Wayanad | കാണാമറയത്തെ മനുഷ്യരെ കണ്ടെത്താനുള്ള അന്വേഷണത്തിൽ പുതിയ നാഴികക്കല്ല്

വയനാട്: (KVARTHA) മേപ്പാടി ചൂരൽമല ഉരുൾപൊട്ടൽ ദുരന്തത്തിൽ കാണാതായവരെ കണ്ടെത്താനുള്ള അന്വേഷണത്തിന് പുതിയൊരു വഴിത്തിരിവായിരിക്കുകയാണ് ജില്ലാ ഭരണകൂടം തയ്യാറാക്കിയ കാണാതായവരുടെ പട്ടിക. ശാസ്ത്രീയമായ മാർഗങ്ങൾ ഉപയോഗിച്ച് വിവിധ ഏജൻസികളെ ഏകോപിപ്പിച്ച് നടത്തിയ കഠിന പരിശ്രമത്തിനൊടുവിലാണ് ഈ പട്ടിക തയ്യാറായത്.

അസിസ്റ്റന്റ് കലക്ടർ എസ്. ഗൗതം രാജിന്റെ നേതൃത്വത്തിലാണ് ഈ ഭീമമായ ദൗത്യം പൂർത്തിയാക്കിയത്. റേഷൻ കാർഡ് വിവരങ്ങൾ, സ്കൂൾ രേഖകൾ, ഐസിഡിഎസ് വിവരങ്ങൾ, ലേബർ ഓഫീസിലെ രേഖകൾ തുടങ്ങിയ വിവിധ സ്രോതസ്സുകളിൽ നിന്നുള്ള വിവരങ്ങൾ ശേഖരിച്ച് അടിസ്ഥാന രേഖ തയ്യാറാക്കി. തുടർന്ന് ബ്ലോക്ക് ലെവൽ ഓഫീസർമാർ, ആശ വർക്കർമാർ, അങ്കണവാടി പ്രവർത്തകർ, ജനപ്രതിനിധികൾ എന്നിവരെ ഉൾപ്പെടുത്തി വിപുലമായ ചർച്ചകൾ നടത്തി.

കാണാതായവരുടെ പട്ടിക പഞ്ചായത്തിലും സ്‌കൂളിൽ നിന്നും ലേബർ ഓഫീസിൽ നിന്നും ശേഖരിച്ചു. ജില്ലാ ദുരന്ത നിവാരണ അതോറിറ്റിയുടെ കോൾ സെന്ററിൽ ലഭ്യമായ വിവരങ്ങളും ഇതോടൊപ്പം ചേർത്തു. ക്യാമ്പിലേക്ക് മാറിയവരുടെ വിവരങ്ങളും ആരോഗ്യ വകുപ്പിൽ നിന്നും പൊലീസിൽ നിന്നും മരണമടഞ്ഞവരുടെ വിവരങ്ങളും ഈ പട്ടികയിൽ നിന്ന് ഒഴിവാക്കി. ബന്ധുവീടുകളിലും മറ്റും ഉള്ളവരുടെ വിവരങ്ങളും ജനപ്രതിനിധികളും മുൻ ജനപ്രതിനിധികളും ആശ വർക്കർമാരും നൽകി. ഇതെല്ലാം ഒഴിവാക്കി കാണാതായവരുടെ ആദ്യ കരട് പട്ടിക തയ്യാറാക്കി.

ഗൂഗിൾ സ്‌പ്രെഡ് ഷീറ്റ് വഴി ദിവസേന അപ്‌ഡേറ്റ് ചെയ്യുന്ന ഈ പട്ടികയിൽ റേഷൻകാർഡ് നമ്പർ, വിലാസം, ബന്ധുക്കളുടെ പേര്, ഫോണ്‍ നമ്പർ, ചിത്രം എന്നിവയടങ്ങിയതാണ്. പൊതുജനങ്ങൾക്ക് ഈ കരട് പട്ടിക പരിശോധിച്ച് വിലയേറിയ വിവരങ്ങൾ ജില്ലാ ഭരണകൂടത്തിനെ അറിയിക്കാം. നിരന്തരമായ നിരീക്ഷണത്തിലൂടെ ഈ പട്ടിക ശുദ്ധീകരിച്ചായിരിക്കും കാണാതായവരുടെ അന്തിമ പട്ടിക പുറത്തിറക്കുക.
ജില്ലാ ഭരണകൂടത്തിന്റെ https://wayanad(dot)gov(dot)in/ എന്ന ഔദ്യോഗിക വെബ്‌സൈറ്റിലും ജില്ലാ കലക്ടർ തുടങ്ങിയവരുടെ സമൂഹമാധ്യമ അക്കൗണ്ടുകളിലും പൊതുഇടങ്ങളിലും മാധ്യമങ്ങളിലൂടെയും കരട് പട്ടിക ലഭ്യമാകും. മുണ്ടക്കൈ ചൂരൽമല ഉരുൾപൊട്ടൽ ദുരന്തത്തിൽ കാണാതായവരെ സംബന്ധിച്ച് പട്ടിക പരിഷ്‌ക്കരിക്കുന്നതിനായി പൊതുജനങ്ങൾക്ക് 8078409770 എന്ന ഫോണ്‍ നമ്പറില്‍ വിവരങ്ങള്‍ അറിയിക്കാം.

ഈ പട്ടിക തയ്യാറാക്കുന്നത് വഴി കാണാതായവരെ കണ്ടെത്താനുള്ള പ്രവർത്തനങ്ങൾക്ക് വേഗം കൂട്ടാൻ സാധിക്കും. അതോടൊപ്പം, ബന്ധുക്കളുടെ മാനസിക സംഘർഷം കുറയ്ക്കാനും ഇത് സഹായിക്കും.