക ക്ഷേമം സംബന്ധിച്ച നിയമസഭ സമിതിയുടെ ചെയര്മാന് കൂടിയാണ്
രണ്ട് പതിറ്റാണ്ടിലേറെയായി ജനപ്രതിനിധിയെന്ന നിലയില് സജീവ സാന്നിധ്യമാണ്
തിരുവനന്തപുരം: (KVARTHA) ലോക് സഭയിലേക്ക് തിരഞ്ഞെടുക്കപ്പെട്ട കെ രാധാകൃഷ്ണന് പകരം ഒആര് കേളു പിണറായി മന്ത്രിസഭയില് അംഗമാകും. മാനന്തവാടി എംഎല്എയായ കേളു പട്ടികജാതി പട്ടികവര്ഗ ക്ഷേമ വകുപ്പാകും കൈകാര്യം ചെയ്യുക എന്നാണ് അറിയുന്നത്. അതേസമയം, കേരള മന്ത്രി സഭയില് ചെറിയ മാറ്റങ്ങളും ഉണ്ടാവും.
രാധാകൃഷ്ണന് കൈകാര്യം ചെയ്തിരുന്ന ദേവസ്വം വകുപ്പ് വിഎന് വാസവനും പാര്ലമെന്ററി കാര്യം എംബി രാജേഷും കൈകാര്യം ചെയ്യും.
ലോക് സഭാ എംപിയായി രാധാകൃഷ്ണന് തിരഞ്ഞെടുക്കപ്പെട്ടതോടെയാണ് മന്ത്രിസ്ഥാനവും എംഎല്എ സ്ഥാനവും രാജിവെച്ചത്. പട്ടികജാതി വികസനം, ദേവസ്വം തുടങ്ങിയ പ്രധാന വകുപ്പുകളാണ് കെ രാധാകൃഷ്ണന് കൈകാര്യം ചെയ്തിരുന്നത്. ആലത്തൂരില് നിന്നാണ് അദ്ദേഹം തിരഞ്ഞെടുക്കപ്പെട്ടത്.
കേരളത്തില് വിജയിച്ച സിപിഎമിന്റെ ഏക സ്ഥാനാര്ഥിയാണ് കെ രാധാകൃഷ്ണന്. സ്ഥാനമൊഴിയുന്നതിന് തൊട്ടുമുമ്പ് പട്ടിക വിഭാഗക്കാര് കൂടുതലായി താമസിക്കുന്ന സ്ഥലങ്ങളുടെ പേരുകള് മാറ്റാനുള്ള ഉത്തരവില് രാധാകൃഷ്ണന് ഒപ്പിട്ടിരുന്നു.
കോളനി, സങ്കേതം, ഊര് എന്നീ പേരുകള് ഒഴിവാക്കും. സ്ഥാനമൊഴിയുന്നതിന് തൊട്ടുമുമ്പാണ് ഉത്തരവ് പുറത്തിറക്കിയത്. കോളനി എന്ന പേര് അവമതിപ്പ് ഉണ്ടാക്കുന്നു എന്ന വിലയിരുത്തലിന്റെ അടിസ്ഥാനത്തിലാണ് പേരുമാറ്റം സംബന്ധിച്ച നിര്ദേശം. കോളനി, സങ്കേതം, ഊര് എന്നീ പേരുകള്ക്ക് പകരം കാലാനുസൃതമായി മറ്റ് പേരുകള് നല്കണമെന്ന് പട്ടികജാതി വികസന വകുപ്പ് ഡയറക്ടര് സര്കാറിനോട് ശുപാര്ശ ചെയ്തിരുന്നു.
വയനാട് ജില്ലയില് നിന്ന് സിപിഎം സംസ്ഥാന സമിതിയിലെത്തിയ ആദ്യ പട്ടികവര്ഗ നേതാവാണ് ഒആര് കേളു. കുറിച്യ സമുദായക്കാരനായ കേളു പട്ടികജാതി-പട്ടികവര്ഗ പിന്നോക്ക ക്ഷേമം സംബന്ധിച്ച നിയമസഭ സമിതിയുടെ ചെയര്മാന് കൂടിയാണ്. രണ്ടു പതിറ്റാണ്ടിലേറെയായി ജനപ്രതിനിധിയെന്ന നിലയില് കേളു സജീവ സാന്നിധ്യമാണ്.
തിരുനെല്ലി ഗ്രാമപഞ്ചായതിലെ ഇടയൂര്ക്കുന്ന് വാര്ഡില് നിന്ന് 2000ല് ഗ്രാമപഞ്ചായത് അംഗമായാണ് തുടക്കം. തുടര്ന്ന് 2005ലും 2010ലുമായി 10 വര്ഷം തിരുനെല്ലി ഗ്രാമപഞ്ചായത് പ്രസിഡന്റായി. പിന്നീട് 2015ല് തിരുനെല്ലി ഡിവിഷനില്നിന്നും മാനന്തവാടി ബ്ലോക് പഞ്ചായത് അംഗം. 2016ലെ നിയമസഭാ തിരഞ്ഞെടുപ്പില് മന്ത്രിയായിരുന്ന പികെ ജയലക്ഷ്മിയെ തോല്പിച്ച് മാനന്തവാടി നിയോജക മണ്ഡലം എംഎല്എയായി. 2021ലും വിജയം ആവര്ത്തിച്ചു.
